നീതി നിഷേധം: മോദിക്കും യോഗിക്കും രക്തം കൊണ്ട്​ ക​ത്തെഴുതി ബലാത്സംഗ ഇര

ലഖ്​നോ: ബലാത്സംഗത്തിന്​ ഇരയായ തനിക്ക്​ നീതി ലഭിക്കണമെന്ന്​ ചൂണ്ടിക്കാട്ടി ​ പ്രധാനമന്ത്രി നരേന്ദ്രമോദിക്കും മുഖ്യമന്ത്രി  ആദിത്യനാഥിനും സ്വന്തം രക്തത്തിൽ കത്തെഴുതി പെൺകുട്ടി. തനിക്കെതിരെ അതിക്രമം നടത്തിയവർ ഉന്നതബന്ധമുള്ളവരായതിനാൽ പൊലീസ്​ കേസെടുക്കുന്നില്ലെന്നും കേസ്​ പിൻവലിക്കാൻ പ്രതികൾ സമ്മർദ്ദം ചെലുത്തുകയാണെന്നും കത്തിൽ പെൺകുട്ടി ചൂണ്ടിക്കാട്ടുന്നു. നീതി ഉറപ്പാക്കിയില്ലെങ്കിൽ ആത്മഹത്യ ചെയ്യേണ്ടി വരുമെന്നും എഞ്ചിനിയറിങ്​ വിദ്യാർഥിയായ പെൺകുട്ടി കത്തിൽ പറയുന്നു. 

ജനുവരി 20 നാണ്​ പെൺകുട്ടി മോദിക്കും യോഗിക്കും കത്തെഴുതിയത്​. എന്നാൽ 2017 മാർച്ച്​ 24 ന്​ തന്നെ പെൺകുട്ടിയുടെ പിതാവി​​​​െൻറ പരാതിയിൽ കേസെടുത്തിരുന്നതായി എ.എസ്​.പി സാഷി ശേഖർ സിങ്​ പറഞ്ഞു. അൻകിത്​ വർമ, ദിവ്യ പാണ്ഡെ എന്നിവർക്കെതിരെയാണ്​ കേസ്​. പ്രതികൾ പെൺകുട്ടിയെ പീഡനത്തിനിരയാക്കുകയും  ഭീഷണിപ്പെടുത്തുകയും ചെയ്​തുവെന്ന്​ പരാതിയിൽ ആരോപിച്ചിരുന്നു. 

പെൺകുട്ടിയുടെ പേരും ചിത്രവും ഉപയോഗിച്ച്​ ഫേസ്​ബുക്കിൽ വ്യാജ അക്കൗണ്ട്​ ഉണ്ടാക്കി മോശം ചിത്രങ്ങൾ പ്രചരിപ്പിച്ച ഒരാൾക്കെതിരെയും റായ്​ബറേലിയിൽ കേസെടുത്തിട്ടുണ്ട്​. എന്നാൽ പൊലീസ്​ പ്രതികളെ പിടികൂടുകയോ തുടർ നടപടികളെടുക്കുകയോ ചെയ്​തിട്ടില്ലെന്നാണ്​ ആരോപണം.