തെലങ്കാന മന്ത്രിയുടെ പേഴ്​സനൽ സെക്രട്ടറിയായി ആൾമാറാട്ടം; ലക്ഷങ്ങൾ തട്ടിയ മുൻ രഞ്​ജി താരം പിടിയിൽ

ഹൈദരാബാദ്​: കോർപറേറ്റ്​ കമ്പനികളടക്കം ഒമ്പതോളം സ്​ഥാപനങ്ങളെ ആൾമാറാട്ടം നടത്തി വഞ്ചിച്ച കേസിൽ മുൻ രഞ്​ജി ക്രിക്കറ്റ്​ താരം ബി. നാഗരാജു അറസ്റ്റിലായി.

തെലങ്കാന ഐ.ടി മന്ത്രി കെ.ടി. രാമറാവുവിന്‍റെ പേഴ്​സണൽ സെക്രട്ടറിയെന്ന വ്യജേന ഒമ്പതിലധികം കമ്പനികളെയാണ്​ ഇയാൾ പറ്റിച്ചത്​.

2014-15 കാലയളവിൽ ആന്ധ്രക്കായി രഞ്​ജി കളിച്ച ബി. നാഗരാജു രാമറാവുവി​ന്‍റെ പേഴ്​സണൽ സെക്രട്ടറിയാണെന്ന്​ പരിചയപ്പെടുത്തി കമ്പനികൾ, കോർപറേറ്റ്​ ​ആശുപത്രികൾ, വിദ്യാഭ്യാസ്​സ്​ഥാപനങ്ങൾ എന്നിവയിലേക്ക്​ വിളിക്കുകയായിരുന്നു.

രാമറാവു ഉടൻ തന്നെ മുഖ്യമന്ത്രിയായി അധികാരമേൽക്കുമെന്നും ഇതിന്‍റെ ഭാഗമായി സ്​റ്റേഡിയത്തിൽ പരസ്യ ബോർഡ്​ വെക്കാനും സത്യപ്രതിജ്ഞാ ചടങ്ങുമായി ബന്ധപ്പെട്ട്​ മാധ്യമങ്ങളിൽ പരസ്യം നൽകാനുമായി ഇവരോട്​ പണം ആവശ്യപ്പെട്ടതായാണ്​ പരാതി.

ഇപ്രകാരം 39,22,400 രൂപ ഇയാൾ കൈക്കലാക്കി. മുമ്പ്​ 10 കേസുകളിൽ അറസ്റ്റിലായി ജാമ്യത്തിലിറങ്ങിയെങ്കിലും ഇയാൾ സ്വഭാവം മാറ്റിയില്ല.

തെലങ്കാന മുഖ്യമന്ത്രിയായ കെ. ചന്ദ്രശേഖര റാവുവിന്‍റെ മകനും തെലങ്കാന രാഷ്​ട്ര സമിതിയുടെ വർക്കിങ്​ പ്രസിഡന്‍റുമാണ്​ രാമറാവു.