ഒാടുന്ന കാറിൽ നിന്ന്​ യുവതികൾക്ക്​ നേരെ ആസിഡ്​ ആക്രമണം

കൊൽക്കത്ത: ചലിക്കുന്ന ടാക്​സിയിൽ നിന്നും യുവതികൾക്ക്​ നേരെ ആസിഡ്​ ആക്രമണം. നഗരത്തിലെ തെക്കൻ ഭാഗത്തെ പണ്ടിറ്റ്യ റോഡിന്​ സമീപത്തുവച്ചാണ്​ 20 വയസ്സുകാരികളെ അജ്ഞാത സംഘം ആക്രമിച്ചത്​. ഇന്നലെ രാത്രി 9:30യോടെയായിരുന്നു സംഭവം. റോഡിനരികിലൂടെ നടക്കുകയായിരുന്ന അഞ്ച്​ യുവതികളടക്കം ആറ്​ പേർക്ക്​​​ പൊള്ളലേറ്റു.

നാട്ടുകാരിൽ ചിലർ ടാക്​സിയെ പിന്തുടർന്നെങ്കിലും വണ്ടിയുപേക്ഷിച്ച്​ ഡ്രൈവറടക്കമുള്ള സംഘം കടന്നുകളയുകയായിരുന്നു. കൂട്ടത്തിലുണ്ടായിരുന്ന എല്ലാ പെൺകുട്ടികൾക്കും പരിക്കുണ്ടെന്നും, ഒരാളെ മാത്രം ലക്ഷ്യം വെച്ചായിരുന്നില്ല ആക്രമമെന്നും പൊലീസ്​ പറഞ്ഞു.

ഗുരുതരമല്ലാത്ത പരിക്കായതിനാൽ പ്രാഥമിക ശുശ്രൂഷ നൽകി പെൺകുട്ടികളെ വിട്ടയച്ചു. ആസിഡിൽ നിന്നേൽക്കുന്ന തരത്തിലല്ലാത്ത പൊള്ളലായതിനാൽ അക്രമികൾ ഉപയോഗിച്ച ദ്രാവകം പൊലീസ്​ ശേഖരിച്ച്​ ടെസ്റ്റിനയച്ചിട്ടുണ്ട്​.

ആക്രമികൾ സഞ്ചരിച്ച ടാക്​സി പിടിച്ചെടുത്തെന്നും രബീന്ദ്ര സരോവർ പൊലീസ്​ സ്​റ്റേഷനിൽ കേസ്​ രജിസ്​റ്റർ ചെയ്​ത്​ സാക്ഷികളടുടെയും ഇരകളുടെയും മൊഴികൾ എടുത്തുകൊണ്ടിരിക്കുകയാണെന്നും കൊൽക്കത്ത ഡെപ്യൂട്ടി കമീഷ്​ണർ മീരജ്​ ഖാലിദ്​ അറിയിച്ചു. പ്രതികളെ ഉടൻതന്നെ പിടികൂടുമെന്നും അദ്ദേഹം പറഞ്ഞു.

ലഭിച്ച ഒരു സാക്ഷിമൊഴി പ്രകാരം കാറിൽ നാലോ അഞ്ചോ പേർ ഉണ്ടായിരുന്നതായി വിവരം ലഭിച്ചിട്ടുണ്ട്​. സമീപ പ്രദേശങ്ങളിലുള്ള സി.സി.ടി.വി ദൃശ്യങ്ങൾ ആവശ്യപ്പെട്ടിട്ടുണ്ടെന്നും പൊലീസ്​ പറഞ്ഞു. ഡ്രൈവറായിരുന്ന റിക്കി മൊണ്ടൽ എന്നയാൾക്കായി വ്യാപകമായ തിരച്ചിൽ നടത്തി വരികയാണ്​. അയാളുടെ താമസസ്ഥലം കണ്ടെത്തിയെന്നും​ പൊലീസ്​ അറിയിച്ചു.