ആർ.ടി.പി.സി.ആർ നെഗറ്റീവായാലും കോവിഡ്​ ഉള്ളിലുണ്ടാകും; സി.ടി സ്​കാൻ കൂടി ചെയ്യണമെന്ന്​ ഗുജറാത്ത്​ ഡോക്​ടർമാർ

കോവിഡ്​ വൈറസിന്‍റെ വിവിധ വകഭേദങ്ങൾ വ്യാപകമാകുന്നതിനാൽ ആർ.ടി.പി.സി.ആർ പരിശോധന മാത്രം മതിയാകില്ലെന്ന്​ ഗുജറാത്തിലെ ഡോക്​ടർമാർ. ശ്വാസകോശത്തിൽ രോഗബാധ അവശേഷിക്കുന്നില്ലെന്ന്​ ഉറപ്പാക്കാൻ സി.ടി. സ്​കാൻ കൂടി വേണമെന്നാണ്​ ഡോക്​ടർമാർ പറയുന്നത്​. സി.ടി. സ്​കാനിൽ രോഗബാധയില്ലെന്ന്​ കണ്ടെത്തുന്നതുവരെ കോവിഡ്​ പോസിറ്റീവാണെന്ന നിലക്കുള്ള മുൻ കരുതൽ വേണമെന്ന്​ കാണിച്ച്​ വഡോദര മുൻസിപ്പൽ കോർപറേഷൻ അറിയിപ്പ്​ പുറപ്പെടുവിച്ചു.

ആർ.ടി.പി.സി.ആർ പരിശോധനയിൽ കോവിഡ് നെഗറ്റീവായ പലരുടെയും ശ്വാസകോശത്തിൽ രോഗ ബാധയുള്ളതായി ഹൈ റെസലൂഷൻ സി.ടി സ്കാനിൽ തെളിഞ്ഞിട്ടുണ്ടെന്നാണ്​ വഡോദര മുൻസിപ്പൽ കോർപറേഷൻ ചൂണ്ടികാണിക്കുന്നത്​.

ബ്രസീൽ, യു.കെ, ആഫ്രിക്ക തുടങ്ങിയിടങ്ങളിൽ നിന്നുള്ള കോവിഡ്​ വക ഭേദങ്ങളടക്കം ആർ.ടി.പി.സി.ആർ പരിശോധനയിലൂടെ കണ്ടെത്താമെന്ന്​ നേരത്തെ കേന്ദ്ര സർക്കാർ അറിയിപ്പുണ്ടായിരുന്നു. കോവിഡ്​ കണ്ടെത്തുന്നതിന്​ ആർ.ടി.പി.സി.ആർ പരിശോധന തീർത്തും കാര്യക്ഷമമാണെന്നാണ്​ സർക്കാർ അറിയിച്ചിരുന്നത്​.

കോവിഡ്​​ നെഗറ്റീവായ ശേഷം, പ്രത്യക്ഷമായ ലക്ഷണങ്ങ​െളാന്നും ഇല്ലാതെ തന്നെ ശ്വാസകോശത്തിൽ രോഗം വ്യാപിക്കുന്നതായി നിരവധി അനുഭവങ്ങളുണ്ടെന്ന്​ പകർച്ച രോഗ വിദഗ്​ദൻ ഡോ. ഹിദൻ കരേലിയ പറയുന്നു.

ആർ.ടി.പി.സി.ആർ പരിശോധനക്ക്​ 70 ശതമാനമാണ്​ കൃത്യതയെന്നും പരിശോധനഫലം തെറ്റാനുള്ള സാധ്യത 30 ശതമാനം അവശേഷിക്കുന്നുണ്ടെന്നും നന്ദ ഹോസ്​പിറ്റൽ എം.ഡി ഡോ. നീരജ്​ ചാവ്​ഡ പറയുന്നു. സി.ടി. സ്കാനിലൂടെ രോഗബാധയില്ലെന്ന്​ ഉറപ്പുവരു​ത്തണമെന്നും അദ്ദേഹം പറഞ്ഞു. ​