യു.എസ് ഉപരോധം പ്രഖ്യാപിച്ച കമ്പനികൾ നിയമലംഘനം നടത്തിയിട്ടില്ല; വിദേശകാര്യ മന്ത്രാലയം

ന്യൂഡൽഹി: ദിവസങ്ങൾക്ക് മുമ്പാണ് റഷ്യക്ക് യുദ്ധസഹായം നൽകിയെന്നാരോപിച്ച് 19 ഇന്ത്യൻ കമ്പനികളെയും രണ്ട് പൗരൻമാരെയും യു.എസ് ഉപരോധപട്ടികയിൽ ഉൾപ്പെടുത്തിയത്. എന്നാൽ ഈ സ്വകാര്യകമ്പനികളിൽ ഒന്നുപോലും നിയമം ലംഘിച്ചിട്ടില്ലെന്നും കാര്യങ്ങൾ യു.എസിനെ ബോധ്യപ്പെടുത്തുമെന്നും വിദേശകാര്യ മന്ത്രാലയം വ്യക്തമാക്കി. അന്താരാഷ്ട്ര വ്യാപാരത്തിനും വ്യാപാര നിയന്ത്രണങ്ങളിലും ഇന്ത്യക്ക് ശക്തമായ നിയമചട്ടക്കൂടുകളുണ്ട്. അതിലൊന്നുപോലും ഈ കമ്പനികൾ ലംഘിച്ചിട്ടില്ല. ഇക്കാര്യങ്ങൾ യു.എസിനെ ബോധ്യപ്പെടുത്തുമെന്നും വിദേശകാര്യ മന്ത്രാലയ വക്താവ് രൺധീർ ജെയ്സ്വാൾ മാധ്യമങ്ങളോട് പറഞ്ഞു.

ഖലിസ്ഥാൻ നേതാവ് ഗുർപത്‍വന്ത് സിങ് പന്നൂണിന്റെ വധവുമായി ബന്ധപ്പെട്ട് ഇന്ത്യയുമായുള്ള ബന്ധം ഉലഞ്ഞ സാഹചര്യത്തിലാണ് 19 കമ്പനികളെയും രണ്ടു പൗരൻമാരെയും യു.എസ് ഉപരോധപട്ടികയിൽ പെടുത്തിയത്.

ഈ സ്ഥാപനങ്ങൾ യുക്രെയ്നെതിരെ യുദ്ധം ചെയ്യാൻ അവശ്യമായ സാ​ങ്കേതിക വിദ്യയും സാധനങ്ങളും റഷ്യക്ക് നൽകിയെന്നാണ് യു.എസ് ആരോപിക്കുന്നത്.

റഷ്യക്ക് സഹായം നൽകിയെന്നാരോപിച്ച് ആഗോളതലത്തിൽ 400 സ്ഥാപനങ്ങളെയും വ്യക്തികളെയും യു.എസ് ഉപരോധപ്പട്ടികയിൽ പെടുത്തിയിട്ടുണ്ട്. അതിന്റെ ഭാഗമായാണ് ഇന്ത്യൻ സ്ഥാപനങ്ങൾക്കെതിരെയും നടപടി സ്വീകരിച്ചിട്ടുള്ളത്.

''യു​ക്രെയ്നിൽ റഷ്യ നടത്തുന്ന അനധികൃത സൈനിക നടപടിയുടെ ഭാഗമായ 400 സ്ഥാപനങ്ങൾക്കും വ്യക്തികൾക്കും ഉപരോധമേർപ്പെടുത്താൻ തീരുമാനിച്ചിരിക്കുകയാണ്. ഈ നടപടിയുടെ ഭാഗമായി 120ലേറെ വ്യക്തികൾക്കും സ്ഥാപനങ്ങൾക്കുമാണ് യു.എസ് സ്റ്റേറ്റ് ഡിപാർട്മെന്റ് ഉപരോധമേർപ്പെടുത്തുന്നത്. അതോടൊപ്പം തന്നെ 270 ലേറെ വ്യക്തികൾക്കും സ്ഥാപനങ്ങൾക്കും യു.എസ് ട്രഷറി വകുപ്പും ഉപരോധമേർപ്പെടുത്തുകയാണ്. എന്റിറ്റി ലിസ്റ്റിലുള്ള 40 സ്ഥാപനങ്ങൾക്ക് യു.എസ് വാണിജ്യ വകുപ്പും ഉപരോധം പ്രഖ്യാപിച്ചു.''-എന്നാണ് ഉപരോധം സംബന്ധിച്ച് യു.എസ് സ്റ്റേറ്റ് ഡിപാർട്മെന്റ് പുറത്തിറക്കിയ പ്രസ്താവന.

ഇന്ത്യക്കൊപ്പം ചൈന, മലേഷ്യ, തായ്‍ലൻഡ്, തുർക്കി, യു.എ.ഇ തുടങ്ങിയ രാജ്യങ്ങളിലെ പൗരൻമാരെയും സ്ഥാപനങ്ങളെയും യു.എസ് ലക്ഷ്യമിട്ടിട്ടുണ്ട്. റഷ്യക്ക് ആയുധങ്ങളിൽ ഉപയോഗിക്കുന്ന മൈക്രോ ഇലക്ട്രോണിക്സ് പോലുള്ള വസ്തുക്കൾ കൈമാറിയതിനാണ് പ്രധാനമായും കമ്പനികൾക്കെതിരെ നടപടി. റഷ്യക്ക് സൈനിക സഹായം ലഭിക്കുന്ന എല്ലാവഴികളും തടയുമെന്നാണ് യു.എസ് നയം.

അസന്റ് ഏവിയേഷൻ ഇന്ത്യ, മാസ്ക് ട്രാൻസ്, ടി.എസ്.എം.ഡി ഗ്ലോബൽ ആൻഡ് ഫുട്രേവോ,എസ്.ഐ2 മൈക്രോസിസ്റ്റംസ് എന്നിവയാണ് ഉപരോധപ്പട്ടികയിലുള്ള പ്രധാന ഇന്ത്യൻ കമ്പനികൾ. ഏതാണ്ട് 200,000ഡോളർ മൂല്യമുള്ള യു.എസ് നിർമിത എയർക്രാഫ്റ്റ് ഭാഗങ്ങൾ 2023 മാർച്ചിനും 2024 മാർച്ചിനും ഇടയിലായി അസന്റ് ഏവിയേഷൻ ഇന്ത്യ റഷ്യൻ കമ്പനികൾക്ക് കൈമാറിയെന്നാണ് ആരോപണം. 2023 ജൂണിനും 2024 ഏപ്രിലിനുമിടയിൽ 300,000 ഡോളറിന്റെ വ്യോമയാന ഘടകങ്ങൾ റഷ്യയുടെ എസ്7 എൻജിനീയറിങ് എൽ.എൽ.സിക്ക് നൽകിയെന്നാണ് മാസ്ക് ട്രാൻസിനെതിരായ കണ്ടെത്തൽ. മൈക്രോഇലക​്ട്രോണിക്സുകളും പ്രോസസറുകളും റഷ്യൻ കമ്പനികൾക്ക് നൽകിയെന്നാണ് ടി.എസ്.എം.ഡിക്കെതിരെ നടപടിക്ക് കാരണമായത്.

റഷ്യക്കെതിരായ ആഗോള ഉപരോധനിയമം ലംഘിക്കുന്നത് അന്താരാഷ്ട്രതലത്തിലുള്ള വാണിജ്യബന്ധത്തിന് വിഘാതമാകുമെന്ന് അടുത്തിടെ യു.എസ് അംബാസഡർ എറിക് ഗാർസെറ്റി ഇന്ത്യൻ കമ്പനികൾക്ക് മുന്നറിയിപ്പ് നൽകിയിരുന്നു. ''റഷ്യക്കെതിരായ അന്താരാഷ്ട്ര ഉപരോധം ലംഘിക്കുന്ന ഏതൊരു ഇന്ത്യൻ കമ്പനിയും ദൂരവ്യാപക അനന്തരഫലം അനുഭവിക്കേണ്ടി വരും''-എന്നായിരുന്നു മുന്നറിയിപ്പ്.