മുൻ രാഷ്​ട്രപതി ഗ്യാനി സെയിൽ സിങ്ങിന്‍റെ കൊച്ചുമകൻ ഇന്ദർജീത്​ സിങ്​ ബി.ജെ.പിയിൽ

ന്യൂഡൽഹി: മുൻ രാഷ്​ട്രപതി ഗ്യാനി സെയിൽ സിങ്ങിന്‍റെ കൊച്ചുമകൻ ഇന്ദർജീത്​ സിങ്​ ബി.ജെ.പിയിൽ ചേർന്നു. കേന്ദ്രമന്ത്രി ഹർദീപ്​ സിങ്​ പുരി പാർട്ടി അംഗത്വം കൈമാറി. കേന്ദ്രമന്ത്രിമാരായ ഗജേന്ദ്രസിങ്​ ഷെഖാവത്ത്​, മീനാക്ഷി ലേഖി എന്നിവർക്കൊപ്പം പാർട്ടി ആസ്​ഥാനത്തെത്തിയാണ്​ അദ്ദേഹം അംഗത്വമെടുത്തത്​.

സിക്ക്​ സമുദായത്തിലെ രാംഗരിയ വിഭാഗത്തിൽ പെട്ട ചിലരും ഇന്ദർജീതിനൊപ്പം ബി.ജെ.പിയിലെത്തി. മുത്തച്ഛന്‍റെ ആഗ്രഹം സഫലീകരിച്ചുവെന്ന് അംഗത്വം സ്വീകരിച്ച ശേഷം ഇന്ദര്‍ജീത് പ്രതികരിച്ചു.

താന്‍ ബി.ജെ.പിയില്‍ ചേരണമെന്ന് മുത്തച്ഛന്‍ ആഗ്രഹിച്ചിരുന്നവെന്നും. എ.ബി. വാജ്‌പേയിയെയും എല്‍.കെ. അദ്വാനിയെയും തനിക്ക് പരിചയപ്പെടുത്തി തന്നത് അദ്ദേഹമാണെന്നും ഇന്ദർജീത്​ സിങ് പറഞ്ഞു. അടുത്ത വർഷം നിയമസഭ തെരഞ്ഞെടുപ്പ്​ നടക്കുന്ന പഞ്ചാബിൽ പാർട്ടി അടിത്തറ ശക്​തമാക്കാനുള്ള ശ്രമങ്ങളാണ്​ ബി.ജെ.പി തുടങ്ങിയിരിക്കുന്നത്​.