റമദാന് ​വൈദ്യുതിയുണ്ടെങ്കിൽ ദീപാവലിക്കും വേണം; വിവേചനം അനുവദിക്കില്ലെന്ന്​ മോദി

ഫത്തേപൂർ: റമദാന് വൈദ്യുതിയുണ്ടെങ്കിൽ ദീപാവലിക്ക്​ തീർച്ചയായും ഉണ്ടായിരിക്കണമെന്നും ജാതിയുടെയും മതത്തിന്റെയും പേരിൽ സർക്കാർ ഒരിക്കലും വിവേചനം കാണിക്കരുതെന്നും പ്രധാനമന്ത്രി നരേന്ദ്ര മോദി. ഉത്തർപ്രദേശിലെ ഫത്തേപൂർ ജില്ലയിൽ തെരഞ്ഞെട​ുപ്പ്​ റാലിയിൽ സംസാരിക്കുകയായിരുന്നു അദ്ദേഹം.

യു.പിയിൽ സമാജ്​വാദി പാർട്ടി ജനങ്ങളെ മതപരമായും ജാതീയമായും വിഭജിച്ചുകൊണ്ടുള്ള രാഷ്​ട്രീയം കളിക്കുകയാണ്​. അഴിമതി വ്യാപകമായി. കൈക്കൂലി നൽകിയാൽ അല്ലാതെ ​​േജാലി ലഭിക്കി​ല്ലെന്ന സ്​ഥിതിയായി. തെരഞ്ഞെടുപ്പിൽ തോൽക്കുമെന്ന ഭയത്തിൽ ഭരണകക്ഷി പുതിയൊരു സഖ്യത്തിൽ ഏർപ്പെട്ടിരിക്കുകയാണ്​.

റാം മനോഹർ ലോഹ്യയുടെ പ്രത്യയശാസ്ത്രത്തെ അപമാനിച്ച് രാജ്യത്തെ കൊള്ളയടിച്ചവർക്കൊപ്പം എസ്.പി ചേർന്നു. സംസ്​ഥാനത്ത്​ കഴിഞ്ഞ പത്തുവർഷമായി യാതൊരു വികസനവും നടക്കുന്നില്ല. വികസനത്തിന്റെ ഈ വനവാസം ഇപ്പോൾ അവസാനിക്കണം. രാജ്യം വളരെ വേഗത്തിൽ കുതിക്കുകയാണ്, ഉത്തർപ്രദേശും അതിനൊപ്പം വളരണം. യു.പിയിലെ പൊലീസ് നിഷ്ക്രിയരാണ്. എസ്.പി നേതാവും മന്ത്രിയുമായ ഗായത്രി പ്രജാപതിക്കെതിരെ കേസ് റജിസ്റ്റർ ചെയ്യാൻ സുപ്രീംകോടതി ഇടപെടേണ്ടി വന്നുവെന്നും മോദി ചൂണ്ടിക്കാട്ടി.

ജനങ്ങളുടെ സുരക്ഷക്ക്​ പ്രധാന്യം നൽകുന്ന സർക്കാറിനെ ജനം തെരഞ്ഞെടുക്കണം. യു.പിയിൽ എവിടെയും ഗുണ്ടാരാജ് ആണ്. പൊലീസ് സ്റ്റേഷനുകൾ സമാജ്‍വാദി പാർട്ടിയുടെ ഒാഫീസുകളായി മാറി. അഖിലേഷി​​െൻറ ശബ്ദത്തിൽ ഇടർച്ചയുണ്ടെന്നും അദ്ദേഹത്തിന്റെ ശരീരഭാഷ തോൽവിയെ സൂചിപ്പിക്കുന്നുവെന്നും മോദി പറഞ്ഞു.