മമത ബാനർജിക്കെതിരെ അപകീർത്തി പരാമർശം: ബി.ജെ.പിയുടെ ​ഗം​ഗോപാധ്യക്ക് വിലക്കേർപ്പെടുത്തി തെര. കമീഷൻ

ന്യൂഡൽഹി: പശ്ചിമ ബം​ഗാൾ മുഖ്യമന്ത്രി മമത ബാനർജിക്കെതിരെ അപകീർത്തിപരാമർശം നടത്തിയ സംഭവത്തിൽ മുൻ ജഡ്ജിക്ക് പ്രചരണ വിലക്ക് ഏർപ്പെടുത്തി തെരഞ്ഞെടുപ്പ് കമീഷൻ. കൊൽക്കത്ത ഹൈകോടതി മുൻ ജഡ്ജി അഭിജിത് ​ഗം​ഗോപാധ്യക്കെതിരെയാണ് നടപടി. പശ്ചിമ ബം​ഗാളിലെ തംലുക് മണ്ഡലത്തിലെ ബി.ജെ.പി സ്ഥാനാർത്ഥിയാണ് ​ഗം​ഗോപാധ്യ. മെയ് 21 വൈകീട്ട് അഞ്ച് മണി മുതൽ 24 മണിക്കൂർ നേരത്തേക്കാണ് വിലക്ക്.

മയ് 15ന് ഹൽഡിയയിലെ പൊതുചടങ്ങിൽ സംസാരിക്കുന്നതിനിടെയായിരുന്നു ​ഗം​ഗോപാധ്യ മമതക്കെതിരെ അധിക്ഷേപ പരാമർശവുമായി രം​ഗത്തെത്തിയത്. “മമത ബാനർജി, നിങ്ങൾ എത്ര രൂപക്കാണ് വിൽക്കപ്പെടുന്നത്? നിങ്ങളുടെ വില പത്തുലക്ഷമാണ്. കാരണം എന്താണ്? കാരണം നിങ്ങളുടെ മേക്ക് അപ്പ് എല്ലാം ചെയ്യുന്നത് കേയ സേത് ആണ്? മമത ബാനർജി, അവർ ഒരു സ്ത്രീയാണോ?,“ ​ഗം​ഗോപാധ്യ പറഞ്ഞു.

​ഗം​ഗോപാധ്യയുടെ പരാമർശത്തിന് പിന്നാലെ തൃണമൂൽ കോൺ​ഗ്രസ് മെയ് 16ന് തെരഞ്ഞെടുപ്പ് കമീഷനെ സമീപിച്ചിരുന്നു. മെയ് 17ന് കമീഷൻ നേതാവിന് കാരണം കാണിക്കൽ നോട്ടീസയച്ചു. ​ഗം​ഗോപാധ്യ തെരഞ്ഞെടുപ്പ് ചടങ്ങൾ ലംഘിച്ചെന്ന് ചൂണ്ടിക്കാട്ടിയ കമീഷൻ അദ്ദേഹത്തിന്റെ പരാമർശം തരംതാണ വ്യക്തിഹത്യ നടത്തിയെന്നും വ്യക്തമാക്കി. മെയ് 20നായിരുന്നു ​ഗം​ഗോപാധ്യ മറുപടി സമർപ്പിച്ചത്.

അതേസമയം ​ഗം​ഗോപാധ്യയുടെ പരാമർശങ്ങൾ വളച്ചൊടിച്ചാണ് ടി.എം.സി സമർപ്പിച്ചിരിക്കുന്നതെന്നും അദ്ദേഹത്തെ പോലൊരു വ്യക്തിക്ക് സ്ത്രീകളെ അപകീർത്തിപ്പെടുത്താൻ സാധിക്കില്ലെന്നുമായിരുന്നു ബം​ഗാൾ ബി.ജെ.പി വക്താവ് സമിക് ഭട്ടാചാര്യയുടെ പ്രതികരണം. ഭാരത സേവാശ്രമത്തിലെ സന്യാസിയെ വിമർശിച്ച മമത ബാനർജിക്കെതിരെ തെരഞ്ഞെടുപ്പ് കമീഷൻ യാതൊരു നടപടിയും സ്വീകരിച്ചിട്ടില്ല. ഇങ്ങനെയാണെങ്കിൽ തെരഞ്ഞെടുപ്പ് കമീഷൻ ഇ.ൻ.ടി ഡോക്ടറെ കാണുന്നതാണ് ഉചിതമെന്നും അതിനായി ഡൽ​ഹിയിലെ എയിംസിലേക്ക് പോകണമെന്നും അദ്ദേഹം കൂട്ടിച്ചേർത്തു.