കശ്മീരിലെ സൈനികരുടെ വീരമൃത്യു: ഉത്തരവാദിത്തം മോദിക്കും അമിത് ഷാക്കുമെന്ന് റാവത്ത്

മുംബൈ: ജമ്മുകശ്മീരിലെ സൈനികരുടെയും പൊലീസ് ഉദ്യോഗസ്ഥന്റേയും വീരമൃത്യുവിൽ പ്രതികരിച്ച് ശിവസേന നേതാവ് സഞ്ജയ് റാവത്ത്. ഹൃദയം തകർക്കുന്ന സംഭവമാണുണ്ടായതെന്നും പൂർണ ഉത്തരവാദിത്തം പ്രധാനമന്ത്രി നരേന്ദ്ര മോദിക്കും ആഭ്യന്തര മന്ത്രി അമിത് ഷാക്കുമാണെന്നും അദ്ദേഹം പറഞ്ഞു.

ജി20 വിജയത്തിൽ പ്രധാനമന്ത്രിക്കുമേൽ ബി.ജെ.പി​ നേതാക്കൾ പൂക്കൾ ചൊരിയുമ്പോൾ ഭീകരർ സൈനികർക്ക് നേരെ വെടിയുണ്ടകൾ ചൊരിയുകയാണെന്നും അദ്ദേഹം പറഞ്ഞു. ഇന്ത്യയുടെ മൂന്ന് മുതിർന്ന ഉദ്യോഗസ്ഥരാണ് കൊല്ലപ്പെട്ടത്. ജമ്മുകശ്മീരിൽ അസാധാരണമായ സ്ഥിതിവിശേഷമാണ് നിലനിൽക്കുന്നതെന്നും സഞ്ജയ് റാവത്ത് പറഞ്ഞു.

ജമ്മുകശ്മീർ കേന്ദ്രഭരണ​ പ്രദേശമാക്കിയാൽ അവിടെ ​ക്രമസമാധാനം ഉറപ്പാക്കേണ്ട ചുമതല പ്രധാനമന്ത്രിക്കും ആഭ്യന്തര മന്ത്രിക്കുമാണ്. ഇക്കാര്യത്തിൽ പ്രധാനമന്ത്രിയും ആഭ്യന്തരമന്ത്രിയും എന്തുകൊണ്ടാണ് പ്രസ്താവന പുറത്തിറക്കാത്തതെന്നും റാവത്ത് ചോദിച്ചു.

നേരത്തെ രാഷ്ട്രീയ റൈഫിൾസ് യൂണിറ്റിന്റെ കമാൻഡറായ ആർമി കേണൽ, മേജർ കശ്മീർ ​പൊലീസിലെ ഡെപ്യൂട്ടി സൂപ്രണ്ട് എന്നിവർ ഭീകരരുമായുള്ള ഏറ്റുമുട്ടലിൽ കൊല്ലപ്പെട്ടിരുന്നു.കേണൽ മൻപ്രീത് സിങ്, മേജർ ആശിഷ് ധോനാക്, ഡി.സി.പി ഹുമയുൺ ഭട്ട് എന്നിവരാണ് കൊല്ലപ്പെട്ടത്.