ശിരോവസ്ത്ര വിരുദ്ധ സമരക്കാർക്കെതിരായ പരാമർശം; മാധ്യമപ്രവർത്തക റാണ അയ്യൂബിനെതിരെ കേസ്​

ബംഗളൂരു: മാധ്യമപ്രവർത്തക റാണ അയ്യൂബിനെതിരെ ധാർവാഡ്​ വിദ്യാഗിരി പൊലീസ്​ കേസ്​ രജിസ്​റ്റർ ചെയ്തു. ബി.ബി.സിക്ക്​ നൽകിയ ടെലിവിഷൻ അഭിമുഖത്തിൽ കർണാടകയിലെ ശിരോവസ്ത്ര വിരുദ്ധ സമരക്കാരെ ഹിന്ദു തീവ്രവാദികളെന്ന്​ വിശേഷിപ്പിച്ചതിനാണ്​ കേസ്​.

ഹുബ്ബള്ളിയിലെ ഹിന്ദു ഐ.ടി സെൽ പ്രതിനിധി അശ്വത്​ നൽകിയ പരാതിയിൽ ഐ.പി.സി 295 എ വകുപ്പ്​ ചേർത്താണ്​ ധാർവാഡ്​ പൊലീസ്​ കേസ്​ രജിസ്റ്റർ ചെയ്തത്​.

'ഈ പെൺകുട്ടികൾ ഏറെക്കാലമായി ശിരോവസ്ത്രം ധരിക്കുന്നു. എന്തുകൊണ്ടാണ്​ പെട്ടെന്ന്​ ഒരു കൂട്ടം വിദ്യാർഥികൾ, ചെറുപ്പക്കാരായ തീവ്രവാദികൾ ഇപ്പോൾ ഇതിനെതിരെ രംഗത്തുവരുന്നത്​? കർണാടകയിൽ വിദ്യാലയ വളപ്പിൽ ആരാണ്​ കാവിക്കൊടി ഉയർത്തിയത്​? വിദ്യാഭ്യാസ സ്ഥാപനങ്ങളിൽ ആൺകുട്ടികൾ എന്തുകൊണ്ടാണ്​ കാവി ഷാൾ അണിയുന്നത്​? അതുകൊണ്ട്​ എന്താണ്​ ഉദ്ദേശിക്കുന്നത്​?' - ഇതായിരുന്നു റാണ അയ്യൂബ്​ അഭിമുഖത്തിൽ ചോദിച്ചത്​.

ഇതേ പ്രസ്താവനയുടെ പേരിൽ ഹിന്ദു ഐ.ടി സെൽ റാണക്കെതിരെ അഞ്ചു​ പരാതികൾ വിവിധയിടങ്ങളിലായി നൽകിയിട്ടുണ്ട്​. 'കർണാടകയിലെ ശിരോവസ്ത്ര നിരോധനത്തിനെതിരായ എന്‍റെ അഭിമുഖത്തിന്‍റെ പേരിൽ കർണാടകയിൽ എനിക്കെതിരെ മറ്റൊരു കേസ്​ കൂടി ചാർജ്​ ചെയ്തിരിക്കുന്നു. ഹിന്ദു വികാരത്തെ വ്രണപ്പെടുത്തിയെന്ന പേരിൽ അതേ ഹിന്ദുത്വ വലതുപക്ഷ സംഘമാണ്​ പരാതി നൽകിയിരിക്കുന്നത്​. സത്യം പറയുന്നതിൽനിന്ന്​ ഇതുകൊണ്ടെന്നും എന്നെ തടയാനാവില്ല.' -റാണ അയ്യൂബ്​ ട്വീറ്റിലൂടെ പ്രതികരിച്ചു.