വാഴപ്പഴത്തിനും നികുതി; മാരിയറ്റ്​ ഹോട്ടലിന്​ നോട്ടീസ്​

മുംബൈ: പഞ്ചനക്ഷത്ര ഹോട്ടലിൽ നിന്ന്​ രണ്ട്​ പഴം വാങ്ങിയതിന്​ 442 രൂപ ബിൽ നൽകിയ സ്ഥാപനത്തിനെതിരെ ബോളിവുഡ്​ താരം രാഹുൽ ബോസ്​ രംഗത്തെത്തിയത്​ ദിവസങ്ങൾക്ക്​ മുമ്പാണ്​. സംഭവവുമായി ബന്ധപ്പെട്ട്​ നികുതി വകുപ്പ്​ ഹോട്ടലിന്​ നോട്ടീസയച്ചു. നികുതി രഹിതമായ വാഴപ്പഴത്തിന്​ നികുതി ഈടാക്കിയത്​ സംബന്ധിച്ച്​ വിശദീകരണം നൽകണമെന്ന്​​ ആവശ്യപ്പെട്ടാണ്​ നോട്ടീസ്​​.

അസിസ്​റ്റൻറ്​ എക്​സൈസ്​ ആൻഡ്​ ടാക്​സേഷൻ കമീഷണർ രാജീവ്​ ചൗധരിയാണ്​ നോട്ടീസയച്ചിരിക്കുന്നത്​. പഴങ്ങൾ ജി.എസ്​.ടിയിൽ നികുതി രഹിതമാണ്​. എന്നാൽ, ​രണ്ട്​ പഴം വാങ്ങിയതിന് രാഹുൽ ബോസിൽ നിന്ന്​​​​ ഹോട്ടൽ 18 ശതമാനം നികുതി ഈടാക്കിയിരുന്നു​.

മാരിയറ്റ്​ ഹോട്ടലിലെത്തിയ രാഹുൽ ബോസ്​ വ്യായാമത്തിനുശേഷം ​രണ്ട്​ പഴങ്ങൾ മുറിയിലേക്ക്​ ഓർഡർ ചെയ്യുകയായിരുന്നു രണ്ട്​ പഴത്തിനും കൂടി 375 രൂപയായിരുന്നു വില. ജി.എസ്​.ടി കൂടി ചേർത്ത്​ 442.50 രൂപക്കാണ്​ ബോസ്​ പഴം വാങ്ങിയത്​.