എം.എസ്​.പി ഉറപ്പാക്കുന്നതുവരെ മണ്ഡികളിൽ കർഷകരെ ചൂഷണം ചെയ്യുന്നത്​ തുടരും -വരുൺ ഗാന്ധി

ന്യൂഡൽഹി: കർഷകരെ പിന്തുണച്ചും കേന്ദ്രസർക്കാറിനെ വിമർ​ശിച്ചും വീണ്ടും ബി.ജെ.പി എം.പി വരുൺ ഗാന്ധി. വിളകൾക്ക്​ അടിസ്​ഥാന താങ്ങുവില ലഭ്യമാക്കുമെന്ന നിയമപരമായ ഉറപ്പ്​ ലഭിക്കുന്നതുവരെ മണ്ഡി(ചെറുചന്ത)കളിൽ കർഷകരെ ചൂഷണം തുടരുമെന്നായിരുന്നു വരുൺ ഗാന്ധിയുടെ പ്രതികരണം.

'അടിസ്​ഥാന താങ്ങുവിലയിൽ നിയമപരമായ ഉറപ്പ്​ ലഭിക്കുന്നതുവരെ മണ്ഡികളിൽ കർഷ​കരെ ചൂഷണം ചെയ്യുന്നത്​ തുടരും. ഇതിനെതിരെ കർശന നടപടി സ്വീകരിക്കണം' -വരുൺ ഗാന്ധി ട്വീറ്റ്​ ചെയ്​തു.

കർഷകരുടെ ​പ്രശ്​നങ്ങളുമായി ബന്ധപ്പെട്ട്​ കേന്ദ്രസർക്കാറിനെ നിരന്തരം വിമ​ർശിക്കുന്ന വ്യക്തിയാണ്​ വരുൺ ഗാന്ധി. കർഷകരുടെ പ്രശ്​നങ്ങൾ കൈകാര്യം ചെയ്യുന്നതിൽ കേന്ദ്രസർക്കാർ പരാജയമാണെന്ന്​ ചൂണ്ടിക്കാട്ടി ദിവസങ്ങൾക്ക്​ മുമ്പ്​ ഒരു വിഡിയോ വരുൺ ഗാന്ധി ട്വീറ്റ്​ ചെയ്​തിരുന്നു. വിളകൾക്ക്​ ന്യായമായ വില ലഭിക്കാത്തതിനെ തുടർന്ന്​ ഒരു കർഷകൻ വയലിൽ വിളകൾ കത്തിക്കുന്ന വിഡിയോ പങ്കുവെച്ചായിരുന്നു ട്വീറ്റ്​.

കർഷക പ്രക്ഷോഭവുമായി ബന്ധപ്പെട്ട്​ ബി.ജെ.പിയിൽ നിന്നുതന്നെ വിമർശനങ്ങൾ ഉന്നയിക്കുന്ന സാഹചര്യത്തിൽ വരുൺ ഗാന്ധിയെയും മാതാവ്​ മനേക ഗാന്ധിയെയും ബി.ജെ.പി ദേശീയ നിർവാഹക സമിതിയിൽനിന്ന്​ പുറത്താക്കിയിരുന്നു. ഉത്തർപ്രദേശ്​ ലഖിംപൂർ​ ഖേരിയിലെ കർഷക കൊലയിൽ വരുൺ ഗാന്ധിയും ​മനേക ഗാന്ധിയും സ്വീകരിച്ച നിലപാടായിരുന്നു ബി.ജെ.പിയെ ചൊടിപ്പിച്ചത്​.