ലോക്​ഡൗണിൽ പുറത്തിറങ്ങാൻ മുഖക്കുരു കാരണമാക്കി യുവാവ്​; അപേക്ഷ വൈറൽ

ന്യൂഡൽഹി: കോവിഡിന്‍റെ രണ്ടാം തരംഗം രാജ്യത്ത്​ സമാനതകളില്ലാത്ത പ്രതിസന്ധിയാണ്​ സൃഷ്​ടിക്കുന്നത്​. കോവിഡ്​ വ്യാപനം നിയന്ത്രിക്കാനായി മിക്ക സംസ്​ഥാനങ്ങളും ലോക്​ഡൗണും രാത്രികർഫ്യൂവും ഏർപ്പെടുത്തിയിരുന്നു. ഈ സാഹചര്യത്തിൽ അത്യാവശ്യകാര്യങ്ങൾക്ക്​ പുറത്തിറങ്ങാൻ ഇ -പാസ്​ നിർബന്ധമാക്കുകയും ചെയ്​തിരുന്നു.

നിരവധിപേരാണ്​ പല കാരണങ്ങൾ ചൂണ്ടിക്കാട്ടി ഇ പാസിനായി ബന്ധപ്പെട്ട അധികൃതരെ സമീപിക്കുന്നത്​. അത്തരത്തിൽ ലഭിച്ച ഒരു അപേക്ഷയാണ്​ സമൂഹമാധ്യമങ്ങളിൽ ഇപ്പോൾ വൈറൽ. മുഖക്കുരു ചികിത്സിക്കാൻ പുറത്തുപോകണമെന്നാണ്​ ആവശ്യം. അപേക്ഷയുടെ പകർപ്പ്​ പങ്കുവെച്ച്​ ബിഹാറിലെ പർണിയ ജില്ല മജിസ്​ട്രേറ്റ്​ രാഹുൽ കുമാറാണ്​ ആദ്യം ട്വീറ്റ്​ ചെയ്​തത്​.

'ലോക്​ഡൗണിൽ ഇ പാസിനായി നിരവധി അപേക്ഷകൾ ലഭിച്ചിരുന്നു. മിക്കതും അവശ്യ കാര്യങ്ങൾക്കായിരുന്നെങ്കിൽ ചിലത്​ ഇങ്ങനെയും ലഭിച്ചു. സഹോദരാ നിങ്ങളുടെ മുഖക്കുരു ചികിത്സക്ക്​ അൽപ്പം കാത്തിരിക്കൂ' -രാഹുൽ കുമാർ ട്വീറ്റ്​ ചെയ്​തു. ഹിന്ദിയിൽ അച്ചടിച്ച അപേക്ഷയും അദ്ദേഹം പങ്കുവെച്ചിട്ടുണ്ട്​.

ആശുപത്രിയിൽ പോകുന്നതി​െന്‍റ കാരണമായി യുവാവ്​ ചൂണ്ടിക്കാട്ടിയത്​ മുഖക്കുരു ആയിരുന്നു. സംഭവം വൈറലായതോടെ പ്രതികരണവുമായി നിരവധി​േപർ രംഗത്തെത്തി. മിക്കവരും യുവാവിന്‍റെ ആവശ്യത്തെ പരിഹസിച്ച്​ രംഗത്തെത്തിയപ്പോൾ ചിലർ ആത്മാർഥത ചൂണ്ടിക്കാട്ടിയും പ്രതികരണങ്ങൾ അറിയിച്ചു.