എന്‍റെ നിലയിൽ മാറ്റം വന്നിട്ടില്ല; ബി.ജെ.പി ദേശീയ നിർവാഹക സമിതിയിൽ നിന്ന്​ പുറത്തായതിൽ മനേക ഗാന്ധി

ന്യൂഡൽഹി: ബി.ജെ.പി ദേശീയ നിർവാഹക സമിതിയിൽ നിന്ന്​ പുറത്തായതിൽ പ്രതികരണവുമായി എം.പിയും മുൻ കേന്ദ്രമന്ത്രിയുമായ മനേക ഗാന്ധി. ബി.ജെ.പിയുമായുള്ള രണ്ട പതിറ്റാണ്ട്​ നീണ്ട ബന്ധത്തിൽ താൻ സംതൃപ്​തയാണെന്നും ദേശീയ നിർവാഹക സമിതിയിൽ ഉൾപ്പെടുത്തത്​ ​ത​ന്‍റെ വില കുറച്ചിട്ടില്ലെന്നുമായിരുന്നു മനേകയുടെ പ്രതികരണം.

'ബി.ജെ.പിയുമായുള്ള 20 വർഷത്തെ ബന്ധത്തിൽ താൻ സംതൃപ്​തയാണ്​. നിർവാഹക സമിതിയിൽ ഇല്ലാത്തത്​ ഒരിക്കലും ഒരാളുടെ വില കുറക്കില്ല. സേവിക്കുകയെന്നതാണ്​ എന്‍റെ ആദ്യ മതം. ആളുകളുടെ ഹൃദയത്തിൽ കൂടുതൽ ഇടം ലഭിക്കുക എന്നതിനാണ്​ പ്രധാന്യം' -​മനേക ഗാന്ധി പറഞ്ഞു.

'മറ്റു മുതിർന്ന നേതാക്കളിൽ പലർക്കും നിർവാഹക സമിതിയിൽ സ്​ഥാനം ലഭിച്ചിട്ടില്ല. പുതിയ തലമുറക്ക്​ അവസരങ്ങൾ ലഭിക്കണം. എന്‍റെ കടമകളെക്കുറിച്ച്​ ബോധ്യമുണ്ട്​. എന്‍റെ മണ്ഡലത്തിലെ ജനങ്ങളെ സേവിക്കുകയെന്നതാണ്​ ആദ്യ ചുമതലയും' -സ്വന്തം മണ്ഡലമായ സുൽത്താൻപൂർ സന്ദർശിച്ചശേഷം മനേക ഗാന്ധി പറഞ്ഞു.

ബി.ജെ.പി ദേശീയ നിർവാഹക സമിതി യോഗത്തിൽനിന്ന്​ മനേക ഗാന്ധിയെയും മകനും എം.പിയുമായ വരുൺ ഗാന്ധിയെയും പുറത്താക്കിയിരുന്നു. ഉത്തർപ്രദേശ്​ ലഖിംപൂർ ഖേരിയിലെ കർഷക കൊലപാതകവുമായി ബന്ധപ്പെട്ട്​ രൂക്ഷമായ പ്രതികരണങ്ങൾ ഉന്നയിച്ചതിന്​ പിന്നാലെയായിരുന്നു പുറത്താക്കൽ.