ശ്രീരാമ ഭഗവാനു ​പോലും ബലാത്സംഗങ്ങൾ തടയാനാവില്ലെന്ന് ബി.​െജ.പി എം.എൽ.എ

ബല്ലിയ: വർധിച്ചു വരുന്ന  ബലാത്സംഗ സംഭവങ്ങൾ ശ്രീരാമ ഭഗവാനു പോലും തടയാനാവില്ലെന്ന്​ ഉത്തർപ്രദേശ്​ ബി.ജെ.പി എം.എൽ.എ സുരേന്ദ്ര നാരായൺ സിങ്​. മറ്റുള്ളവരെ കുടുംബമായും സഹോദരിമാരായും കണ്ട്​ പെരുമാറേണ്ടത്​ ജനങ്ങളുടെ ഉത്തരവാദിത്തമാണ്​. ബലാത്സംഗങ്ങൾ ഭരണഘടനയിലൂടെ നിയന്ത്രിക്കാനാവില്ലെന്നും മൂല്ല്യങ്ങളിലൂടെ മാത്രമേ അത്​ സാധിക്കൂവെന്നും അദ്ദേഹം പറഞ്ഞു. ഉത്തർപ്രദേശിൽ വർധിച്ചു വരുന്ന ബലാത്സംഗങ്ങളെ കുറിച്ചുള്ള ചോദ്യങ്ങൾക്ക്​ മറുപടി പറയുകയായിരുന്നു എം.എൽ.എ​.

നേരത്തേയും വിവാദ പരാമർശങ്ങൾകൊണ്ട്​ വാർത്തകളിലിടം നേടിയ വ്യക്തിയാണ്​ സുരേന്ദ്ര നാരായൺ സിങ്​. സർക്കാർ ജോലിക്കാരേക്കാൾ മെച്ചം വേശ്യകളാണെന്നും ബലാത്സംഗങ്ങൾ വർധിക്കുന്നതി​​െൻറ ഉത്തരവാദിത്തം രക്ഷിതാക്കൾക്കും സ്​മാർട്ട്​ ഫോണുകൾക്കുമാണെന്നുമുള്ള അദ്ദേഹത്തി​​െൻറ പ്രസ്​താവനകൾ വിവാദമായിരുന്നു. 

ഉന്നാവ്​ ബലാത്സംഗ കേസിൽപെട്ട്​ ജയിലിലായ ബി.ജെ.പി എം.എൽ.എ കുൽദീപ്​ സിങ്​ സെൻഗാറിനെ പിന്തുണച്ചും സുരേന്ദ്ര നാരായൺ സിങ് രംഗത്തെത്തിയിരുന്നു. മൂന്നു കുട്ടികളുടെ അമ്മയായ സ്​ത്രീയെ ആർക്കും ബലാത്സംഗം ചെയ്യാനാവില്ലെന്നും കേസ്​ കുൽദീപ്​ സിങിനെതിരെയുള്ള ഗൂഢാലോചനയുടെ ഭാഗമാണെന്നുമായിരുന്നു എം.എൽ.എയുടെ വാദം.