‘ബാഹുബലി’ പ്രധാനമന്ത്രിക്ക് പോലും കോവിഡിനെ നേരിടാന്‍ കഴിഞ്ഞില്ല; മോദിയെ പരിഹസിച്ച്​ കപിൽ സിബല്‍

ന്യൂഡല്‍ഹി: ‘ബാഹുബലി’ പ്രധാനമന്ത്രിക്ക്​ പോലും കോവിഡ്​ മഹാമാരിയെ നേരിടാൻ കഴിഞ്ഞില്ലെന്നും ജനങ്ങളെ ദുരിതത്തിലേക്ക്​ തള്ളിവിടുകയായിരുന്നെന്നും മുതിർന്ന കോൺഗ്രസ്​ നേതാവ്​ കപിൽ സിബൽ. 

മോദി സര്‍ക്കാര്‍ രണ്ടാം തവണ അധികാരത്തിലേറിയതി​​​െൻറ ഒന്നാം വാര്‍ഷികാഘോഷങ്ങള്‍ക്ക് തൊട്ടുപിന്നാലെയാണ്​ മോദിയെ പരിഹസിച്ച് കപില്‍ സിബല്‍ രംഗത്തെത്തിയത്​.

‘മഹാമാരിയെ തെറ്റായ രീതിയില്‍ കൈകാര്യം ചെയ്യുകയും ജനങ്ങളെ ദുരിതത്തിലേക്ക് തള്ളിവിടുകയുമാണ് കേന്ദ്രം ചെയ്തത്​. ലോക്​ഡൗണ്‍ പ്രതിസന്ധിക്കിടയില്‍ ജനങ്ങള്‍ പരസ്പരം സഹായിച്ചു. മാര്‍ച്ച് 24ന് ശേഷം സർക്കാറിന്​ തങ്ങളുടെ വിഭജന അജണ്ട മാറ്റി വെക്കേണ്ടി വന്നു. ലോക്​ഡൗണിന് മുമ്പ് സര്‍ക്കാറി​​​െൻറ അജണ്ട ധ്രുവീകരണം മാത്രമായിരുന്നു’- ദേശീയ പൗരത്വ രജിസ്​റ്റർ, പൗരത്വ ഭേദഗതി നിയമം, യു.എ.പി.എ എന്നിവയെ പരോക്ഷമായി പരാമർശിച്ച്​ സിബൽ പറഞ്ഞു.

റോഡുകളിലൂടെ കാല്‍നടയായി ആളുകള്‍ക്ക്​ സ്വദേശത്തേക്ക് മടങ്ങേണ്ടി വന്നത് സര്‍ക്കാറി​​​െൻറ അനാസ്ഥയുടെ സാക്ഷ്യപത്രമാണ്. പട്ടിണി മൂലം നിരവധിയാളുകളാണ് മരിച്ചുവീണത്​. അന്തർ സംസ്​ഥാന തൊഴിലാളികളുടെ പ്രതിസന്ധി കൈകാര്യം ചെയ്യാന്‍ പ്രധാനമന്ത്രിക്ക് സാധിച്ചിട്ടില്ലെന്നും അദ്ദേഹം കുറ്റപ്പെടുത്തി.

നേപ്പാള്‍ നമ്മുടെ കണ്ണുകളിലേക്ക്​ നോക്കിയിരിക്കുകയാണ്​. ചൈനയുമായും തർക്കമുണ്ട്​. പ്രധാനമന്ത്രി എന്താണ്​ അവരുടെ കണ്ണുകളിലേക്ക്​ ഉറ്റുനോക്കാത്തത്​. യഥാര്‍ഥത്തില്‍ അതിര്‍ത്തിയില്‍ എന്താണ് സംഭവിക്കുന്നതെന്ന് ജനങ്ങളെ ബോധ്യപ്പെടുത്താൻ സർക്കാറിന്​ ബാധ്യതയുണ്ടെന്നും അദ്ദേഹം പറഞ്ഞു.