എന്തിനാണ്​ അവർ ആ കുഞ്ഞിനെ രണ്ടുവട്ടം തട്ടിക്കൊണ്ടുപോയത്​?....

അഹ്​മദാബാദ്​: 'കൺവെട്ടത്തുനിന്ന്​ പൊന്നുമോൻ മാറിനിൽക്കാൻ ഞാൻ അനുവദിക്കാറില്ല''- ഗുജറാത്തിലെ ഗാന്ധിനഗറിൽ കഴിയുന്ന മീന വാഡി എന്ന 25കാരിയുടെ വാക്കുകൾ. എന്നിട്ടും രണ്ടു മാസത്തിനിടെ അവരുടെ കുഞ്ഞിനെ തട്ടിക്കൊണ്ടുപോയത്​ രണ്ടു തവണ. എന്തിനായിരുന്നു ഈ തട്ടിക്കൊണ്ടുപോകൽ? അറിയു​േമ്പാൾ കൗതുകമല്ല, അമ്പരപ്പും ഞെട്ടലും സ്വാഭാവികം.

പ്രസവവും പരിചരണവും പൂർത്തിയാക്കി ആശുപത്രിയിൽനിന്ന്​ മടങ്ങി കൊച്ചുകുടിലിൽ എത്തിയ ഏപ്രിൽ ഒന്നിന്​ തുടങ്ങിയതാണ്​ മീന വാഡിയുടെ ദുര്യോഗം. ആശുപത്രിയിൽ പരിചരണത്തിനുണ്ടായിരുന്ന നഴ്​സ്​ എന്നു പറഞ്ഞ്​ ഒരു സ്​ത്രീ വീട്ടിൽ വരുന്നു. കുഞ്ഞിന്​ വാക്​സിൻ നൽകാനുണ്ടെന്നായിരുന്നു നിർദേശം. നഴ്​സിനൊപ്പം കുഞ്ഞിനെ കൈയിൽ കരുതി മീന ആശുപത്രിയിലേക്ക്​ നടന്നു. മാതാവിനെ പുറത്തുനിർത്തി കുഞ്ഞിനെയുമായി സ്​ത്രീ ആശുപത്രിക്കുള്ളിലേക്ക്​ പോയി. ഫോ​ട്ടോയെടുക്കാനുണ്ടെന്ന്​ കൂടി പറഞ്ഞിരുന്നു.

മണിക്കൂറുകൾ കഴിഞ്ഞും കുഞ്ഞുമായി 'നഴ്​സ്'​ വരാതായതോടെ ഉള്ളിൽ ആധി പെരുത്തു. വിഷയം സുരക്ഷ ജീവനക്കാരോടു പറഞ്ഞു. അവർ പൊലീസിനെ വിളിച്ചു. ഉടൻ എത്തിയ പൊലീസ്​ സ്​ത്രീയുടെ പേരുവിവരങ്ങൾ​ ചോദിച്ചെങ്കിലും മാതാവിന്​ അതൊന്നും അറിയില്ലായിരുന്നു.

സി.സി.ടി.വി പരിശോധനയിൽ ഒരു സ്​ത്രീ സാരിയിൽ ഒരു പൊതിക്കെട്ടുമായി പോകുന്നു. കുഞ്ഞു തന്നെയായിരുന്നോ? അറിയില്ല. 500 ഓളം ഓ​ട്ടോറിക്ഷക്കാരെ ചോദ്യം ചെയ്​തതിൽ സമീപ ഗ്രാമത്തിലേക്ക്​ കുഞ്ഞിനെയമായി സ്​ത്രീ പോയത്​ തിരിച്ചറിഞ്ഞു. അവളുടെ കൈയിൽ കുട്ടിയുണ്ടായിരുന്നതായി ദൃക്​സാക്ഷികളും മൊഴി നൽകി.

ആ ഗ്രാമ​ത്തിലെത്തി നടത്തിയ പരിശോധനയിൽ പൊലീസ്​ പിന്നെയും ഞെട്ടി. ഒരു ഫാമിൽ ഈ സ്​ത്രീയുടെ വസ്​ത്രങ്ങളും ഒരു ആധാർ കാർഡും ബയോമെട്രിക്​ ​തിരിച്ചറിയൽ കാർഡും​ തുടങ്ങി പലതും ഉപേക്ഷിച്ച നിലയിൽ കിടക്കുന്നു. വിലാസം തേടിയായി പൊലീസിന്‍റെ അടുത്ത യാത്ര. അന്വേഷിച്ചെത്തിയ പൊലീസ്​ ഒരു സ്​ത്രീയെ കുഞ്ഞുമായി കണ്ടു. പക്ഷേ, ഈ കുഞ്ഞായിരുന്നില്ല ആ കുഞ്ഞ്​. തന്‍റെ ഭർത്താവ്​ മറ്റൊരു സ്​ത്രീക്കൊപ്പം ഒളിച്ചോടിയെന്നും തന്‍റെ രേഖകൾ മുഴുവൻ മോഷ്​ടിച്ച്​ കടന്നെന്നുമായിരുന്നു സ്​ത്രീക്ക്​ പറയാനുണ്ടായിരുന്നത്​.

ഇവർ നൽകിയ വിലാസം പിന്തുടർന്ന്​ തിരഞ്ഞിറങ്ങിയ പൊലീസ്​ ദമ്പതികളെ കണ്ടെത്തി. കൂടെ കണ്ട കുഞ്ഞ്​ പക്ഷേ, മീനയുടെതായിരുന്നു. ഡി.എൻ.എ പരിശോധനയിൽ അത്​ തെളിയുകയും ചെയ്​തു.

ഈ സ്​ത്രീ കുട്ടിയെ റാഞ്ചിയത്​ സമ്മതിച്ചെങ്കിലും ഒന്നുമറിയില്ലെന്നും തന്‍റെ കുഞ്ഞ്​ തന്നെയെന്നാണ്​ കരുതിയതെന്നുമായിരുന്നു​ ഭർത്താവിന്‍റെ നിലപാട്​. പെൺകുഞ്ഞല്ല, ആൺകുട്ടി പിറക്കാൻ കൊതിക്കുന്നതാണ്​ ഇത്തരം തട്ടിപ്പുകളിലെത്തിക്കുന്നതെന്ന്​ മുൻ പൊലീസ്​ ഓഫീസർ ദീപക്​ വ്യാസ്​ പറയുന്നു. സ്വന്തമായി പിറന്നില്ലെങ്കിൽ മറ്റുള്ളവരുടെ കുഞ്ഞിനെ തട്ടിയെങ്കിലും സ്വന്തമാക്കുന്ന​ രീതി.

കുഞ്ഞിനെ തിരിച്ചുകിട്ടിയ സന്തോഷം പക്ഷേ, മീനക്ക്​ ഏറെ നാൾ നീണ്ടുനിന്നില്ല. ഒരു മരച്ചോട്ടിൽ കുഞ്ഞിനെ കിടത്തി ആക്രി പെറുക്കാൻ അപ്പുറത്ത്​ പോയപ്പോഴായായിരുന്നു മോഷണം. വീണ്ടും ഇവർ പൊലീസ്​ സ്​റ്റേഷനിലെത്തി. കുഞ്ഞ്​ മോഷണ കേസുമായി രണ്ടാംവട്ടവും ദമ്പതികളുടെ വരവ്​ പൊലീസിനെയും ഞെട്ടിച്ചു. വീണ്ടും സി.സി.ടി.വി പരിശോധന. ഒരു കുഞ്ഞുമായി സ്​ത്രീയെയും പുരുഷനെയും ബൈക്കിൽ പോകുന്നതായി ദൃശ്യങ്ങളിൽ​ കണ്ടെത്തി. ബൈക്ക്​ തിരഞ്ഞിറങ്ങിയ പൊലീസ്​ ആളെ അന്ന്​ ബൈക്കിൽ പോയ ആൾ രാജസ്​ഥാൻ സ്വദേശിയാണെന്നായി ഉടമ. പൊലീസ്​ അതിർത്തി കടന്ന്​ രാജസ്​ഥാനിലെത്തി. അവിടെ കുഞ്ഞിരിക്കുന്നു. ചോദിച്ചപ്പോൾ തങ്ങൾക്ക്​ കുട്ടിയില്ലാത്തതിനാൽ കവർച്ച ചെയ്യാൻ തീരുമാനിക്കുകയായിരുന്നുവെന്ന്​ മറുപടിയും. നാലു ദിവസം കഴിഞ്ഞ്​ കുഞ്ഞ്​ വീണ്ടും മീനക്കൊപ്പം.

ഈ കുഞ്ഞിന്‍റെ സംരക്ഷ ദമ്പതികളുടെ മാത്രമല്ല, തങ്ങളുടെ കൂടി ജോലിയായി മാറിയതായി ഗാന്ധിനഗർ പൊലീസ്​ പറയുന്നു.

കഴിഞ്ഞ വർഷം മാത്രം 43,000 കുഞ്ഞുങ്ങളാണ്​ ഇങ്ങനെ കാണാതെ പോയതെന്നാണ്​ സർക്കാർ രേഖകൾ. ഗുജറാത്തിൽ 3,500ഉം.

ബി.ബി.സി ഗുജറാത്തി ലേഖകൻ ഭാർഗവ പരീഖിന്‍റെതാണ്​ റിപ്പോർട്ട്​.