മുംബൈയിൽ ആദ്യ കോവിഡ്​ ഡെൽറ്റ പ്ലസ്​ മരണം

മുംബൈ: കോവിഡ്​ ഡെൽറ്റ പ്ലസ്​ വകഭേദം ബാധിച്ച്​ മുംബൈയിൽ ആദ്യ മരണം. ഗഡ്​കോപാർ സ്വദേശിനിയായ 63കാരിയാണ്​ ജൂലൈയിൽ മരിച്ചത്​. ഡെൽറ്റ പ്ലസ്​ വകഭേദം ബാധിച്ച്​ രണ്ടാമത്തെയാളാണ്​ മഹാരാഷ്​ട്രയിൽ മരണത്തിന്​ കീഴടങ്ങിയത്​. രത്​നഗിരിയിൽ നിന്നുള്ള 80 വയസുകാരിയാണ്​ സംസ്​ഥാനത്ത്​ ആദ്യമായി ഡെൽറ്റ പ്ലസ്​ വകഭേദം ബാധിച്ച്​ മരിച്ചത്​. ജൂലൈ 13നായിരുന്നു അത്​.

ആഗസ്റ്റ്​ 11നാണ്​ മുംബൈ സ്വദേശിനിയുടെ മരണം ഡെൽറ്റ പ്ലസ്​ മൂലമാണെന്ന്​ സ്​ഥിരീകരിച്ചത്​. ബൃഹാൻ മു​ംബൈ മുനിസിപൽ കോർപറേഷൻ അധികൃതരെ ആരോഗ്യ വകുപ്പാണ്​ ജീനോം സീക്വൻസിങ്​ വഴി നഗരത്തിലെ ഏഴുപേർക്ക്​ വകഭേദം പിടിപെട്ടതായി അറിയിച്ചത്​. അവരിൽ ഒരാളാണ്​ മരിച്ച സ്​ത്രീ.

മരിച്ച സ്​ത്രീയുമായി അടുത്ത്​ ഇടപഴകിയ രണ്ടുപേർക്കും ഡെൽറ്റ പ്ലസ്​ ബാധിച്ചിട്ടുണ്ട്​. ഇന്ത്യയിൽ രണ്ടാം തരംഗത്തിന്​ കാരണമായ ഡെൽറ്റ വകഭേദത്തിന്​ ജനിത വ്യതിയാനം സംഭവിച്ചാണ്​ ഡെൽറ്റ പ്ലസ്​ വകഭേദം രൂപപ്പെട്ടത്​. ബുധനാഴ്ച മാത്രം സംസ്​ഥാനത്ത്​ 20 ഡെൽറ്റ പ്ലസ്​ കേസുകളാണ്​ റിപ്പോർട്ട്​ ചെയ്​തത്​. ഏഴെണ്ണം മുംബൈ, ആറെണ്ണം വീതം പൂനെ, താനെ എന്നിവിടങ്ങളിൽ നിന്നാണ്​. 65 പേർക്കാണ്​ മഹാരാഷ്​ട്രയിൽ ഇതുവരെ ഡെൽറ്റ പ്ലസ്​ ബാധിച്ചത്​.