കർഷകരെ ചികിത്സിക്കുന്നത്​ പുണ്യം; തെരുവിൽ തനിച്ചാക്കില്ലെന്ന്​​ ഡോക്​ടർമാരും

ന്യൂഡൽഹി: കേന്ദ്രസർക്കാറി​െൻറ കാർഷിക നിയമങ്ങ​ൾക്കെതിരെ പ്രതിഷേധിക്കുന്ന കർഷകർക്ക്​ സഹായവുമായി ഡോക്​ടർമാരും. ആരോഗ്യ പ്രശ്​നങ്ങൾ നേരിടുന്ന കർഷകർക്ക്​ രാപ്പകൽ ഇല്ലാതെ ചികിത്സ സഹായവുമായി പ്രതിഷേധം ആരംഭിച്ചതുമുതൽ ഡോക്​ടർമാർ സമരഭൂമിയിലുണ്ട്​.

20 ദിവസമായി തുടരുന്ന സമരം കാർഷിക നിയമങ്ങൾ പിൻവലിക്കാതെ അവസാനിപ്പിക്കില്ലെന്നാണ്​ കർഷകരുടെ നിലപാട്​. പ്രായമായവരാണ്​ കർഷകരിൽ ഏറെയും. 70ന്​ മുകളിൽ പ്രായമുള്ളവരും സമരരംഗത്ത്​ സജീവമായുണ്ട്​. അതിനാൽ തന്നെ മിക്കവരും വാർധക്യ പ്രശ്​നങ്ങൾ നേരിടുന്നവരും വിവിധ അസുഖങ്ങൾക്ക്​ നിരന്തരം മരുന്ന്​ കഴിക്കുന്നവരുമാണ്​.

സൗജന്യഭക്ഷണം ലഭ്യമാക്കുന്ന സിക്കുകാരുടെ പൊതുവായ അടുക്കളയും ഗുരുദ്വാരകളും കർഷകർക്ക്​ പിന്തുണയുമായി സഹായങ്ങൾ നൽകി വരുന്നുണ്ട്​. ഇതിനുപുറമെ ചികിത്സ ലഭ്യമാക്കുന്നതിനായാണ്​ ഡോക്​ടർമാരുടെ സംഘം തമ്പടിച്ചിരിക്കുന്നത്​. ദിനംപ്രതി ആയിരക്കണക്കിന്​ കർഷകർ ഡൽഹിയിൽ കർഷക സമരത്തിന്​ പിന്തുണയുമായി എത്തുന്നുണ്ട്​്​. ഇതോടെ സഹായവുമായി എത്തുന്ന ഡോക്​ടർമാരുടെ എണ്ണവും വർധിച്ചു.

സമരം ആരംഭിച്ചതിനുശേഷം നവംബർ 27 മുതൽ​ഡോക്​ടർമാർ കർഷകർക്ക്​ ചികിത്സ ഉറപ്പാക്കുന്നതിനായി എത്തിയിരുന്നു. പിന്നീട്​ കൂടുതൽ ഡോക്​ടർമാർ കർഷകരെ സഹായിക്കാനായി രംഗത്തെത്തി. പഞ്ചാബിൽ നിന്നുള്ള ഡോക്​ടർമാരാണ്​ ഇതിൽ അധികവും.

പ്രധാന പ്രതിഷേധ കേന്ദ്രങ്ങളായ സിംഘു, ടിക്​രി അതിർത്തിൽ മൊബൈൽ ആംബുലൻസുകളുടെ സേവനം എപ്പോഴും ലഭ്യമാണ്​. നിരന്തരം മെഡിക്കൽ ക്യാമ്പുകളും സംഘടിപ്പിച്ചുവരുന്നു. കൂടാതെ മെഡിക്കൽ ഉപകരണങ്ങളും മരുന്നുകളും ആവശ്യത്തിന്​ ശേഖരിച്ചതായും ഡോക്​ടർമാർ പറയുന്നു. ആവശ്യങ്ങൾക്കായി ഏതെങ്കിലും ഡോക്​ടർ പഞ്ചാബിലേക്ക്​ മടങ്ങിയാൽ ഷിഫ്​റ്റ്​ അടിസ്​ഥാനത്തിൽ മറ്റു ഡോക്​ടർമാരുടെ സേവനം ലഭ്യമാക്കും.

ഡിസംബർ 13ന്​ പഞ്ചാബിൽനിന്ന്​ ഒരു കൂട്ടം ഡോക്​ടർമാർ കർഷകർക്ക്​ സഹായം ലഭ്യമാക്കുന്നതിനായി ഡൽഹി അതിർത്തിയിലെത്തിയിരുന്നു. 'ഞങ്ങളുടെ കർഷകരും ഞങ്ങളുടെ ദാതാക്കളും മാസങ്ങളായി തെരുവിലാണ്​. ഇപ്പോൾ അവർ ഡൽഹിയിലും. അവർക്ക്​ പെട്ടന്ന്​ എന്തെങ്കിലും ആരോഗ്യ പ്രശ്​നങ്ങൾ നേരിട്ടാൽ ഞങ്ങൾ സഹായത്തിനെത്തും' -ഡോക്​ടർമാർ പറയുന്നു.

പ്രതിഷേധത്തിൽ പ​െങ്കടുക്കുന്ന ഭൂരിഭാഗം കർഷകരും ഉയർന്ന രക്തസമ്മർദ്ദത്തിനും പ്രമേഹത്തിനും മരുന്ന്​ കഴിക്കുന്നവരാണ്​. പ്രായമായവരിൽ കൂടുതലായി ഹൃദയം, പല്ല്​ സംബന്ധമായ ആരോഗ്യ പ്രശ്​നങ്ങളും കണ്ടുവരുന്നു. അതിനാൽ വാഹനത്തിൽ ഇ.സി.ജി മെഷീൻ സ്​ഥാപിക്കുകയും പല്ല്​ വൃത്തിയാക്കുന്നതിനാവശ്യമായ സൗകര്യങ്ങൾ ഏർപ്പെടുത്തുകയും ചെയ്​തിട്ടുണ്ട്​. വൃത്തിയായ കുടിവെള്ളം ലഭ്യമല്ലാത്തതിനാൽ ​ത്വക്ക്​ രോഗങ്ങളും കർഷകരിൽ കണ്ടുവരുന്നതായി ഡോക്​ടർമാർ പറയുന്നു.

വിവിധ സംസ്​ഥാനങ്ങളിൽ നിന്നെത്തിയ ഡോക്​ടർമാർ വിവിധ ക്യാമ്പുകളിലായാണ്​ പ്രവർത്തനം. എന്നാൽ എല്ലാവർക്കും കർഷകരെ സഹായിക്കുക എന്ന ഒറ്റ ലക്ഷ്യം മാത്രമാണുള്ളതെന്ന്​ ഡോക്​ടർമാർ കൂട്ടിച്ചേർത്തു.

കർഷകരെ ചികിത്സിക്കാൻ കഴിയുന്നത്​ പുണ്യമായാണ്​ കരുതുന്നത്​. പുറമെനിന്ന്​ നോക്കുന്നവർ കർഷകർക്ക്​ അവിടെ സുഖമാണെന്നും അവർ ആഘോഷിക്കുകയാണെന്നുമാണ്​ കരുതുന്നത്​. എന്നാൽ അവർ അവ​ിടെ ദൈനംദിന ആവശ്യങ്ങൾക്കും പോലും കഷ്​ടപ്പെടുകയാണെന്നും ഡോക്​ടർമാർ പറയുന്നു.