ശ്വാസംമുട്ടി ഡൽഹി; വായുമലിനീകരണ സൂചിക ഉയർന്നുതന്നെ

ന്യൂഡൽഹി: തുടർച്ചയായ രണ്ടാം ദിവസവും ഡൽഹി സാക്ഷ്യംവഹിക്കുന്നത്​ കനത്ത വായുമലിനീകരണത്തിന്​. നഗരത്തിലെ വായുമലിനീകരണ സൂചിക ബുധനാഴ്​ച രാവിലെ 382ൽ തുടരുകയാണ്​. ചിലയിടങ്ങളിൽ 400ന്​ മുകളിലെത്തി.

​അതേസമയം, ഡൽഹിയിൽ വായു മലിനീകരണം കുറക്കുന്നതിനായി എ.എ.പി സർക്കാർ അഞ്ചിന പദ്ധതി തയാറാക്കി. വായു മലിനീകരണം കുറക്കുന്നതുമായി ബന്ധ​െപ്പട്ട പദ്ധതികളിൽ അരവിന്ദ്​ കെജ്​രിവാൾ സർക്കാറിന്​ ഏറെ വിമർശനങ്ങൾ ഏറ്റുവാങ്ങേണ്ടിവന്നിരുന്നു. ​പദ്ധതികൾ അടുത്തുതന്നെ നടപ്പിലാക്കുമെന്നും സംസ്​ഥാന പരിസ്​ഥിതി മന്ത്രി ഗോപാൽ റായ്​ പറഞ്ഞു. ​

തുറസായ സ്​ഥലത്ത്​ മാലിന്യം കത്തിക്കുന്നത്​ ഒഴിവാക്കാൻ നവംബർ 11 മുതൽ ഡൽഹിയിൽ ആന്‍റി ഓപ്പൺ ബേർണിങ്​ കാമ്പയിൻ സംഘടിപ്പിക്കും. രണ്ടാംഘട്ടത്തിൽ പൊടി മലിനീകരണം കുറക്കുന്നതിനായി ആന്‍റി ഡസ്റ്റ്​ കാമ്പയിനും സംഘടിപ്പിക്കും. പൊതു ഗതാഗതത്തെ പ്രോത്സാഹിപ്പിക്കും. കൽക്കരി, ചൂളകൾ തുടങ്ങിയവയിലെ തീ നിയന്ത്രിക്കും. ഗ്രേഡഡ്​ റെസ്​പോൺസ്​ ആക്ഷൻ പ്ലാൻ ശക്തമാക്കുമെന്നും മന്ത്രി അറിയിച്ചു.

ദീപാവലി ദിനത്തിലെ വെടിമരുന്നുകളുടെ ഉപയോഗവും വയലുകളിലെ തീയിടലുമാണ്​ വായുമലിനീകരണം ഇത്രയും രൂക്ഷമാകാൻ കാരണം. മലിനീകരണത്തെ തുടർന്​ യമുന നദിയിൽ വിഷപ്പത പൊങ്ങിയിരുന്നു. വെള്ളത്തിന്​ മുകളിൽ അടിഞ്ഞുകൂടിയ നിലയിലാണ്​ വിഷപ്പത. അതേസമയം വിഷയത്തിൽ കേന്ദ്രസർക്കാർ അടിയന്തര യോഗം വിളിക്കണമെന്നും ഡൽഹി സർക്കാർ ആവശ്യപ്പെട്ടു.