മുൻ എം.എൽ.എയും കോൺഗ്രസ്​ നേതാവി​െൻറ ഭാര്യയുമായ ശിഖ മിത്ര വീണ്ടും തൃണമൂലിൽ ചേർന്നു

കൊൽക്കത്ത: പശ്ചിമബംഗാളിലെ മുൻ എം.എൽ.എയും അന്തരിച്ച സംസ്​ഥാന കോൺഗ്രസ്​ അധ്യക്ഷൻ സോമൻ മിത്രയുടെ ഭാര്യയു​മായ ശിഖ മിത്ര വീണ്ടും തൃണമൂൽ കോൺഗ്രസിൽ ചേർന്നു. താൻ ഒരു ഘട്ടത്തിലും തൃണമൂൽ വിട്ട്​ പോയിട്ടില്ലെന്നായിരുന്നു ശിഖയുടെ പ്രതികരണം.

'ഞാൻ തിങ്കളാഴ്​ച തൃണമൂലിൽ ചേരും. ഒരു രാഷ്​ട്രീയ വേദിയില്ലാതെ ജനങ്ങളുടെ ക്ഷേമത്തിനായി വലിയ കാര്യങ്ങൾ ചെയ്യാൻ കഴിയില്ലെന്ന്​ അനുഭവങ്ങൾ തെളിയിച്ചതോടെയാണ്​ വീണ്ടും പാർട്ടിയിൽ ചേരാൻ തീരുമാനിച്ചത്​' -ശിഖ മിത്ര പറഞ്ഞു.

2014ൽ അഭിപ്രായ വ്യത്യാസങ്ങളെ തുടർന്ന്​ ​ശിഖ മിത്ര ചൗരംഗീയിലെ തൃണമൂൽ എം.എൽ.എ സ്​ഥാനം രാജിവെച്ചിരുന്നു. എന്നാൽ, താൻ പാർട്ടിയിൽനിന്ന്​ പുറത്തുപോയിരുന്നില്ലെന്നായിരുന്നു ശിഖയുടെ വാദം.

'ഞാൻ തൃണമൂൽ വിട്ടിട്ടില്ല. മറ്റൊരു പാർട്ടിയിലും ചേർന്നിട്ടില്ല. എങ്കിലും ഞാൻ വീണ്ടും പാർട്ടിയിൽ ചേരും, അവർ നാളെ എനിക്ക്​ പതാക നൽകും. തനിക്കൊപ്പം ചിലരും തൃണമൂൽ കോൺഗ്രസിൽ ചേരും' -ശിഖ പറഞ്ഞു. തൃണമൂലിൽ എന്ത്​ സ്​ഥാനമാകും വഹിക്കുകയെന്ന്​ വ്യക്തമല്ലെന്നും അവർ പറഞ്ഞു.

2021ലെ ബംഗാൾ തെരഞ്ഞെടുപ്പിൽ ബി.ജെ.പിയു​െട സ്​ഥാനാർഥി പട്ടികയിൽ ഇടം പിടിച്ചിരുന്നു. എന്നാൽ പിന്നീട്​ സമൂഹമാധ്യമങ്ങളിലൂടെ താൻ ബി.ജെ.പി സ്​ഥാനാർഥിയായി മത്സരിക്കുന്നില്ലെന്നും ത​െൻറ പേര്​ സമ്മതമില്ലാതെ ഉപയോഗിച്ചതാണെന്നും അവർ പറഞ്ഞിരുന്നു.