ഡി.ആർ.‌ഡി.‌ഒ വികസിപ്പിച്ച കോവിഡ് മരുന്നിന്​ അടിയന്തര​ ഉപയോഗ അനുമതി

ന്യൂഡൽഹി: ഡിഫൻസ്​ റിസർച്ച്​ ആൻഡ്​ ഡെവലപ്​മെൻറ്​ ഒാർഗനൈസേഷൻ (ഡി.ആർ.ഡി.ഒ) വികസിപ്പിച്ച കോവിഡിനെതിരായ മരുന്ന്​ രാജ്യത്ത്​ അടിയന്തര​ ഉപയോഗത്തിന്​ അനുമതി. ഡ്രഗ് 2-ഡിഓക്സി-ഡി-ഗ്ലൂക്കോസ് (2-ഡിജി) എന്ന മരുന്ന് ഡി.ആർ.ഡി.ഒ ലാബും ഹൈദരാബാദ് ആസ്ഥാനമായി പ്രവർത്തിക്കുന്ന ഡോ. റെഡ്ഡീസ് ലബോറട്ടറിയും ചേർന്നാണ്​ വികസിപ്പിച്ചത്. ഡ്രഗ്സ് കൺട്രോളർ ജനറൽ ഓഫ് ഇന്ത്യയാണ്​ (ഡി.സി.ജി.ഐ) അടിയന്തര ഉപയോഗത്തിന്​ അനുമതി നൽകിയത്​. പൊടി രൂപത്തിലുള്ള​ ഇൗ മരുന്ന്​ വെള്ളത്തിൽ ലയിപ്പിച്ചാണ്​ കഴിക്കേണ്ടത്​.

കോവിഡ്​ ബാധിച്ചവർ വേഗത്തിൽ രോഗമുക്​തി നേടുന്നുണ്ടെന്നും മെഡിക്കൽ ഒാക്​സിജ​െൻറ സഹയാം തേടുന്നത്​ കുറക്കാൻ സാധിക്കുന്നുണ്ടെന്നും​ ഇതി​െൻറ പരീക്ഷണഘട്ടത്തിൽ മനസ്സിലാക്കാൻ സാധിച്ചു. ഇൗ മരുന്ന്​ കഴിച്ചവരിൽ ആർ.ടി.പി.സി.ആർ ഫലം നെഗറ്റീവാകുകയും ചെയ്​തു.

കഴിഞ്ഞ വർഷം മേയ് മുതൽ ഒക്ടോബർ വരെയുള്ള രണ്ടാംഘട്ട പരീക്ഷണങ്ങളിൽ 110 പേർക്കാണ്​ മരുന്ന്​ നൽകിയത്​. ഇവരിൽ രോഗമുക്​തി നിരക്ക്​ വേഗത്തിലായിരുന്നു. ആറ് ആശുപത്രികളിലായി ചികിത്സയിലുള്ള കോവിഡ് രോഗികളിലാണ് മൂന്നാംഘട്ട പരീക്ഷണം നടത്തിയത്.