ആമസോണിന്‍റെ 1.64കോടി രൂപയുടെ ചരക്കുമായി കടന്നു; ട്രക്ക്​ ഡ്രൈവർ ഉൾപ്പെടെ നാലുപേർ അറസ്റ്റിൽ

കോലാർ: കർണാടകയിൽ ഓൺലൈൻ വ്യാപാര സ്​ഥാപനമായ ആമസോണിന്‍റെ 1.64കോടി രൂപയുടെ ചരക്കുമായി കടന്ന ട്രക്ക്​ ഡ്രൈവറും മൂന്ന്​ കൂട്ടാളികളും അറസ്റ്റിൽ. ഞായറാഴ്ചയാണ്​ പൊലീസ്​ നാലുപേരുടെയും അറസ്റ്റ്​ രേഖപ്പെടുത്തിയത്​.

ട്രക്ക്​ ഡ്രൈവർ ബദ്​റുൽ ഹഖ്​ അഥാവാ വാസി അജയ്​, അസം സ്വദേശികളായ അഭിനന്ദ്​, അബ്​ദുൽ ഹുസൈൻ, ബംഗളൂരു സ്വദേശിയായ പ്രദീപ്​ എന്നിവരാണ്​ അറസ്റ്റിലായത്​.

ഹഖ്​, അഭിനന്ദ്​, അബ്​ദുൽ ഹുസൈൻ എന്നിവർ അസമിൽനിന്ന്​ ​ജോലി തേടി ബംഗളൂരുവിലെത്തിയവരാണ്​. അവരുടെ പശ്ചാത്തല പരിശോധനയൊന്നും നടത്തിയിട്ടില്ല. സാധനങ്ങൾ വീതംവെച്ച്​ കടത്താനായിരുന്നു മൂവരുടെയും പദ്ധതി. എന്നാൽ, അതിനുമുമ്പ്​ ഇവർ പിടിക്കപ്പെട്ടു. സാധനങ്ങളെല്ലാം പിടിച്ചെടുത്തെങ്കിലും കൂടുതൽ വിവരങ്ങൾക്കായി അ​േന്വഷണം തുടരുകയാണ്​' -കോലാർ എസ്​.പി കിഷോർ ബാബു പറഞ്ഞു. ചില്ലറ, മൊത്തവ്യാപാര വിപണിയിൽ ഇവ വിറ്റ്​ ഒരു കോടി രൂപയോളം സമ്പാദിക്കാനായിരുന്നു ഇവരുടെ പദ്ധതിയെന്നും അദ്ദേഹം കൂട്ടിച്ചേർത്തു.

ആമസോണിന്​ ​േലാജിസ്റ്റിക്​ പിന്തുണ നൽകുന്ന ബംഗളൂരു സ്​ഥാപനത്തിന്‍റെ ട്രാൻസ്​പോർട്ട്​ മാനേജർ സുധാകറിൽനിന്ന്​ ലഭിച്ച പരാതിയുടെ അടിസ്​ഥാനത്തിലായിരുന്നു അന്വേഷണം. ഒക്​ടോബർ 20ന്​ പുല​​ർച്ചെ 3.15ഓടെ ദേവനഹള്ളിക്ക്​ സമീപമുള്ള ബുഡിഗെരെ വ്യവസായ പ്രദേശത്തുനിന്ന്​ ആമസോണിന്‍റെ ഉൽപ്പന്നങ്ങൾ വാസി അജയ്​ ഒാടിച്ചിരുന്ന്​ കെ.എ 05 എ.ഡി 0956 രജിസ്​ട്രേഷൻ നമ്പറുള്ള ട്രക്കിൽ കയറ്റി. ഏകദേശം 15 കിലോമീറ്റർ അകലെ ഹൊസക്കോട്ടിന്​ സമീപത്തെ അനുഗൊണ്ടനഹള്ളിയിലെ ആമസോൺ കേന്ദ്രത്തിലേക്ക്​ പോകുകയായിരുന്നു ട്രക്ക്​.

മൊബൈൽ ഫോൺ, കോസ്​മെറ്റിക്​സ്​, ലാപ്​​േടാപ്പ്​ തുടങ്ങി 300ഇനം സാധനങ്ങളുടെ 4027 ഓളം ചരക്കുകൾ ട്രക്കിൽ ഉണ്ടായിരുന്നു. രാവിലെ അഞ്ചുമണിയോടെ ട്രക്ക്​ തെറ്റായ ദിശയിലാണ്​ സഞ്ചരിക്കുന്നതെന്ന്​ ജീവനക്കാർ കണ്ടെത്തി. തുടർന്ന്​ ജി.പി.എസ്​ ഓഫാക്കുകയും ചെയ്​തു. ഏഴു മണിക്കൂറിന്​ ശേഷം നാഗലപുര ഗേറ്റിൽവെച്ച്​ വാഹനം ജീവനക്കാർ പിടികൂടി. ചരക്ക്​ എത്തിക്കേണ്ട സ്​ഥലത്തുനിന്ന്​ 145 കിലോമീറ്റർ അകലെയായിരുന്നു വാഹനം. തുടർന്ന്​ ജീവനക്കാർ പൊലീസിൽ പരാതി നൽകി.

പൊലീസ്​ നടത്തിയ ​അ​േന്വഷണത്തിൽ ട്രക്ക്​ ഡ്രൈവർ സാധനങ്ങൾ കൊണ്ടുപോകുന്നതിനായി മറ്റൊരു ട്രക്ക്​ ഒക്​ടോബർ 30ന്​ വാടകക്ക്​ എടുത്തതായി കണ്ടെത്തി. തുടർന്നാണ്​ അറസ്റ്റ്​ രേഖപ്പെടുത്തിയത്​.