ഗുജറാത്ത്​ ‘വികസന മാതൃക’ ​പൊളിയുന്നു; മരണക്കളമായി സിവിൽ ആശുപത്രി

അഹ്​മദാബാദ്​: മുസ്​ലിം, ഹിന്ദു വാർഡുകൾ വേർതിരിച്ചുവെന്ന വാർത്തയിലൂടെ മാധ്യമങ്ങളിൽ ഇടംപിടിച്ച ആശുപത്രിയാണ്​ അഹ്​മദാബാദിലെ ഗവ. സിവിൽ ഹോസ്​പിറ്റൽ. പ്രധാനമന്ത്രിയുടെ നാട്ടിൽ രോഗികളെ മതംതിരിച്ച്​ ചികിത്സിക്കുന്നുവെന്ന ഇന്ത്യൻ എക്​സ്​പ്രസ്​ വാർത്ത കഴിഞ്ഞമാസം വൻ വിവാദമാണ്​ സൃഷ്​ടിച്ചത്​. 

വർഗീയതയുടെ പ്രകടമായ ഈ നീക്കത്തിനെതിരെ വ്യാപക വിമർശനം​ രാജ്യത്തിനകത്ത്​ നിന്നും പുറത്ത്​ നിന്നും ഉയർന്നു​. ഇത്​ അൽപം കെട്ടടങ്ങിയപ്പോൾ ഗുരുതരമായ നിരവധി ആരോപണങ്ങളാണ്​​ ആശുപത്രിയെ ചുറ്റിപ്പറ്റി പുറത്തുവരുന്നത്​​​. നരേന്ദ്ര മോദിയുടെ “വികസന മാതൃക”യായ ഗുജറാത്തിലെ ആരോഗ്യരംഗം നേരിടുന്ന ശോചനീയാവസ്​ഥയുടെ തെളിവാണ്​ ഞെട്ടിക്കുന്ന ഈ വിവരങ്ങൾ.

രൂക്ഷവിമർശനവുമായി ഹൈ​​കോടതി

കുതിച്ചുയരുന്ന മരണക്കണക്കി​​​​െൻറ പേരിലാണ്​​ സിവിൽ ആശുപത്രി ഇപ്പോൾ വാർത്തകളിൽ നിറയുന്നത്​. ഹെഡ്​ നഴ്​സ​​്​ കാതറിൻ ക്രിസ്​റ്റ്യൻ ഉൾപ്പെടെ 400ലേറെ പേരാണ്​ ഇവി​​ടെ കോവിഡ്​ ബാധിച്ച്​ മരിച്ചത്​. ആശുപത്രിയിലെ മോശം പരിതസ്​ഥിതിയെ കുറിച്ച്​ ഗുജറാത്ത്​ ഹൈകോടതി കഴിഞ്ഞ ദിവസം രൂക്ഷവിമർശനം ഉന്നയിച്ചിരുന്നു. വിജയ്​ രൂപാനി സർക്കാറിനെയും കോടതി നിർത്തിപ്പൊരിച്ചു.  ഏകോപനമില്ലാത്തതും ഉത്തരവാദപ്പെട്ടവരുടെ അനാസ്​ഥയുമാണ്​ ഈ ദുരന്തത്തിന്​ കാരണമെന്നും കോടതി ചൂണ്ടിക്കാട്ടി. സ്ഥിതിഗതികൾ അന്വേഷണ വിധേയമാക്കണമെന്നും ഇതിനായി സ്വതന്ത്ര ഡോക്ടർമാരുടെ സമിതി രൂപവത്​കരിക്കണമെന്നും ഡിവിഷൻ ബെഞ്ച് സംസ്​ഥാന സർക്കാറിനോട്​ ഉത്തരവിട്ടു. 

ആശുപത്രിയിലെ ദുരിതം ചൂണ്ടിക്കാട്ടി ഒരു റസിഡൻറ്​ ഡോക്ടർ കോടതിക്ക്​ ഊമക്കത്ത്​ എഴുതിയതിലൂടെയാണ്​ കാര്യങ്ങൾ പുറംലോകമറിയുന്നത്​. ശസ്​ത്രക്രിയ വേളകളിൽ പോലും ഡോക്​ടർമാർക്ക്​ പി.പി.ഇ കിറ്റ്​ ലഭിക്കുന്നില്ലെന്നും ആശുപത്രി നാഥനില്ലാ കളരിയാണെന്നും കത്തിൽ പരാതിപ്പെട്ടിരുന്നു. എന്നാൽ, ഈ കത്തിന്​ യാതൊരു പ്രാധാന്യവും നൽകരുതെന്നാണ്​ സർക്കാർ കോടതിയോട്​ ആവശ്യപ്പെട്ടത്​. ഈ വാദം നിരസിച്ച കോടതി, ഇതങ്ങനെ അവഗണിക്കാനോ തള്ളിക്കളയാനോ കഴിയില്ലെന്ന്​ വ്യക്​തമാക്കി.​ ആശുപത്രിയിൽ ജഡ്​ജിമാർ മിന്നൽ സന്ദർശനം നടത്തുമെന്നും കോടതി മുന്നറിയിപ്പ്​ നൽകിയിരുന്നു.

കോവിഡ്​ രോഗികൾ തെരുവിൽ; മൃതദേഹം റോഡരികിൽ
ഇതേ ആശുപത്രിയി​ൽ ചികിത്സയിലായിരുന്ന കോവിഡ്​ രോഗിയുടെ മൃതദേഹം​ റോഡരികിൽ ക​ണ്ടെത്തിയതും രാജ്യത്തെ ഞെട്ടിച്ചു. ഗണപത്​ ഭായ് വരുഭായ് മക്​വാന എന്ന 67കാരനായിരുന്നു ഈ ദുര്യോഗം. മേയ് 10ന്​​ കോവിഡ്​ ലക്ഷണങ്ങളോടെ ചികിത്സ തേടിയ ഗണപത്​ ഭായിയെ 15നാണ്​ മരിച്ചനിലയിൽ കണ്ടത്​. വീട്ടിനടുത്ത ഡാനിലിംഡയിലെ ബസ്​സ​്​റ്റോപ്പിലായിരുന്നു മൃതദേഹം. 

ആശുപത്രി അധികൃതരോട്​​ ചോദിച്ചപ്പോൾ, രോഗം കുറഞ്ഞതിനാൽ തലേന്ന്​ ഡിസ്​ചാർജ്​ ചെയ്​തുവെന്നായിരുന്നു മറുപടി. എന്നാൽ, ഈ വിവരം തങ്ങളെ അറിയിച്ചില്ലെന്ന്​ കുടുംബം വ്യക്​തമാക്കി. പോസ്​റ്റ്​​മോർട്ടത്തിന്​ ശേഷം ​പൊലീസ്​ വിളിച്ചപ്പോഴാണ്​ മരണവിവരം പോലും ഇവർ അറിഞ്ഞത്​. മരിച്ച ശേഷം ആംബുലൻസ്​ പോലും നൽകാതെ അധികൃതർ അവഗണിച്ചതായും മകൻ കീർത്തി മക്​വാന വെളിപ്പെടുത്തിയിരുന്നു. 

ഏപ്രിൽ 20ന് ഇവിടെ പ്രവേശനം നിഷേധിക്കപ്പെട്ട 25 ഓളം കോവിഡ് രോഗികൾ മണിക്കൂറുകൾ തെരുവിൽ ചെലവഴിച്ചതും വിവാദമായിരുന്നു. കൂട്ടത്തിലൊരാൾ ഇക്കാര്യം സോഷ്യൽ മീഡിയയിൽ പോസ്റ്റ് ചെയ്തതോടെയാണ്​ സർക്കാർ ഇവരെ തിരിഞ്ഞുനോക്കിയത്​. 

മെയ് 11ന്​ അഡ്​മിറ്റായ ഉമേഷ് തമൈച്ച (44) എന്ന ഹതഭാഗ്യനും ആശുപത്രിയുടെ കെടുകാര്യസ്​ഥതക്ക്​  ഇരയായി. മെയ് 16ന് പുലർച്ചെ ഇദ്ദേഹം മരണപ്പെട്ടിട്ടും 10 മണിക്കൂറിനുശേഷമാണ്​ വിവരം കുടുംബത്തെ അറിയിച്ചത്. “മരണത്തെക്കുറിച്ച് വൈകുന്നേരം മാത്രമാണ് ഞങ്ങളോട് പറഞ്ഞത്. അതുവരെ അദ്ദേഹത്തിന് നൽകിയ ചികിത്സയെക്കുറിച്ചും അദ്ദേഹത്തി​​​​െൻറ അവസ്ഥ എങ്ങനെ, എപ്പോൾ വഷളായി എന്നതിനെക്കുറിച്ചും ഞങ്ങൾക്ക് അറിയില്ലായിരുന്നു” തമൈച്ചയുടെ സഹോദരി കൽപന പറഞ്ഞു. മൃതദേഹത്തിലുണ്ടായിരുന്ന വാച്ചും മൊബൈൽ ഫോണും മോഷ്ടിക്കപ്പെട്ടതായും കുടുംബം ആരോപിക്കുന്നു. വിലപിടിപ്പുള്ള വസ്​തുക്കൾ മൃതദേഹത്തിൽനിന്ന്​ മോഷണം ​പോകുന്നത്​ ഇവി​​ടെ പുതിയ കാര്യമല്ല. ഒരു സ്ത്രീയുടെ സ്വർണ്ണാഭരണം, പണം, മൊബൈൽ ഫോൺ എന്നിവ മരണശേഷം മോഷ്ടിക്കപ്പെട്ടതായി നേരത്തെ പരാതി ഉയർന്നിരുന്നു. 

ലോകം കോവിഡ്​ മുന്നൊരുക്കത്തിൽ; ഗുജറാത്തിൽ ‘നമസ്‌തേ ട്രംപ്​’ 
മഹാമാരിയെ തടയാൻ ലോകം ഒന്നാകെ മുൻകരുതൽ എടുക്കു​േമ്പാൾ ഗുജറാത്ത്​ ‘നമസ്‌തേ ട്രംപി’നുള്ള തകൃതിയായ ഒരുക്കത്തിലായിരുന്നു. ഇതിനുള്ള കനത്ത വിലയാണ്​ ഇപ്പോൾ സംസ്​ഥാനത്തെ പൗരൻമാർ ഒടുക്കുന്നതെന്ന്​ വിദഗ്​ധർ ചൂണ്ടിക്കാട്ടുന്നു. 

മാർച്ച് 17നാണ്​ അഹമ്മദാബാദിൽ ആദ്യത്തെ കോവിഡ്​ കേസ് രേഖപ്പെടുത്തിയത്​. മാസാവസാനം 30ൽ താഴെയായിരുന്നു കേസുകൾ. മൂന്ന് മരണവും റിപ്പോർട്ട്​ ചെയ്​തു. അതിനുശേഷം, വെറും രണ്ട് മാസത്തിനുള്ളിൽ എണ്ണം കുതിച്ചുയർന്നു. ആകെ രോഗികൾ പതിനയ്യായിരത്തോളവും മരണം തൊള്ളായിരവും പിന്നിട്ടു. കർശനമായ ലോക്ഡൗൺ നടപ്പാക്കിയിട്ടും ഇതാണ്​ അവസ്​ഥ. 

ഏകദേശം 6.5 ശതമാനമാണ് അഹമ്മദാബാദി​​​​െൻറ മരണനിരക്ക്. ഇത് ദേശീയ ശരാശരിയുടെ ഇരട്ടിയാണ്. ഗുജറാത്തിൽ മൊത്തം കേസുകളിൽ 74 ശതമാനവും മരണങ്ങളിൽ 80 ശതമാനവും അഹമ്മദാബാദിലാണ്.

ഫെബ്രുവരി, മാർച്ച് മാസങ്ങളിൽ ഗുജറാത്തിൽ അരങ്ങേറിയ രാഷ്ട്രീയ നാടകങ്ങളാണ്​ ഈ ദുരന്തത്തിന്​ വഴിയൊരുക്കിയത്​ എന്ന്​ പറഞ്ഞാൽ തെറ്റാവില്ല. ഫെബ്രുവരി അവസാനം യു.എസ് പ്രസിഡൻറ്​ ഡൊണാൾഡ് ട്രംപി​​​​െൻറ അഹ്​മദാബാദ്​ സന്ദർശനമായ ‘നമസ്‌തെ ട്രംപി’​​​​െൻറ ഒരുക്കത്തിലായിരുന്നു സംസ്​ഥാനം. 

1.25 ലക്ഷം പേരെയാണ്​ പ്രസിഡൻറ്​ ട്രംപും പ്രധാനമന്ത്രി മോദിയും മോട്ടേര സ്റ്റേഡിയത്തിൽ അഭിസംബോധന ചെയ്​തത്​. ഫെബ്രുവരി 24ന് നടന്ന പരിപാടിക്ക് വേണ്ടി സംസ്ഥാന സർക്കാറും അഹ്​മദാബാദ് മുനിസിപ്പൽ കോർപ്പറേഷനും തങ്ങളുടെ മുഴുവൻ സന്നാഹങ്ങളും ഉഴിഞ്ഞുവെച്ചു. ജനുവരി പകുതിയും ഫെബ്രുവരി മുഴുവനും ഇതിനുള്ള തയാറെടുപ്പിലായിരുന്നു. ജനുവരി 30ന് ലോകാരോഗ്യ സംഘടന ‘പൊതുജനാരോഗ്യ അടിയന്തരാവസ്ഥ’ പ്രഖ്യാപിച്ചിരുന്നുവെന്ന്​ പ്രത്യേകം​ ഓർക്കണം.

ട്രംപി​​​​െൻറ സന്ദർശനം കഴിഞ്ഞ്​ 10 ദിവസത്തിനുശേഷമാണ്​ സർക്കാറിന്​ കോവിഡിനെ കുറിച്ച്​ ബോധമുദിച്ചത്​. മാർച്ച് 5ന്​ പ്രതിരോധ പദ്ധതി പ്രഖ്യാപിച്ചു. വിദേശത്ത് നിന്ന് വരുന്നവരുടെ ഊഷ്​മാവ്​ തെർമോമീറ്റർ ഉപയോഗിച്ച് പരിശോധിക്കുക എന്നതായിരുന്നു ഇതിൽ പ്രധാന ഇനം. ക്രമേണ ആഭ്യന്തര യാത്രക്കാരെയും പരിശോധിക്കാൻ തുടങ്ങി. മാർച്ച് 6 മുതൽ 22 വരെ 6,000 യാത്രക്കാരാണ്​ അഹമ്മദാബാദ് വിമാനത്താവളത്തിലെത്തിയത്​. മാർച്ച് 15ന് ശേഷം വന്നവരോട് രണ്ടാഴ്ച വീട്ടിൽ ക്വാറൻറീനിൽ തുടരാൻ ആവശ്യപ്പെട്ടു.

കൊ​റോണക്കിടയിലും കുതിരക്കച്ചവടം

അധികാരം കൈക്കലാക്കാനുള്ള ബി.ജെ.പിയുടെ തുറുപ്പ്​ ചീട്ടായ കുതിരക്കച്ചവടത്തിന്​ കൊറോണക്കാലത്തും യാതൊരു മുടക്കവും നേരിട്ടില്ല. സംസ്​ഥാനത്തെ നാല് സീറ്റുകളിലേക്കുള്ള രാജ്യസഭ തെരഞ്ഞെടുപ്പ്​ മുന്നിൽകണ്ടായിരുന്നു അഭ്യാസം. മൂന്ന്​ സീറ്റുണ്ടായിരുന്ന ബി.ജെ.പിക്ക്​ ഒന്ന്​ നഷ്​ടപ്പെടാൻ സാധ്യതയുണ്ടായിരുന്നു. ഒരുസീറ്റുള്ള കോൺഗ്രസിന്​ ഒന്നുകൂടി ലഭിക്കാനും സഹായകമായിരുന്നു കക്ഷിനില. ഈ സാഹചര്യത്തിലാണ്​ സീറ്റുകൾ നിലനിർത്താൻ ഭരണകക്ഷിയായ ബി.ജെ.പി കിണഞ്ഞു പരിശ്രമിച്ചത്​. 

ഈ വിലപേശൽ ഓപറേഷ​​​​െൻറ ഭാഗമായി ഏതാനും ദിവസങ്ങൾക്കുള്ളിൽ അഞ്ച് കോൺഗ്രസ് എം‌.എൽ.‌എമാർ സഭയിൽനിന്ന് രാജിവച്ചു. ചാക്കിട്ടുപിടിത്തം തടയാൻ ശേഷിക്കുന്ന എം‌.എൽ.‌എമാരെ പ്രതിപക്ഷം രാജസ്ഥാനിലേക്ക് കടത്തി. ആരോഗ്യരംഗത്ത്​ പ്രതിസന്ധി രൂക്ഷമാകു​േമ്പാൾ ഇവിടെ രാഷ്ട്രീയ നാടകം പുരോഗമിക്കുകയായിരുന്നുവെന്ന്​ ചുരുക്കം.

കോവിഡ് ഭീഷണി ഗുരുതരമായതിനാൽ നിയമസഭാ സമ്മേളനം അനിശ്ചിതമായി നീട്ടിവെക്കണമെന്ന്​ മാർച്ച്​ 13ന്​ പ്രതിപക്ഷ നേതാവ്​ ആവശ്യപ്പെട്ടിരുന്നു. ഈ ആവശ്യം നിരസിച്ച സർക്കാർ, നിയമസഭാ നടപടികൾ മാർച്ച് 23 വരെ തുടർന്നു. 

വൈകി വന്ന വിവേകം

മരണനിരക്ക്​ കുതിച്ചുയരുകയും രോഗികളു​ടെ എണ്ണം നാൾക്കുനാൾ പെരുകുകയും ചെയ്​തതോടെ ഗുജറാത്തിൽ കാര്യങ്ങൾ കൈവി​ട്ടെന്ന്​ കേന്ദ്രത്തിലുള്ളവർക്ക്​ മനസ്സിലായി. വൈകിയുദിച്ച ഈ ബോധം പക്ഷേ കാര്യമായ ഫലം ചെയ്​തില്ല. ഒടുവിൽ കർശന നടപടികൾ ഉടൻ കൈക്കൊള്ളാൻ രൂപാനി സർക്കാറിനോട് നിർദ്ദേശിച്ചു. 

തുടർന്ന്​, അഹ്​മദാബാദിൽ കോവിഡ്​ പ്രതിരോധപ്രവർത്തനത്തിന്​ മേൽനോട്ടം വഹിക്കാൻ അഡീഷണൽ ചീഫ് സെക്രട്ടറി രാജീവ് കുമാർ ഗുപ്തയെ സംസ്ഥാന സർക്കാർ നിയമിച്ചു. മുതിർന്ന ഉദ്യോഗസ്​ഥനായ മുകേഷ് കുമാറിനെ മുനിസിപ്പൽ കമ്മീഷണറായും നിയമിച്ചു. ചീഫ് സെക്രട്ടറി അനിൽ മുകിം, പ്രധാനമന്ത്രിയുടെ പ്രതിനിധി കെ. കൈലാസ്നാഥൻ എന്നിവരും നഗരത്തിൽ ശ്രദ്ധയൂന്നി.  അഹ്​മദാബാദിനാണ് ത​​​​​െൻറ മുൻഗണന എന്ന്​ മുഖ്യമന്ത്രി രൂപാനിയും പ്രസ്താവനയിറക്കി. എയിംസിൽ നിന്നുള്ള വിദഗ്ധ സംഘത്തെ അഹമ്മദാബാദിലേക്ക് അയക്കണമെന്ന് കേന്ദ്ര ആഭ്യന്തരമന്ത്രി അമിത് ഷായോട് മ​ുഖ്യമന്ത്രി അഭ്യർഥിക്കുകയും ചെയ്​തു.

ഭാരം മുഴുവൻ ഡോക്​ടർമാരിൽ 

മിൽക്​ ബൂത്തുകളും ഫാർമസികളും ഒഴികെയുള്ള എല്ലാ അവശ്യ സേവനങ്ങളും അടച്ചുപൂട്ടി. കർശനമായ ലോക്ഡൗൺ നടപ്പാക്കിയിട്ടും കേസുകളുടെ എണ്ണത്തിൽ മാത്രം ഇടിവുവന്നില്ല. ഒടുവിൽ രോഗത്തെ നേരിടാനുള്ള എല്ലാഭാരവും സർക്കാർ ആശുപത്രികളുടെ മാത്രം ചുമലിലായി. 

മഹാമാരി​ പടർന്നുപിടിച്ച അഹ്​മദാബാദ്​ നഗരത്തിലെ കോവിഡ് ചികിത്സാ കേന്ദ്രമായി സിവിൽ ഹോസ്പിറ്റൽ മാറി. മോശം നടത്തിപ്പിന്​ പുറമെ, ഡോക്ടർമാരും പാരാമെഡിക്കൽ സ്​റ്റാഫും ഉൾപ്പെടെയുള്ളവരുടെ അഭാവവും കാരണം പൊറുതിമുട്ടുന്ന ഇവിടെയാണ്​ സംസ്ഥാനത്തെ മൊത്തം മരണങ്ങളിൽ 50 ​ശതമാനത്തോളവും രേഖപ്പെടുത്തിയത്​. കൂടാതെ കോവിഡ് രോഗികളെ ചികിത്സിക്കുന്നതിൽനിന്ന് മുതിർന്ന ഡോക്ടർമാർ വിട്ടുനിൽക്കുകയും ചെയ്​തു. അതിനാൽ, റസിഡൻറ്​ ഡോക്ടർമാർ, ജൂനിയർമാർ, പാരാമെഡിക്കൽ സ്റ്റാഫ് എന്നിവർക്കാണ് കോവിഡ്​ പ്രതിരോധത്തി​​​​െൻറ മുഴുവൻ ഉത്തരവാദിത്വവും വന്നുചേർന്നത്​. 

കേസുകളുടെ എണ്ണം വർധിച്ചിട്ടും പരിശോധന ഗണ്യമായി കുറച്ചതായി ആരോപണം ഉയർന്നു. മൊത്തം സാമ്പിളുകളുടെ 20 ശതമാനമാണ്​ സംസ്​ഥാനത്ത്​ പോസിറ്റീവ് രേഖപ്പെടുത്തുന്നത്​. 

അതേസമയം, ഭീതിപ്പെടുത്തുന്ന മരണ നിരക്ക്​ സിവിൽ ആശുപത്രിയിൽ ജനങ്ങൾക്കുള്ള വിശ്വാസവും നഷ്​ടപ്പെടുത്തി​. നേരത്തെ കോവിഡ്​ ബാധിച്ച്​ മരിച്ച ഉമേഷ് തമൈചയുടെ ഭാര്യക്കും മക്കൾക്കും കോവിഡ്​ സ്​ഥിരീകരിച്ചപ്പോൾ അവരെ സ്വകാര്യ ആശുപത്രിയിലാണ്​ പ്രവേശിപ്പിച്ചത്​. ഇരുവരും സുഖം പ്രാപിച്ചതായി തമൈചയുടെ സഹോദരി കൽപന പറഞ്ഞു. ഇതുപോലെ നിരവധിപേർ സർക്കാർ ആശുപത്രികളോട്​ മുഖം തിരിക്കുന്നുണ്ട്​.

ഇപ്പോൾ, നഗരത്തിലെ പ്രധാന കോവിഡ്​ ചികിത്സാ കേന്ദ്രങ്ങളിലെല്ലാം ഉൾക്കൊള്ളാവുന്നതി​​​​െൻറ പരമാവധി രോഗികളെ അഡ്​മിറ്റ്​ ചെയ്​തിട്ടുണ്ട്​. ഹോട്​സ്​പോട്ടുകൾ ഒഴികെ എല്ലായിടത്തും ലോക്ഡൗണിൽ ഇളവ്​ പ്രഖ്യാപിച്ചതിനാൽ അടുത്ത ദിവസങ്ങൾ വളരെ നിർണായകമായിരിക്കുമെന്ന്​ ആരോഗ്യവിദഗ്​ധർ പറയുന്നു.