നാടകീയ പിന്തുടരലും ഏറ്റുമുട്ടലും; എസ്​.ഐയെ വെടിവെച്ച്​ രക്ഷപ്പെടാൻ ശ്രമിച്ച ഗാങ്​സ്​റ്റർ സിഡി മണി അറസ്റ്റിൽ

ചെന്നൈ: പൊലീസിനെ വെടിവെച്ചശേഷം രക്ഷപ്പെടാൻ ശ്രമിച്ച ഗാങ്​സ്റ്റർ സിഡി മണി അറസ്​റ്റിൽ. നാടകീയ പിന്തുടരലുകൾക്കും ഏറ്റുമുട്ടലിനും ശേഷമാണ്​ അറസ്റ്റ്​. തമിഴ്​നാട്ടിലെ പോരൂരിൽനിന്നാണ്​ ഇയാൾ അറസ്റ്റിലാകുന്നത്​.

പത്തിലധികം കൊലപാതകം, നിരവധി തട്ടിക്കൊണ്ടുപോകൽ, 22 കവർച്ചകൾ എന്നീ കേസുകളിൽ പ്രതിയാണ്​ സിഡി മണി. നേരത്തേ സിനിമകളുടെ സിഡി വിൽപ്പനയുണ്ടായിരുന്നതിനാലാണ്​ സിഡി മണിയെന്ന പേര്​ വന്നത്​.

പോരൂരിലെ റോഡിൽവെച്ച്​ മണിയെ പിടികൂടാൻ ശ്രമിക്കുന്നതിനിടെ എസ്​.ഐ ബാലകൃഷ്​ണനെ വെടിവെച്ചശേഷം പാലത്തിന്​ മുകളിൽനിന്ന്​ ചാടുകയായിരുന്നു. പാലത്തിന്​ മുകളിൽനിന്ന്​ ചാടിയതോടെ മണിയുടെ കൈകാലുകൾക്ക്​ പരിക്കേറ്റിരുന്നു. തുടർന്നാണ്​ ഇയാൾ പൊലീസിന്‍റെ പിടിയിലാകുന്നത്​.

എസ്​.ഐയുടെ തോളിന്​ പരിക്കേറ്റ നിലയിൽ ആശുപത്രിയിൽ പ്രവേശിപ്പിച്ചു. റോയപ്പേട്ട സർക്കാർ ആശുപത്രിയിൽ ചികിത്സയിലാണ്​ അദ്ദേഹം.