ഗുജറാത്തിൽ നിന്നുള്ള മുൻ കേന്ദ്രമന്ത്രി എം.ബി വാസവ ബി.ജെ.പിയിൽ നിന്ന്​ രാജിവെച്ചു

ന്യൂഡൽഹി: ഒന്നാം മോദി സർക്കാരിൽ ആദിവാസിക്ഷേമ വകുപ്പ്​ മന്ത്രിയായിരുന്ന മന്‍സുഖ് ഭായ് വാസവ ബി.ജെ.പിയിൽ നിന്ന്​ രാജിവെച്ചു. പാർലമെന്‍റിന്‍റെ ബജറ്റ്​ സെഷനിൽ രാജിക്കത്ത്​ സമർപ്പിക്കുമെന്ന്​ ആറുതവണ ഗുജറാത്തിൽ നിന്ന്​ എം.​പിയായി തെരഞ്ഞെടുക്കപ്പെട്ട വാസവ പറഞ്ഞു.

എന്നാൽ സമ്മർദ തന്ത്രത്തിന്‍റെ ഭാഗമായാണ്​ ഇദ്ദേഹം രാജി സമർപിച്ചതെന്ന്​ റിപ്പോർട്ടുകളുണ്ട്​. സംസ്​ഥാനത്തെ പാർട്ടി പ്രവർത്തനങ്ങളിൽ 56കാരൻ അസ്വസ്​ഥനായിരുന്നു​വെന്നും താൻ ഉയർത്തിയ പ്രശ്​നങ്ങൾക്ക്​ പരിഹാരം കാണാത്തതിനെത്തുടർന്ന്​ അദ്ദേഹം നിരാശനായിരുന്നുവെന്നും റിപ്പോർട്ടുകളുണ്ട്​.

നർമദ ജില്ലയിലെ 121 ഗ്രാമങ്ങൾ പരിസ്​ഥിതി ലോല പ്രദേശമാക്കിയ കേന്ദ്രസർക്കാർ വിജ്ഞാപനം പിൻവലിക്കണമെന്നാവശ്യപ്പെട്ട്​ കഴിഞ്ഞ ആഴ്ച അദ്ദേഹം പ്രധാനമന്ത്രി നരേന്ദ്ര മോദിക്ക്​ കത്തയച്ചിരുന്നു.

'വാസവയുടെ രാജി സമൂഹമാധ്യമങ്ങളിലൂടെയാണ്​ കണ്ടത്​. സംസ്​ഥാന അധ്യക്ഷൻ സി.ആർ. പാട്ടീൽ അദ്ദേഹവുമായി സംസാരിച്ച് പ്രശ്​നങ്ങൾ പരിഹരിക്കാമെന്ന്​ ഉറപ്പ്​ നൽകിയതായും അനുരഞ്​ജനത്തിൽ എത്തിച്ചേരും' -ബി.ജെ.പി വക്​താവ്​ ഭരത്​ പാണ്ഡ്യ പറഞ്ഞു.