അസം പൗരത്വപട്ടിക നാളെ; ആശങ്കയിൽ 41 ലക്ഷം പേർ

ന്യൂഡൽഹി: അസമിലെ അന്തിമ പൗരത്വ പട്ടിക നാളെ പ്രസിദ്ധീകരിക്കാനിരിക്കെ 41 ലക്ഷം പേർ ആശങ്കയിൽ. ശനിയാഴ്​ച രാവിലെ 10 മ ണിക്ക്​ ഓൺലൈനായാവും പട്ടിക പ്രസിദ്ധീകരിക്കുക. ഏകദേശം ഒരു വർഷത്തെ പ്രവർത്തനങ്ങൾക്കൊടുവിലാണ്​ അന്തിമ പൗരത്വ പട്ടികക്ക്​ രൂപം നൽകിയത്​​. അസമിൽ പൗരത്വ പട്ടിക പ്രസിദ്ധീകരിക്കുമെന്നത്​​ നരേന്ദ്രമോദിയുടെ പ്രഖ്യാപിത ലക് ഷ്യങ്ങളിലൊന്നായിരുന്നു.

പട്ടികയിൽ നിന്ന്​ പുറത്തായവരെ ഉടൻ വിദേശികളായി പ്രഖ്യാപിക്കില്ലെന്ന്​ കേന്ദ്രസർക്കാർ വ്യക്​തമാക്കിയിട്ടുണ്ട്​. പട്ടികയിൽ നിന്ന്​ പുറത്തായവർക്ക്​ വിദേശികൾക്കായുള്ള ട്രിബ്യുണിൽ അപ്പീൽ സമർപ്പിക്കാമെന്നും അധികൃതർ അറിയിച്ചു. ഇതുമായി ബന്ധപ്പെട്ട പരാതികൾ പരിഹരിക്കുന്നതിനായി 1000 ട്രിബ്യൂണലുകൾ സ്ഥാപിക്കുമെന്ന്​ ആഭ്യന്തര മന്ത്രാലയം വ്യക്​തമാക്കി.

1951ലാണ്​ അസമിൽ ആദ്യമായി പൗരത്വ പട്ടിക പ്രസിദ്ധീകരിച്ചത്​. 1971ൽ ബംഗ്ലാദേശ്​ രൂപീകരണത്തിന്​ ശേഷം​ അസമിലേക്ക്​ കുടിയേറിയവരെ കണ്ടെത്തുന്നതിനായി പട്ടിക പുനഃപ്രസിദ്ധീകരിക്കാൻ സുപ്രീംകോടതി നിർദേശിച്ചിരുന്നു.

പൗരത്വ പട്ടിക പ്രസിദ്ധീകരിക്കുന്നതിന്​ മുന്നോടിയായി വടക്കു-കിഴക്കൻ സംസ്ഥാനങ്ങളിൽ സുരക്ഷ ശക്​തമാക്കി. 20,000 അർധ സൈനികരെ അസമിൽ അധികമായി വിന്യസിച്ചിട്ടുണ്ട്​.