ചെന്നൈ വണ്ടലൂർ മൃഗശാലയിൽ അഞ്ച് ഒട്ടകപ്പക്ഷികളും ഒരു സിംഹവും ചത്തു

ചെന്നൈ: വണ്ടലൂർ മൃഗശാല എന്നറിയപ്പെടുന്ന അണ്ണാ സുവോളജിക്കൽ പാർക്കിലെ അഞ്ച് ഒട്ടകപ്പക്ഷികളും ഒരു പെൺസിംഹവും ചത്തു. രണ്ട്​ ദിവസത്തിനിടെയാണ്​ ഇവ കൂട്ടത്തോടെ ചത്തത്​. ഇതേ തുടർന്ന്​ മൃഗശാലയിലെ പക്ഷി- മൃഗാദികളുടെ നിരീക്ഷണം ഉൗർജിതപ്പെടുത്തി.

വാർദ്ധക്യ സഹജമായ അസുഖങ്ങളെ തുടർന്ന് അവശനിലയിലായിരുന്ന 19 വയസായ കവിത എന്ന സിംഹമാണ്​ വിടപറഞ്ഞത്​. വെറ്റിനറി ഡോക്​ടർമാർ പോസ്​​റ്റുമോർട്ടം ചെയ്​ത്​ സാമ്പിളുകൾ ശേഖരിച്ച്​ പരിശോധനകൾക്കായി അയച്ചു. വണ്ടല്ലൂർ മൃഗശാലയിൽ 180 ഇനങ്ങളിൽ പെട്ട 2400 ഓളം മൃഗങ്ങളുണ്ട്. ജൂണിൽ മൃഗശാലയിലെ രണ്ട്​ സിംഹങ്ങൾ കോവിഡ്​ ബാധിച്ച്​ ചത്തിരുന്നു. പിന്നീട്​ 11 സിംഹങ്ങളുടെ സാമ്പിളുകൾ കോവിഡ് പരിശോധനയ്ക്കായി അയച്ചതിൽ ഒമ്പതെണ്ണത്തിന്​ വൈറസ്​ ബാധ സ്ഥിരീകരിച്ചിരുന്നു.