ഡൽഹി മെട്രോയിലെ സൗജന്യ യാത്രക്കെതിരെ ഇ.ശ്രീധരൻ പ്രധാനമന്ത്രിക്ക്​ കത്തയച്ചു

ന്യൂഡൽഹി: ഡൽഹി മെട്രോയിൽ വനിതകൾക്ക്​ സൗജന്യ യാത്ര അനുവദിക്കാനുള്ള ​അരവിന്ദ്​ കെജ്​രിവാൾ സർക്കാറിൻെറ തീരുമാനത്തിനെതിരെ മെട്രോമാൻ ഇ.ശീധരൻ രംഗത്ത്​. ഇതുമായി ബന്ധപ്പെട്ട്​ ഇ.ശ്രീധരൻ പ്രധാനമന്ത്രി നരേന്ദ്രമോദിക്ക്​ കത്തയച്ചു. മെട്രോയിൽ സ്​ത്രീകൾക്ക്​ സൗജന്യ യാത്ര അനുവദിക്കുകയാണെങ്കിൽ അതിൻെറ ചെലവ്​ ഡൽഹി സർക്കാർ തന്നെ വഹിക്കണമെന്ന്​ അദ്ദേഹം ആവശ്യപ്പെട്ടു.

ഡൽഹി ​സർക്കാറിനും കേന്ദ്ര സർക്കാറിനും ഡൽഹി മെട്രോ റെയിൽ കോർപ്പറേഷനിൽ തുല്യ പങ്കാളിത്തമാണുള്ളത്​. ഒരു വിഭാഗത്തിന്​ മെട്രോയിൽ സൗജന്യ യാത്ര അനുവദിച്ചുള്ള ഡൽഹി സർക്കാറിൻെറ ഏകപക്ഷീയമായ തീരുമാനം ഡി.എം.ആർ.സിക്ക്​ വലിയ ബാധ്യതയുണ്ടാക്കുമെന്നും അദ്ദേഹം കത്തിൽ പറയുന്നുണ്ട്​.

മെട്രോയുടെ ആദ്യത്തെ ഘട്ടം പ്രവർത്തനമാരംഭിച്ചപ്പോൾത്തന്നെ ഒരു വിധത്തിലുള്ള സൗജന്യ യാത്രയും അനുവദിക്കാൻ പാടില്ലെന്ന്​ നിശ്​ചയിച്ചിരുന്നതാണ്.​ മെട്രോ സേവനം സാധാരണക്കാർക്ക്​ ലഭ്യമാക്കുന്നതിനും ഡി.എം.ആർ.സിയുടെ വായ്​പ തിരിച്ചടക്കുന്നതിനുമുള്ള തുക കണ്ടെത്തുന്നതിനും ഇത്​ ആവശ്യമാണെന്നും ഇ.ശ്രീധരൻ കത്തിൽ പറയുന്നു.

അതേസമയം, സൗജന്യ യാത്ര കൊണ്ട്​ ഡൽഹി മെട്രോക്ക്​ ഒരു രൂപ പോലും നഷ്​ടം വരില്ലെന്ന്​ ആം ആദ്​മി പാർട്ടി പ്രതികരിച്ചു. സൗജന്യ യാത്രക്കുള്ള ചെലവ്​ പൂർണമായും സർക്കാർ തന്നെ വഹിക്കുമെന്നും പാർട്ടി എം.എൽ.എ സൗരഭ്​ ഭരദ്വാജ്​ പറഞ്ഞു.