കോവിഡിന്​ മരുന്ന്​: രാംദേവി​െൻറ പരിശ്രമം സന്തോഷകരം; ചട്ടം പാലിക്കണം -കേന്ദ്ര മന്ത്രി

ന്യൂഡൽഹി: യോഗ ഗുരു രാംദേവി​െൻറ പതഞ്​ജലി കമ്പനി പുറത്തിറക്കിയ കോവിഡ് -19 'മരുന്നി'നെച്ചൊല്ലിയുള്ള വിവാദം മുറുകുന്നതിനിടെ രാംദേവിനെ പുകഴ്​ത്തി കേന്ദ്ര മ​ന്ത്രി. രാംദേവ് രാജ്യത്തിനായി എന്തെങ്കിലും ചെയ്യുന്നതിൽ നരേന്ദ്ര മോദി സർക്കാർ സന്തുഷ്ടരാണെന്നാണ്​ ആയുഷ് മന്ത്രി ശ്രീപദ് നായിക് പറഞ്ഞത്​.

ദിവസങ്ങൾക്കകം കോവിഡ്​ ഭേദമാക്കുമെന്ന അവകാശ വാദവുമായി 'കൊറോണിൽ' എന്ന മരുന്നാണ്​ കഴിഞ്ഞ ദിവസം പതഞ്​ജലി പുറത്തിറക്കിയത്​. എന്നാൽ, ചട്ടം പാലിച്ചല്ല മരുന്ന്​ നിർമിച്ചതെന്ന്​ കാണിച്ച്​ ആയുഷ്​ മന്ത്രാലയം ഇടപെട്ടു. മരുന്നി​​െൻറ ഘടനയും മറ്റ്​ വിവരങ്ങളും ഹാജരാക്കാൻ കമ്പനിയോട്​ ആവശ്യപ്പെട്ട​ു. മരുന്ന്​ പരിശോധിച്ച്​ ഫലം ലഭിക്കുന്നത്​ വരെ ഉത്​പന്നം പരസ്യം ചെയ്യരുതെന്നും അറിയിപ്പ്​ നൽകിയിരുന്നു

ഇതിനുപിന്നാലെയാണ്​ രാജ്യ ക്ഷേമത്തിനായി പതഞ്ജലി ഗവേഷണം നടത്തുന്നതിൽ സർക്കാർ സന്തുഷ്​ടരാണെന്ന്​ ​മന്ത്രി 'ദി പ്രിന്റി'നോട് പറഞ്ഞത്​. പക്ഷേ, എല്ലാ ചട്ടങ്ങളും കമ്പനി പാലിക്കണമെന്നും കേന്ദ്ര ആയുർവേദ, യോഗ, പ്രകൃതിചികിത്സ, യുനാനി, സിദ്ധ, ഹോമിയോപ്പതി (ആയുഷ്) വകുപ്പ്​ മന്ത്രിയായ ശ്രീപദ് നായിക് ചൂണ്ടിക്കാട്ടി. "അവരുടെ ഉദ്ദേശ്യം തെറ്റല്ല. പ്രോട്ടോക്കോളുകൾ പാലിച്ചില്ലെന്ന പിഴവ്​ അവർ അംഗീകരിച്ചിട്ടുണ്ട്​'' -മന്ത്രി പറഞ്ഞു.

മരുന്ന്​ രോഗപ്രതിരോധശേഷി വർധിപ്പിക്കുകയല്ല, പകരം കോവിഡിൽനിന്ന്​ പൂർണമുക്തി ലഭ്യമാക്കുമെന്നാണ്​​ ബാബാ രാംദേവി​െൻറ​ അവകാശവാദം. കോവിഡ്​ ബാധിച്ചവർക്ക് 100 ശതമാനം രോഗമുക്​തി നൽകിയതായും വാർത്തസമ്മേളനത്തിൽ പറഞ്ഞിരുന്നു.

എന്നാൽ, പതഞ്ജലിയുടെ അവകാശവാദത്തി​​െൻറ വസ്​തുതകളും മരുന്നുമായി ബന്ധപ്പെട്ട ശാസ്​ത്ര പഠനത്തി​​െൻറ വിശദാംശങ്ങളും അറിയില്ലെന്നാണ്​ മന്ത്രാലയം വ്യക്​തമാക്കിയത്​. ഏതൊക്കെ ആശുപത്രികളിലാണ്​ മരുന്ന്​ ഗവേഷണം നടത്തിയതതെന്ന കാര്യവും ഇൻസ്റ്റിറ്റ്യൂഷണൽ എതിക്​സ്​ കമ്മിറ്റി ക്ലിയറൻസും പതഞ്​ജലിയോട്​ ആവശ്യപ്പെട്ടതായും മന്ത്രാലയം അറിയിച്ചു.