ട്രെയിൻ ടിക്കറ്റ്​ നിശ്ചയിക്കാൻ സ്വകാര്യ കമ്പനികൾക്ക്​ അനുവാദം നൽകുമെന്ന്​ കേന്ദ്രസർക്കാർ

ന്യൂഡൽഹി: സ്വകാര്യ ട്രെയിൻ സർവിസുകളിലെ​​ യാത്രക്കാരുടെ ടിക്കറ്റ്​ നിരക്ക്​ നിശ്ചയിക്കാൻ കമ്പനികൾക്ക്​ തന്നെ അനുവാദം നൽകുമെന്ന്​ കേന്ദ്രസർക്കാർ. രാജ്യത്തെ ഏറ്റവും വലിയ പൊതു മേഖല സ്​ഥാപനമായ ഇന്ത്യൻ റെയിൽവേയിൽ സ്വകാര്യ പങ്കാളിത്തം ഉറപ്പുവരുത്തുന്നതിനാണ്​ തീരുമാനം.

യാത്രക്കാരുടെ ടിക്കറ്റ്​ നിരക്കുകൾ നിർണയിക്കാൻ സ്വകാര്യ കമ്പനികൾക്ക്​ അനു​വാദം നൽകുമെന്ന്​ റെയിൽവേ ബോർഡ്​ ചെയർമാൻ വി.കെ. യാദവ്​ പറഞ്ഞു. എ.സി ബസുകളും വിമാനങ്ങളും അതേ റൂട്ടിൽ സർവിസ്​ നടത്തുന്നുണ്ടെന്ന ഓർമ മനസിൽ വെച്ചാകണം ടിക്കറ്റ്​ നിരക്ക്​ നിർണയിക്കേണ്ടതെന്നും അദ്ദേഹം ഓർമിപ്പിച്ചു.

ഇന്ത്യയിൽ ഏറ്റവും കൂടുതൽ പേർ ആശ്രയിക്കുന്ന ഗതാഗത സംവിധാനമാണ്​ റെയിൽവേ. ഒരു ദിവസം ആസ്​ട്രേലിയയുടെ ജനസംഖ്യയോളം വരുന്ന ജനങ്ങൾ ഇന്ത്യൻ റെയിൽവേ ആശ്രയിക്കുന്നുണ്ടെന്നാണ്​ കണക്ക്​. നരേന്ദ്രമോദി സർക്കാർ അധികാരത്തിലെത്തിയതോടെ ലാഭത്തിൽ പ്രവർത്തിച്ചുകൊണ്ടിരിക്കുന്ന റെയിൽവേയിൽ പങ്കാളിത്തത്തിനായി സ്വകാര്യ കമ്പനി​കളെ ക്ഷണിക്കുകയായിരുന്നു. ട്രെയിൻ സർവിസ്​ നടത്തുന്നതിനും സ്​റ്റേഷൻ വിപുലീകരിക്കുന്നതിനുമാണ്​ സ്വകാര്യ കമ്പനികൾക്ക്​ അനുവാദം ലഭിക്കുക.

ആൾസ്​റ്റം എസ്​.എ, ബോംബാർഡിയർ, ജി.എം.ആർ ഇൻഫ്രാസ്​ട്രക്​ചർ ലിമിറ്റഡ്​, അദാനി എൻറർപ്രൈസസ്​ ലിമിറ്റഡ്​ തുടങ്ങിയ കമ്പനികൾ സ്വകാര്യ ​ട്രെയിനുകൾ ഓടിക്കാൻ താൽപര്യം അറിയിച്ചിട്ടുണ്ടെന്നും യാദവ്​ പറഞ്ഞു.

റെയി​ൽവേയിൽ സമ്പൂർണ സ്വകാര്യവൽകരണം നടപ്പാക്കുന്നതി​െൻറ ഭാഗമായി 109 സുപ്രധാന റൂട്ടുകളിൽ 151 ജോഡി ട്രെയിനുകൾ ഓടിക്കാനായിരുന്നു കേന്ദ്രസർക്കാർ തീരുമാനം. ആദ്യ ട്രെയിനുകൾ 2023 ഏപ്രിലിൽ ഓടിത്തുടങ്ങും. 2025 മാർച്ചോടെ 109 റൂട്ടുകളിലും സ്വകാര്യ ട്രെയിനുകൾ ​െകാണ്ടുവരികയാണ്​ ലക്ഷ്യം.