പെൺകുട്ടിയെ കത്തികാട്ടി 'ലൗജിഹാദിനായി' ഭീഷണിപ്പെടുത്തി യുവാവെന്ന പേരിൽ ദൃശ്യം​; സത്യമിതാണ്

ഹിന്ദു യുവതിയെ കത്തികാട്ടി ഭീഷണിപ്പെടുത്തുന്ന മുസ്​ലിം യുവാവ്​ എന്ന തലക്കെട്ടിൽ കഴിഞ്ഞ ദിവസങ്ങളിൽ സമൂഹ മാധ്യമങ്ങളിൽ പ്രത്യക്ഷപ്പെട്ട വീഡിയോയുടെ സത്യാവസ്ഥ പുറത്ത്. 'ഒരു ലൗജിഹാദി ഹിന്ദു പെൺകുട്ടിയെ മതം മാറി തന്നെ വിവാഹം കഴിക്കാൻ ഭീഷണിപ്പെടുത്തുന്ന ദൃശ്യം' എന്ന പേരിൽ നിരവധി ഹിന്ദുത്വ പ്രൊ​ഫൈലുകൾ ദൃശ്യങ്ങൾ വ്യാപകമായി പങ്കുവെച്ചിരുന്നു.

കാജൽ ഹിന്ദുസ്ഥാനി എന്ന പേരിലുള്ള ട്വിറ്റർ ഹാൻഡിലിൽ ആണ്​ ചിത്രം ആദ്യം പ്രത്യക്ഷപ്പെട്ടത്​. 'ഹിന്ദു പെൺകുട്ടിയെ ഒരു ലൗ ജിഹാദി കത്തികാട്ടി ട്രാപ്പിൽ പെടുത്തുന്നത്​ കാണൂ' എന്നായിരുന്നു ഇയാൾ ചിത്രത്തിന്​ നൽകിയ അടിക്കുറിപ്പ്​. തീവ്ര ഹിന്ദുത്വ വലതുപക്ഷ ചാനലായ സുദർശൻ ടി.വിയുടെ തലവൻ മുകേഷ്​ കുമാർ പോസ്റ്റ്​ ഷെയർ ചെയ്തു. നൂറ്​ കണക്കിന്​ ഹിന്ദുത്വ പ്രൊഫൈലുകൾ ദൃശ്യം പങ്കുവെച്ചു. വ്യാപകമായി ഇത്​ പ്രചരിപ്പിക്കപ്പെട്ടു.

എന്നാൽ, 'ആൾട്ട്​ ന്യൂസ്​' നടത്തിയ അന്വേഷണത്തിൽ തികച്ചും വ്യത്യസ്തമായ വിവരങ്ങളാണ്​ പുറത്തുവന്നത്. ന്യൂസ്​ 18 ചാനലിലെ മാധ്യമ പ്രവർത്തകനായ വികാസ്​ സിങ്​ ചൗഹാൻ പകർത്തിയ ദൃശ്യങ്ങളാണ്​ യഥാർത്ഥത്തിൽ ഇത്​. സാനു എന്ന പേരിൽ അറിയപ്പെടുന്ന പീയൂഷ്​ എന്ന യുവാവ്​ ഏതാനും നാളുകൾക്ക്​ മുമ്പ്​ ഇന്ദോർ നഗരത്തിൽ പെൺകുട്ടികളെ കത്തികാട്ടി ഭീഷണിപ്പെടുത്തുന്നതാണ്​ ദൃശ്യങ്ങളിലുള്ളത്​.

ഇയാളെ പിന്നീട്​ പൊലീസ്​ അറസ്റ്റ്​ ചെയ്തതായും വാർത്തയിൽ പറയുന്നു. ഈ ദൃശ്യമാണ്​ മുസ്​ലിം യുവാവ്​ ഹിന്ദു പെൺകുട്ടിയെ കത്തികാട്ടി ലൗജിഹാദിനായി ഭീഷണിപ്പെടുത്തുന്നു എന്ന പേരിൽ ഹിന്ദുത്വ പ്രൊഫൈലുകൾ സമൂഹമാധ്യമങ്ങിൽ പ്രചരിപ്പിച്ചത്​.