'സമരം നടത്തുന്ന കർഷകർ ജോലിയില്ലാത്ത മദ്യപാനികൾ'- വിവാദ പ്രസ്​താവനയുമായി ബി.ജെ.പി എം.പി; കർഷകർ കാർ തകർത്തു

ഹിസാർ: സമരം നടത്തുന്ന കർഷകർ ജോലിയില്ലാത്ത മദ്യപാനികളാണെന്ന വിവാദ പരാമർശം നടത്തിയ ബി.ജെ.പി എം.പിക്കെതിരെ പ്രതിഷേധം വ്യാപകം. ബി.ജെ.പി രാജ്യസഭാംഗം രാം ചന്ദർ ജ​​​​​ംഗ്രക്കെതിരെയാണ്​ കർഷക രോഷം അണപൊട്ടിയത്​. ഹരിയാനയിലെ ഹിസാർ ജില്ലയിൽ സത്രം ഉദ്ഘാടനം ചെയ്യാനെത്തിയ എം.പിയുടെ കാർ കർഷകർ തകർത്തു. സംഭവവുമായി ബന്ധ​പ്പെട്ട്​ പ്രതിഷേധത്തിന്​ നേതൃത്വം നൽകിയ കർഷകരെ പൊലീസ്​ അറസ്റ്റ്​ ചെയ്​തു. കൃത്യമായ കൊലപാതകശ്രമമാണ് തനിക്കെതിരെ നടന്നതെന്ന് എം.പി പ്രതികരിച്ചു.

എം.പി ഉദ്ഘാടനം ചെയ്യേണ്ട സത്രത്തിലേക്കുള്ള വഴിയിൽ കർഷകർ തടിച്ചുകൂടി നിൽക്കുകയായിരുന്നു. അനിഷ്​ട സംഭവങ്ങളൊഴിവാക്കാൻ വൻ പൊലീസ്​ സന്നാഹം ഒരുക്കിയിരുന്നെങ്കിലും ആൾകൂട്ടത്തെ നിയന്ത്രിക്കാൻ കഴിഞ്ഞില്ല. കർഷകർ എം.പിയുടെ വാഹനത്തിനു നേരെ കരി​ങ്കൊടി കാണിക്കുകയും മുദ്രാവാക്യം വിളിക്കുകയും ചെയ്തു. സംഘർഷത്തിൽ എം.പിയുടെ കാറിന്‍റെ മുൻവശത്തെ ചില്ല്​ തകർന്നു. സംഭവസ്​ഥലത്ത്​ തടിച്ചുകൂടിയ എം.പിയുടെ അനുയായികൾ കർഷകർക്കെതിരെയും മുദ്രാവാക്യം മുഴക്കി.

ഹരിയാന ഡി.ജി.പിയോടും എസ്.പിയോടും സംസാരിച്ചെന്നും കുറ്റം ചെയ്തവർക്ക് കടുത്ത ശിക്ഷ നൽകാൻ ആവശ്യപ്പെട്ടിട്ടുണ്ടെന്നും എം.പി മാധ്യമങ്ങളോട് പ്രതികരിച്ചു. കഴിഞ്ഞദിവസം റോത്തക്കിലെ ഒരു ഗോശാലയിൽനടന്ന ദീപാവലി ചടങ്ങിൽ പ​ങ്കെടുക്കാനെത്തിയപ്പോഴും രാം ചന്ദർ ജ​​​​​ംഗ്രക്കെതിരെ കർഷകർ കടുത്ത പ്രതിഷേധമൊരുക്കിയിരുന്നു.