ആർ.എസ്​.എസിനും മോഹൻ ഭാഗവതിനുമെതിരെ പ്രസംഗിച്ച കർഷക നേതാവിന്​ കേസ്​

ന്യൂഡൽഹി: ആർ.എസ്​.എസിനും തലവൻ മോഹൻ ഭാഗവതിനുമെതിരെ പ്രസംഗിച്ച കർഷക നേതാവിനെതിരെ ​കേസെടുത്ത്​ മധ്യപ്രദേശ്​ പൊലീസ്​. മഹാരാഷ്​ട്രയിലെ കർഷക നേതാവ്​ അരുൺ ബങ്കറിനെതിരെയാണ്​ ബേട്ടുൽ പൊലീസ്​ കേസെടുത്തത്​.

സെക്ഷൻ 505, 506 തുടങ്ങിയ ​ക്രിമിനൽ വകുപ്പുകൾ പ്രകാരമാണ്​ കേസ്​​. ബി.ജെ.പി ബേട്ടുൽ ജില്ല പ്രസിഡന്‍റ്​ ആദിത്യ ബബ്​ല ശുക്ലയുടെ പരാതിയിലാണ്​ നടപടി. സംഭവത്തിൽ ആരെയും ഇതുവരെ അറസ്റ്റ്​ ചെയ്​തിട്ടില്ല.

നാഗ്​പൂരിൽനിന്ന്​ ഡൽഹിയിലേക്ക്​ നടത്തിയ കർഷക റാലിക്കി​െട പ്രക്ഷോഭത്തിനിടെ ജീവൻ നഷ്​ടമായ കർഷകർക്ക്​ ആദരാജ്ഞലി അർപ്പിക്കുകയും അരുൺ ബങ്കർ കർഷകരെ അഭിസംബോധന ചെയ്​ത്​ സംസാരിക്കുകയും ചെയ്​തിരുന്നു. ഇതിനിടെ മോദിയെയും ആർ.എസി.എസിനെയും അരുൺ വിമർശിച്ചു.

കർഷകർക്ക്​ നേരെ മോദി വെടിയുണ്ടകൾ പ്രയോഗിക്കുകയാണെങ്കിൽ നാഗ്​പൂരിലെ ആർ.എസ്​.എസ്​ മന്ദിരവും ആർ.എസ്​.എസ്​.എസ്​ തലവനെയും തകർക്കുമെന്നായിരുന്നു അരുണിന്‍റെ പരാമർശം. ഈ പരാമർശമാണ്​ കേസിന്​ അടിസ്​ഥാനം.

പൊതുജനങ്ങളെ കൈയിലെടുത്ത്​ സമൂഹത്തിലെ ഐക്യവും സമാധാനവും തകർക്കാനാണ്​ അരുൺ ബങ്കറിന്‍റെ ശ്രമമെന്നും പൊലീസ്​ ഉടൻ അരുണിനെ അറസ്റ്റ്​ ചെയ്യണമെന്നും ആദിത്യയുടെ പരാതിയിൽ പറയുന്നു. അതേസമയം, കേസിൽ അന്വേഷണം പുരോഗമിക്കുകയാണെന്ന്​ പൊലീസ്​ അറിയിച്ചു.