കൻവാർ യാത്ര: യോഗിക്കെതിരെ ധാമി; 'മനുഷ്യജീവൻ പൊലിയുന്നത്​ ദൈവം ഇഷ്ടപ്പെടില്ല'

ഡെറാഡൂൺ: കോടിക്കണക്കിന്​ പേർ പ​െങ്കടുക്കുന്ന കൻവാർ യാത്രക്ക്​ യോഗി ആദിത്യനാഥിന്‍റെ നേതൃത്വത്തിൽ യു.പി സർക്കാർ ഒരുക്കം തുടരവേ എതിരഭിപ്രായവുമായി ഉത്തരാഖണ്ഡ്​ മുഖ്യമന്ത്രി. കോവിഡ്​ കാരണം മനുഷ്യജീവൻ പൊലിയുന്നത്​ ദൈവം ഇഷ്ടപ്പെടില്ലെന്നാണ്​ ഉത്തരാഖണ്ഡിന്‍റെ 11ാമത്​ മുഖ്യമന്ത്രിയായി കഴിഞ്ഞ ദിവസം ചുമതലയേറ്റ പുഷ്കർ സിങ്​ ധാമി പറഞ്ഞത്​. ആജ്​ തക്​ ടി.വി ചാനലിന്​ നൽകിയ പ്രത്യേക അഭിമുഖത്തിലാണ്​ ധാമി തന്‍റെ നിലപാട്​ വ്യക്​തമാക്കിയത്​.

കോവിഡ്​ വ്യാപന സാഹചര്യത്തിൽ കൻവാർ യാത്ര ഉപേക്ഷിക്കാൻ മുൻമുഖ്യമന്ത്രി തിരത്ത് സിങ്​ റാവത്തിന്‍റെ നേതൃത്വത്തിലുള്ള മുൻ സർക്കാർ തീരുമാനമെടുത്തിരുന്നു. ധാമി ചുമതലയേറ്റ ശേഷം കൻവാർ തീർത്ഥാടനത്തെക്കുറിച്ച​ുള്ള തീരുമാനം പുന:പരിശോധിക്കാൻ സർക്കാർ തീരുമാനിച്ചിരുന്നു. ഇക്കാര്യത്തിൽ വ്യക്തമായ തീരുമാനമെടുത്തിട്ടുണ്ടോയെന്ന് ചോദിച്ചപ്പോൾ ''ഉത്തരാഖണ്ഡ് ആതിഥേയർ മാത്രമാണ്. ഹരിയാന, ഉത്തർപ്രദേശ്, മധ്യപ്രദേശ് എന്നിവിടങ്ങളിൽ നിന്നുള്ള കോടിക്കണക്കിന് വിശ്വാസികളാണ്​ തീർഥാടനത്തിന്​ വരുന്നത്​. ഈ സംസ്​ഥാനങ്ങ്​ുമായി സംസാരിച്ച ശേഷം അന്തിമ തീരുമാനമെടുക്കും'' -എന്നായിരുന്നു ധാമിയുടെ മറുപടി. ''ഇത് ദശലക്ഷക്കണക്കിന് ആളുകളുടെ വിശ്വാസമാണ്. എങ്കിലും ആളുകളുടെ ജീവന് ഭീഷണിയാകരുത്. ജീവൻ രക്ഷിക്കുക എന്നതാണ് ഞങ്ങളുടെ പ്രഥമ പരിഗണന. കോവിഡ്​ ബാധിച്ച്​ ആളുകളുടെ ജീവൻ നഷ്ടപ്പെടുന്നത്​ ദൈവത്തിന്​ ഇഷ്ടപ്പെടില്ല'' -അദ്ദേഹം കൂട്ടിച്ചേർത്തു.

ജൂലൈ 25 മുതൽ കൻവർ യാത്ര തുടങ്ങാൻ ഉത്തർപ്രദേശ് മുഖ്യമന്ത്രി യോഗി ആദിത്യനാഥ്​ ഉത്തരവിട്ടിരുന്നു. തുടർ നടപടികൾ സ്വീകരിക്കാൻ ഉ​േദ്യാഗസ്ഥർക്ക്​ നിർദേശം നൽകുകയും ചെയ്​തു. എന്നാൽ, കൻവാർ യാത്ര വീണ്ടും കോവിഡ്​ വ്യാപനത്തിന്​ കാരണമാവുമെന്ന ആശങ്കയിലാണ്​ വിദഗ്​ധർ. കുംഭമേളയെ തുടർന്നുണ്ടായ കോവിഡ്​ വ്യാപനത്തേക്കാൾ വലിയ രോഗബാധ കൻവാർ യാത്രയെ തുടർന്ന്​ ഉണ്ടാവുമെന്നാണ്​ മുന്നറിയിപ്പ്​. കൻവാർ യാത്രക്ക്​ അനുമതി നൽകാനുള്ള ചർച്ചകൾ പുരോഗമിക്കുന്നതിനിടെയാണ്​ പുതിയ മുന്നറിയിപ്പ്​. കുംഭമേളയിൽ പ​ങ്കെടുത്തതിനേക്കാൾ ആളുകൾ കൻവാർ യാത്രക്കെത്തുമെന്നാണ് പ്രതീക്ഷിക്കുന്നത്​. ഇതാണ്​ കോവിഡ്​ വ്യാപനം സംബന്ധിച്ച ആശങ്കക്ക്​ കാരണം.

ഏകദേശം രണ്ട്​ കോടി മുതൽ അഞ്ച്​ കോടി ആളുകൾ കൻവാർ യാത്രയിൽ പ​ങ്കെടുക്കുമെന്നാണ്​ പ്രതീക്ഷിക്കുന്നത്​. കോവിഡ്​ നിയന്ത്രണങ്ങൾ നീക്കിയെങ്കിലും പ്രോ​ട്ടോകോൾ കർശനമായി പാലിക്കേണ്ട സമയമാണിത്​. എന്നാൽ, കൻവാർ യാത്രയുടെ സമയത്ത്​ ഇത്​ പാലിക്കുക പ്രയാസകരമായിരിക്കുമെന്നാണ്​ വിദഗ്​ധർ വ്യക്​തമാക്കുന്നത്​.

രാജ്യം കോവിഡ്​ മൂന്നാം തരംഗത്തിന്‍റെ പടിവാതിൽക്കൽ നിൽക്കു​േമ്പാൾ കൻവാർ യാത്രക്ക്​ അനുമതി നൽകുന്നത്​ ശ്രദ്ധയോടെ മാത്രം വേണമെന്ന്​ വിദഗ്​ധർ ആവശ്യപ്പെട്ടു.