ഉദ്ധവ്​ താക്കറെക്കെതിരായ കാർട്ടൂൺ പങ്കുവെച്ചു; വിരമിച്ച നേവി ഉദ്യോഗസ്ഥന്​ ശിവസേനക്കാരുടെ ക്രൂരമർദനം

മുംബൈ: മഹാരാഷ്​ട്ര മുഖ്യമന്ത്രി ഉദ്ധവ്​ താക്കറെയെ വിമർശിക്കുന്ന കാർട്ടൂൺ പങ്കുവെച്ച വിരമിച്ച നേവി ഉദ്യോഗസ്ഥനെ ശിവസേന പ്രവർത്തകർ ക്രൂരമായി മർദിച്ചു. 65 കാരനായ മദന്‍ ശര്‍മ്മയെ പാർട്ടി പ്രവർത്തകർ കണ്ഡിവാലിയിലെ താമസസ്ഥലത്തെത്തി മർദിക്കുകയായിരുന്നു. ഇയാളുടെ പരാതിയിൽ നാല് ശിവസേന പ്രവർത്തകരെ പൊലീസ്​ അറസ്​റ്റ്​ ചെയ്​തു. സേനയുടെ ശാഖാപ്രമുഖിലൊരാളായ കമലേഷ് ശർമ്മ ഉൾപ്പെടെയുള്ളവരാണ് മുംബൈ പൊലീസിന്‍റെ പിടിയിലായിരിക്കുന്നത്. ഒളിവിൽ പോയ രണ്ട് പേർക്കായി തിരച്ചിൽ തുടരുകയാണ്.

ഉദ്ധവ് താക്കറെയുടെ ഒരു കാർട്ടൂൺ റെസിഡൻഷ്യൽ സൊസൈറ്റിയുടെ വാട്സ്ആപ്പ് ഗ്രൂപ്പിലേക്ക് അയച്ചതിനാണ് മദന്‍ ശര്‍മ്മയെ സേനാപ്രവർത്തകർ ക്രൂരമായി മർദിച്ചത്. വാട്ട്​സ്​ ആപ്പ്​ സന്ദേശം അയച്ചതിന്​ പിന്നാലെ കമലേഷ് ശർമ്മ ഇയാളെ വിളിച്ച്​ താമസ സ്ഥലവും വിലാസവും ചോദിച്ചറിഞ്ഞു. ശേഷം പ്രവർത്തകർ സംഘം ചേർന്ന്​ കണ്ഡിവാലിയിലുള്ള ലോഖണ്ഡ്വാല കോംപ്ലക്സിലെ മദൻ ശർമയുടെ താമസസ്ഥലത്തെത്ത​ി വിളിച്ചിറക്കി മർദിക്കുകയായിരുന്നു . വെള്ളിയാഴ്​ച രാവിലെ 11.30ഓടെ നടന്ന അക്രമ സംഭവത്തിന്‍റെ സി.സി ടി.വി ദൃശ്യങ്ങളും വ്യാപകമായി പ്രചരിച്ചിരുന്നു.

കണ്ണിന്​ പരിക്കേറ്റ മദൻ ശർമ ചികിത്സയിലാണ്​. പരിക്കേറ്റ നിലയിലുള്ള ഇദ്ദേഹത്തി​െൻറ ചിത്രങ്ങൾ സാമൂഹിക മാധ്യമങ്ങളിൽ പ്രചരിക്കുന്നുണ്ട്​.

അതേസമയം സംഭവത്തിന്‍റെ പശ്ചാത്തലത്തിൽ താക്കറെ സർക്കാരിനെതിരെ ബി.ജെ.പി രംഗത്തെത്തി. സർക്കാര്‍ ഗുണ്ടാരാജ് അവസാനിപ്പിക്കണമെന്ന്​ മുൻ മുഖ്യമന്ത്രി ദേവേന്ദ്ര ഫട്​നാവിസ്​ ട്വിറ്ററിലൂടെ വിമർശിച്ചു.