ഡൽഹിയിൽ ദീപാവലി​പടക്കങ്ങൾക്ക്​ സുപ്രീംകോടതി വിലക്ക്​

ന്യൂഡൽഹി: തലസ്ഥാന നഗരമായ ഡൽഹിയിലും സമീപ നഗരങ്ങളിലും ദീപാവലി ആഘോഷത്തിന്​ പടക്കങ്ങൾ വിൽക്കുന്നത്​​ സുപ്രീംകോടതി നിരോധിച്ചു. നവംബർ ഒന്നുവരെ രാജ്യ തലസ്ഥാന മേഖലയിൽ പടക്കങ്ങളോ കരിമരുന്ന്​ പ്രയോഗങ്ങ​ളോ പാടില്ലെന്ന്​ സുപ്രീംകോടതി ഉത്തരവിട്ടു. തലസ്ഥാനത്തെ വായുമലിനീകരണം തടയുന്നതിനാണ്​ പടക്കങ്ങൾക്ക്​ നിരോധനം ഏർപ്പെടുത്തിയിരിക്കുന്നത്​. 

പടക്കങ്ങൾ വിൽക്കുന്നതിന്​ 2016 നവംബറിൽ ഏർപ്പെടുത്തിയ വിലക്ക്​ സെപ്​തംബറിൽ​ കോടതി പിൻവലിച്ചിരുന്നു​. എന്നാൽ പുതിയ ഉത്തരവ്​ പ്രകാരം നവംബർ ഒന്നു വരെ വിലക്ക്​ തുടരും. 

കഴിഞ്ഞ വർഷം ദീപാവലി ആഘോഷങ്ങളെ തുടർന്ന്​ ഡൽഹിയിൽ കനത്ത പുകമഞ്ഞ്​ രൂപപ്പെടുകയും വിമാനസർവീസ്​ ഉൾപ്പെടെയുള്ള ഗതാഗതം സ്തംഭിക്കുകയും ചെയ്​തിരുന്നു. പടക്കങ്ങൾക്ക്​ നിരോധനം ഏർപ്പെടുത്തണമെന്നാവശ്യപ്പെട്ട ഹരജിയിൽ കേന്ദ്ര മലിനീകരണ നിയന്ത്രണ ബോർഡും കക്ഷി ചേർന്നിരുന്നു.