കർഷക പ്രക്ഷോഭത്തിന്​ ഐക്യദാർഢ്യം; നാളെ കോൺഗ്രസിന്‍റെ​ രാജ്​ഭവൻ മാർച്ച്​

ന്യൂഡൽഹി: കർഷക പ്രക്ഷോഭത്തിന്​ ഐക്യദാർഡ്യം പ്രഖ്യാപിച്ച്​ കോൺഗ്രസ്​ വ്യാഴാഴ്ച നടത്തുന്ന രാജ്​ഭവൻ മാർച്ചിന്​ മുൻ അധ്യക്ഷൻ രാഹുൽ ഗാന്ധി നേതൃത്വം നൽകും. കോൺഗ്രസിന്‍റെ എല്ലാ എം.പിമാരും നേതാക്കളും അണിചേരുന്ന പ്രതിഷേധ മാർച്ചിൽ കാർഷിക നിയമങ്ങൾക്കെതിരെ രണ്ടുകോടി പേർ ഒപ്പുവെച്ച മൊമോറാണ്ടം രാഷ്​ട്രപതി രാംനാഥ്​ കോവിന്ദിന്​ സമർപ്പിക്കും.

കേന്ദ്രസർക്കാറിന്‍റെ മൂന്ന്​ വിവാദ കാർഷിക നിയമങ്ങൾ പിൻവലിക്കണമെന്നാവശ്യപ്പെടുന്ന നിവേദനത്തിലേക്ക്​ രാജ്യമെമ്പാടുനിന്നും ഒപ്പുകൾ ശേഖരിച്ചു. ഡൽഹിയിൽ കൊടുംശൈത്യത്തിലും കാർഷിക നിയമങ്ങൾ പിൻവലിക്കണമെന്ന്​ ആവശ്യപ്പെട്ട്​ 28 ദിവസമായി സമരം ചെയ്യുന്ന കർഷകർക്ക്​ ഐക്യദാർഢ്യം പ്രഖ്യാപിക്കുകയാണ്​ മാർച്ചിന്‍റെ ലക്ഷ്യം.

പാർലമെന്‍റ്​ കെട്ടിടത്തിന്​ സമീപത്തെ വിജയ്​ ചൗക്കിൽനിന്ന്​ രാഷ്​ട്രപതി ഭവനിലേക്കായിരിക്കും രാഹുൽ ഗാന്ധിയും മറ്റു എം.പിമാരും മാർച്ച്​ നടത്തുക. ഒപ്പുശേഖരണത്തിനായി കോൺഗ്രസിന്‍റെ നേതൃത്വത്തിൽ ഒപ്പുശേഖരണ കാമ്പയിനുകൾ ആരംഭിച്ചിരുന്നു.

കാർഷിക നിയമങ്ങൾ കർഷകരുടെ ആവശ്യങ്ങൾ സംരക്ഷിക്കുന്നതിനല്ലെന്നും മോദി സർക്കാറിന്‍റെ സുഹൃത്തുക്കളായ കുത്തക മുതലാളിമാർക്ക്​ വേണ്ടിയാണെന്നും കോൺഗ്രസ്​ ആരോപിച്ചു.