കശ്​മീരിൽ കറുത്ത മഞ്ഞ്​ പെയ്യുന്ന കാലം ബി.ജെ.പിയിൽ ചേരും –ഗുലാം നബി ആസാദ്​

ന്യൂഡൽഹി: കശ്​മീരിൽ കറുത്ത മഞ്ഞുപെയ്യു​േമ്പാൾ മാത്രമേ താൻ ബി.ജെ.പിയിൽ ചേരൂവെന്ന്​ അഭ്യൂഹങ്ങൾക്ക്​ മറുപടിയുമായി ഗുലാം നബി ആസാദ്​. ഹിന്ദുസ്​ഥാൻ ടൈംസിന്​ നൽകിയ അഭിമുഖത്തിലായിരുന്നു ഗുലാം നബി ആസാദിന്‍റെ പ്രതികരണം.

ബി.ജെ.പിയിൽ എന്നല്ല, മറ്റൊരു പാർട്ടിയിലും താൻ ചേരില്ലെന്നും ഗുലാം നബി ആസാദ്​ വ്യക്തമാക്കി. താൻ ബി.ജെ.പിയിൽ ചേരുമെന്ന അഭ്യൂഹങ്ങൾ പ്രചരിപ്പിക്കുന്നത്​ ആരാണെന്ന്​ വ്യക്തമല്ലെന്നും അദ്ദേഹം പറഞ്ഞു.

വിജയരാജ സിന്ധ്യ പ്രതിപക്ഷ ഉപനേതാവായിരുന്നപ്പോൾ തനിക്കെതിരെ ആരോപണങ്ങൾ ഉന്നയിച്ച്​ രംഗത്തെത്തിയിരുന്നു. ആരോപണം ഗൗരവമായി പരിഗണിച്ച താൻ അന്വേഷണത്തിന്​ പ്രത്യേക കമ്മിറ്റി രൂപീകരിക്കണമെന്ന്​ ആവ​ശ്യപ്പെടുകയായിരുന്നു. അടൽ ബിഹാരി വാജ്​പേയ്​, സിന്ധ്യ, എൽ.കെ. അദ്വാനി എന്നിവർ ചേർന്ന്​ കമ്മിറ്റിയും രൂപീകരിക്കാൻ നിർദേശിച്ചു. 15 ദിവസത്തിനകം റിപ്പോർട്ട്​ സമർപ്പിക്കണമെന്നും ആരോപണം തെളിയിച്ചാൽ എന്തു ശിക്ഷയും സ്വീകരിക്കാൻ തയാറാണെന്നും പറഞ്ഞു. എന്നാൽ വാജ്​പേയ്​ തന്‍റെ സമീപത്ത്​ വരികയും തന്നോടും സഭയോടും മാപ്പ്​ ചോദിക്കുകയുമായിരുന്നു. സിന്ധ്യക്ക്​ എന്നെ അറിയില്ലായിരിക്കാം. എന്നാൽ വാജ്​പേയ്​ക്ക്​ നന്നായി അറിയാമായിരുന്നു - വിവാദങ്ങൾക്ക്​ മറുപടിയായി ഗുലാം നബി ആസാദ്​ പറഞ്ഞു.

90കൾ മുതൽ നരേ​ന്ദ്രമോദിയും ഞാനും പരസ്​പരം അറിയും. ഞങ്ങൾ ഇരു പാർട്ടികള​ുടെയും ജനറൽ സെക്രട്ടറിമാരായിരുന്നു. തങ്ങളുടെ ആശയങ്ങൾ വ്യക്തമാക്കുന്നതിന്​ ടെലിവിഷൻ ചർച്ചകളിലും ഒരുമിച്ചെത്തി. വാദപ്രതിവാദങ്ങൾ നടത്തി. ശേഷം പലപ്പോഴും ഞങ്ങൾ പരസ്​പരം ഒരുമിച്ചിരുന്ന്​ ചായ കുടിക്കുകയും സൗഹൃദ സംഭാഷണം നടത്തുകയും ചെയ്​തു.

അദ്ദേഹം ഗുജറാത്ത്​ മുഖ്യമന്ത്രിയായിരുന്നപ്പോൾ ഞാൻ കേന്ദ്ര ആരോഗ്യമന്ത്രിയായിരുന്നു. വിവിധ ആവശ്യങ്ങൾക്ക്​ തങ്ങൾ പരസ്​പരം ഒരുമിച്ച്​ കൂടിക്കാഴ്ചകൾ നടത്തി.​ പരസ്​പരം അടുത്തറിയാവുന്നതിനാലാണ്​ ഞങ്ങൾ ഇരുവരും കരഞ്ഞതെന്നും അദ്ദേഹം പറഞ്ഞു.

ശശി തരൂർ മോദിയുടെ കണ്ണുനീർ നാട്യമാണെന്ന്​ പറഞ്ഞു. ഏത്​ അർഥത്തിലാണ്​ അത്തരം പ്രസ്​താവന നടത്തിയതെന്ന്​ വ്യക്തമല്ല. ഒരു കോൺഗ്രസ്​ നേതാവ്​ സഭയിൽനിന്ന്​ പുറത്തുപോകുന്നതായി മാത്രമേ അവർ ചിന്തിച്ചിട്ടുള്ളുവെന്നും അദ്ദേഹം പറഞ്ഞു.

സോണിയ ഗാന്ധി തനിക്കായി ഒരു നീണ്ട കത്ത്​ നൽകിയിരുന്നു. ത​ന്‍റെ പ്രവർത്തനങ്ങളെ പ്രശംസിച്ചുകൊണ്ടുള്ള കത്തിൽ വരുന്ന തെരഞ്ഞെടുപ്പിൽ പങ്ക്​ വഹിക്കേണ്ടത്​ സംബന്ധിച്ചും പരാമർശിച്ചു. രാഹുൽ ഗാന്ധിയെ ഒന്നുരണ്ടുതവണ കാണുകയും ചെയ്​തതായും ആസാദ്​ പറഞ്ഞു.

രാജ്യസഭയിൽ പ്രതിപക്ഷ നേതാവായിരുന്ന ഗുലാം നബി ആസാദിന്‍റെ വിടവാങ്ങൽ ദിനത്തിൽ പ്രധാനമന്ത്രി നരേന്ദ്രമോദി നടത്തിയ വൈകാരിക പ്രസംഗം ചർച്ചയായിരുന്നു. ഇതോടെയാണ്​ ഗുലാം നബി ആസാദ്​ ബി.ജെ.പിയിൽ ചേരുമെന്ന അഭ്യൂഹം വൻതോതിൽ പ്രചരിച്ചത്​.