തോൽക്കാതെ, പിന്മാറാതെ കർഷകർ; ഡൽഹിയിലെ കർഷകസമരം നൂറാം നാളിലേക്ക്​

ന്യൂഡൽഹി: രാജ്യതലസ്ഥാനത്തെ ഇളക്കിമറിച്ചും സ്​തംഭിപ്പിച്ചും കർഷകർ തുടരുന്ന പ്രക്ഷോഭം നൂറാം നാളിലേക്ക്​. 100 ദിനത്തിനുള്ളിൽ 108 കർഷകരാണ്​​ സമരഭൂമിയിൽ മരണപ്പെട്ടത്​​. മോദിസർക്കാർ പാസാക്കിയ മൂന്ന് പുതിയ കർഷകനിയമങ്ങൾക്കെതിരെ​ 2020 നവംബര്‍ 27 നാണ്​ കർഷകർ ഡൽഹിയിൽ​ സമരം ആരംഭിച്ചത്​​. അടിച്ചമർത്താൻ ഭരണകൂടം അതിന്‍റെ എല്ലാവിധ ആയുധങ്ങളും ഉപയോഗിച്ചെങ്കിലും കർഷകർ പിന്മാറിയില്ല. ഡിസംബർ 20, ഡൽഹിയുടെ മണ്ണിലും വിണ്ണിലും ഈ സീസണിലെ ഏറ്റവും കൂടിയ തണുപ്പ്​ (3.4 ഡിഗ്രി സെൽഷ്യസ്​) രേഖപ്പെടുത്തിയപ്പോഴും, കർഷകർ പിന്തിരിഞ്ഞില്ല.

സ്​ത്രീകളും കുട്ടികളും പ്രായമായവരുമൊക്കെ കൊടുംതണുപ്പിനെ വകവെക്കാതെ സമരഭൂമിയായ രാജ്യതലസ്ഥാന​​ത്തേക്ക് ​ഒഴുകുകയായിരുന്നു. പഞ്ചാബിൽ നിന്നും ഹരിയാനയിൽ നിന്നും കുട്ടികളെയ​ുമെടുത്ത്​ ഡൽഹിയിലേക്ക്​ നടന്നുവന്ന സ്​ത്രീകൾ സമരത്തിന്​ കരുത്തു പകർന്നു. കൊടും തണുപ്പിൽ അവർ ദേശീയ പാതയോരത്തെ ടെന്‍റുകളിലും ട്രാക്​റ്ററുകളിലുമിരുന്ന്​ ഉറക്കെ മുദ്രാവാക്യം വിളിച്ചു. തെരുവിൽ പൊലീസിനും സേനക്കുമെതിരെ പോരിനിറങ്ങിയപ്പോൾ ഭരണകൂടം പലപ്പോഴും പതറി. യു.പിയിലും ഹരിയാനയിലും സംഘടിപ്പിക്കപ്പെട്ട മഹാപഞ്ചായത്തുകളിൽ പതിനായിരങ്ങൾ അണിനിരന്നതോടെ സംസ്ഥാന സർക്കാറുകൾക്കും കർഷകസമരം കടുത്തവെല്ലുവിളി ഉയർത്തി​.

സമരം ആ​ഗോള തലത്തിൽ ചർച്ചചെയ്യപ്പെട്ടതും,​ ലോകത്തിന്‍റെ വിവിധ ഭാഗങ്ങളിൽ നിന്ന്​ ഐക്യദാർഢ്യം ഉയർന്നതും കേന്ദ്ര സർക്കാറിനെ പ്രതിരോധത്തിലാക്കുകയും ചെയ്​തു.അണുമണിത്തൂക്കം പിൻമാറില്ലെന്ന കർഷകരുടെ ഉറച്ച നിലപാടിൽ ആ ചർച്ചകളൊക്കെയും പരാജയപ്പെടുകയായിരുന്നു. സർക്കാരുമായി ഇപ്പോഴും ചർച്ചയ്‌ക്ക്‌ ഒരുക്കമാണെന്ന നിലപാടിലാണ്​ കർഷകസംഘടനകൾ. എന്നാൽ, പുതിയ നിർദേശം മുന്നോട്ടുവയ്‌ക്കണം. മൂന്ന്‌ നിയമവും പിൻവലിക്കുംവരെ കർഷകസമരം തുടരാനാണ്​ തീരുമാനം.

നൂറ്​ദിവസം പിന്നിടുന്ന സാഹചര്യത്തിൽ ​സമരം കൂടുതൽ ശക്​തമാക്കാനാണ്​ കർഷകസംഘടനകളുടെ തീരുമാനം. നിയമസഭാ തെരഞ്ഞെടുപ്പ്​ നടക്കുന്ന പശ്ചാത്തലത്തിൽ കർഷസമരം എൻ.ഡി.എക്കെതിരെ സംസ്ഥാനങ്ങളിൽ പ്രചരണായ​ുധമാക്കാനും ആലോചനയ​ുണ്ട്​.

സോഷ്യൽ മീഡിയയിലും സർക്കാർ അനുകൂല മാധ്യമങ്ങളെയും ഉപയോഗിച്ച്​ കർഷകസമരത്തിനെതിരെ വ്യജവാർത്ത സൃഷ്​ടിക്കാനുള്ള ശ്രമങ്ങളും പൊളിയുന്ന കാഴ്ചയായിരുന്നു ഈ സമരത്തിന്‍റെ മറ്റൊരു നേട്ടം. വ്യാജവാർത്തകൾ പടച്ചുവിട്ട മാധ്യമങ്ങൾക്ക്​ പലപ്പോഴും വാർത്തകൾ പിൻവലിക്കേണ്ടി വന്നു. റിപ്പബ്ലിക് ദിനത്തിലെ സംഘര്‍ഷങ്ങളെ വളച്ചൊടിക്കാനുള്ള ശ്രമങ്ങളും ഗ്രേറ്റ തുംബർഗിന്‍റെ ടൂൾകിറ്റ്​ വിവാദമൊന്നും നിലംതൊടാതെ പോയത്​ കർഷകസമരത്തിന്‍റെ കരുത്ത്​ കൊണ്ട്​ തന്നെയാണ്​. 100 ദിവസമായ നാളെ മനേസര്‍ എക്സ്പ്രസ്പാത ഉപരോധവും എട്ടിന് മഹിള മഹാപഞ്ചായത്തും നടത്താനുമാണ്​ പദ്ധതി.