പ്രക്ഷോഭത്തെ അട്ടിമറിക്കാൻ കേന്ദ്രം ശ്രമിക്കുന്നു; കർഷകർക്ക്​ ഐക്യദാർഢ്യം പ്രഖ്യാപിച്ച്​ ബി.ജെ.പി നേതാവ്​ രാജിവെച്ചു

ഛണ്ഡീഖഡ്​: കേ​ന്ദ്രസർക്കാറിന്‍റെ കാർഷിക നിയമങ്ങ​ൾക്കെതിരെ പ്രതിഷേധിക്കുന്ന കർഷകർക്ക്​ ഐക്യദാർഢ്യം പ്രഖ്യപിച്ച്​ ഹരിയാന ബി.ജെ.പി നേതാവിന്‍റെ​ രാജി. മുൻ പാർലമെന്‍ററി സെക്രട്ടറി കൂടിയായ രാംപാൽ മജ്​രയാണ്​ വ്യാഴാഴ്​ച ബി.ജെ.പി വിട്ടത്​.

കാർഷിക നിയമങ്ങൾക്കെതിരെ പ്രതിഷേധിക്കുന്ന കർഷകർക്കൊപ്പം നിൽക്കുന്നതായി പ്രഖ്യാപിച്ച രാംപാൽ മജ്​ര നിയമങ്ങൾ കർഷക വിരുദ്ധമാണെന്നും കൂട്ടിച്ചേർത്തു. കർഷക വിരുദ്ധ നിയമങ്ങൾ സമൂഹത്തിലെ മറ്റുമേഖലകളെയും പ്രതികൂലമായി ബാധിക്കും. കാർഷിക നിയമങ്ങളിൽ പ്രതിഷേധിച്ചാണ്​ രാജിയെന്നും അദ്ദേഹം പറഞ്ഞു.

2019ലാണ്​ ​െഎ.എൻ.എൽ.ഡി വിട്ട്​ മജ്​ര ബി.ജെ.പിയിലെത്തിയത്​. മൂന്നുതവണ ഹരിയാന നിയമസഭയിലും അ​േദ്ദഹം അംഗമായിരുന്നു. അടിസ്​ഥാന താങ്ങുവില സംബന്ധിച്ച നിർദേശം കാർഷിക നിയമങ്ങളിൽ ഇല്ലെന്ന്​ ചൂണ്ടിക്കാട്ടി സെപ്​റ്റംബറിൽ മജ്​ര രംഗത്തെത്തിയിരുന്നു.

റിപബ്ലിക്​ ദിനത്തിലെ കർഷകരുടെ ട്രാക്​ടർ റാലിക്കിടെയുണ്ടായ അക്രമങ്ങളുടെ ഉത്തരവാദിത്തം കേന്ദ്രസർക്കാറിനാണെന്ന്​ പറഞ്ഞ മജ്​ര സമാധാനപരമായ കർഷകരുടെ പ്രതിഷേധത്തെ അട്ടിമറിക്കാനാണ്​ കേന്ദ്രം ശ്രമിക്കുന്നതെന്നും കുറ്റപ്പെടുത്തി.

കർഷക പ്രക്ഷോഭത്തി​നിടെ അതിശൈത്യവും ഹൃദയാഘാതവും അപകടങ്ങളും മൂലം 150ൽ അധികം കർഷകർ മരിച്ചു. എന്നാൽ ഇതുസംബന്ധിച്ച്​ സർക്കാർ ഒരക്ഷരം മിണ്ടാൻ തയാറായിട്ടില്ലെന്നും അദ്ദേഹം പറഞ്ഞു. തന്നെ പിന്തുണക്കുന്നവർ, സുഹൃത്തു​ക്കൾ, അഭ്യൂദയകാംക്ഷികൾ തുടങ്ങിയവരുമായി കൂടി​യാലോചിച്ച ശേഷം ഭാവി തീരുമാനങ്ങളെടുക്കുമെന്നും മജ്​ര പറഞ്ഞു.