ഒരു കാലത്ത്​ യു.പിയിൽ ​കേസെടുക്കുന്നത്​ തന്നെ വലിയ കാര്യമായിരുന്നെന്ന്​ അമിത്​ ഷാ

ഉത്തർപ്രദേശിൽ എഫ്​.ഐ.ആർ രജിസ്റ്റർ ചെയ്യുന്നത്​ തന്നെ വലിയ കാര്യമായിരുന്നെന്ന്​ കേന്ദ്ര ആഭ്യന്തര മന്ത്രി അമിത്​ ഷാ. ന്യൂസ്​ ചാനലിന്​ നൽകിയ അിമുഖത്തിലാണ്​ യു.പിയിൽ കടുത്ത ക്രിമിനൽ വാഴ്​ചയായിരുന്നെന്ന ആരോപണം അമിത്​ ഷാ ഉന്നയിച്ചത്​.

യോഗി ആദിത്യനാഥ്​ അധികാരത്തിലെത്തിയ ശേഷം യു.പിയിൽ പിടിച്ചുപറിയും തട്ടിപ്പുകളും ബലാത്സംഗവും കുറഞ്ഞുവെന്നും അദ്ദേഹം പറഞ്ഞു.

'സമാജ്​വാദി പാർട്ടി അധികാരത്തിലിരുന്നപ്പോൾ ഒരു സമുദായം കരുതിയത്​ അവർക്​ എന്തും ചെയ്യാനുള്ള സ്വാതന്ത്ര്യമു​ണ്ടെന്നാണ്​. പോത്തുകളെ വീടുകളിൽ നിന്ന്​ പിടിച്ചു കൊണ്ടുപോകുമ്പോൾ കർഷകർക്ക്​ ഒന്നും ചെയ്യാൻ കഴിയുന്നുണ്ടായിരുന്നില്ല. ആളുകൾക്ക്​ ഡൽഹിയിലേക്ക്​ കുടിയേറി രക്ഷപ്പെടുകയായിരുന്നു. കോടികൾ വില മതിക്കുന്ന ഭൂമിയാണ്​ ഗുണ്ടാ സംഘങ്ങൾ​ ഇങ്ങനെ കൈവശപ്പെടുത്തിയത്​' -അമിത്​ഷാ പറഞ്ഞു.

ക്രമസമാധാനം ബി.ജെ.പി പ്രധാനമായാണ്​ കാണുന്നതെന്ന്​ അമിത്​ ഷാ പറഞ്ഞു. അഹമ്മദാബാദ്​ സ്​ഫോടനകേസിൽ 38 ആളുകൾക്ക്​ കഴിഞ്ഞ ദിവസം കോടതി വധിശിക്ഷ വിധിച്ചത്​ ചൂണ്ടികാട്ടി അമിത്​ ഷാ പറഞ്ഞു: 'എസ്​.പിയും ബി.എസ്​.പിയും ഇത്തരം ഭീകരവാദിക​ളെ ജയിലിൽ നിന്ന്​ മോചിപ്പിക്കുകയായിരുന്നു. യു.എ.പി.എ, പോട്ട കേസുകൾ പിൻവലിച്ച എസ്​.പി, ബി.എസ്​.പിയും ഈ രാജ്യത്തിന്‍റെ സുരക്ഷക്കായി എന്താണ്​ ചെയ്തത്​?'

യു.പിയിൽ ഇപ്പോൾ സുരക്ഷയുണ്ടെന്നും കാൺപൂരിലൊക്കെ സ്ത്രീകൾക്ക്​ അർധരാത്രി പോലും പുറത്തിറങ്ങാനാകുന്നു​ണ്ടെന്നും ഇതെല്ലാം ബി.ജെ.പിക്ക്​ അനുകൂല വോട്ടാകുമെന്നും അമിത് ഷാ പറഞ്ഞു.