ഉമർ അബ്​ദുല്ല ‘ജനങ്ങളെ സ്വാധീനിക്കുന്നു’; മെഹബൂബ ‘ഭീകരവാദികളെ പ്രകീർത്തിച്ചു​’

ശ്രീനഗർ: ജമ്മുകശ്​മീർ മുൻ മുഖ്യമന്ത്രി ഉമർ അബ്​ദുല്ലക്കെതിരെ പൊതുസുരക്ഷാ നിയമം (പി.എസ്​.എ) ചുമത്തിയത് അദ്ദേഹ ത്തിന്​​ ജനങ്ങളെ സ്വാധീനിക്കാനുള്ള കഴിവു​ള്ളതിനാലെന്ന്​ സർക്കാർ. തീവ്രവാദികളുടെ കർശന നിർ​േദശങ്ങളെ അവഗണിച്ച്​ ജനങ്ങളെ പോളിങ്​ ബൂത്തിൽ എത്തിക്കുന്നതിൽ പ്രതിഫലിക്കുന്നത്​ ഉമർ അബ്​ദുല്ലയുടെ മൗലിക പ്രവർത്തനങ്ങളും ജനങ്ങളെ സ്വാധീനിക്കാനുള്ള കഴിവുമാണെന്നും അദ്ദേഹം കേന്ദ്ര സർക്കാറിനെതിരെ പൊതുജനത്തെ ഇളക്കി വിടു​ന്നുവെന്നും പൊലീസ്​ റിപ്പോർട്ടിൽ ആരോപിക്കുന്നു. ഉമർ അബ്​ദുല്ലയുടെ തടവ് പൊതുസുരക്ഷാ നിയമ പ്രകാരം​ മൂന്ന്​ മാസം കൂടി ദീർഘിപ്പിക്കുന്നതിനുള്ള കാരണമായാണ്​ പൊലീസ്​ റിപ്പോർട്ടിൽ ഇക്കാര്യങ്ങൾ പറയുന്നത്​.

മെഹബൂബ മുഫ്​തിയെ ‘പിതാവിൻെറ മകൾ’ എന്നാണ്​ റിപ്പോർട്ടിൽ പരാമർശിച്ചിരിക്കുന്നത്​. ‘ഭീകരവാദികളെ മരണശേഷം പ്രകീർത്തിച്ചു’ എന്നതാണ്​ മെഹബൂബ മുഫ്​തിക്കെതിരായി ചുമത്തിയ കുറ്റം. കൂടാതെ ആർട്ടിക്കിൾ 35എ റദ്ദാക്കിയത്​ ഭീകരാവസ്ഥ കത്തിപ്പടരുന്നതിലേക്ക്​ കാരണമാകുമെന്ന്​ പൊതുറാലിയിൽ പ്രഖ്യാപിച്ചെന്നും റിപ്പോർട്ടിൽ ആരോപിക്കുന്നു. നിലവിൽ ഉമർ അബ്​ദുല്ല ഹരി നിവാസിലും മെഹബൂബ മുഫ്​തി ശ്രീനഗറിലെ അതിഥി മന്ദിരത്തിലും തടവിലാണ്​.

കരുതൽ തടങ്കലിൽ ആറുമാസം പൂർത്തിയാക്കാൻ മണിക്കൂറുകൾ ബാക്കിനിൽക്കേയാണ്​ കശ്​മീർ മുൻ മുഖ്യമന്ത്രിമാരായ ഫാ​റൂ​ഖ്​ അ​ബ്​​ദു​ല്ല, ഉമർ അബ്​ദുല്ല, മഹ്​ബൂബ മുഫ്​തി എന്നിവർക്കെതിരെ പൊതുസുരക്ഷ നിയമപ്രകാരം (പി.എസ്​.എ) കേസെടുത്തത്​. മജിസ്​ട്രേറ്റും പൊലീസ്​ ഉദ്യോഗസ്​ഥനും ‘ഹരി നിവാസി’ലെത്തി വാറണ്ട്​ ഉമറിന്​ കൈമാറുകയായിരുന്നു.

നാഷനൽ കോൺഫറൻസ്​ ജനറൽ സെക്രട്ടറി അലി മുഹമ്മദ്​ സാഗർ, പി.ഡി.പി നേതാക്കളായ​ സാ​റ മ​ദ​നി, ന​ഈം അ​ക്​​ത​ർ തുടങ്ങിയവർക്കെതിരെയും കേസെടുത്തിരുന്നു​. എല്ലാവരും ആഗസ്​റ്റ്​ അഞ്ചുമുതൽ വീട്ടുതടങ്കലിലാണ്​.