പൗരത്വ പ്രക്ഷോഭം: തടങ്കൽ സംബന്ധിച്ച്​ കേന്ദ്രത്തിനും​ ഡൽഹി സർക്കാറിനും ഹൈകോടതി നോട്ടീസ്​

ന്യൂഡൽഹി: പൗരത്വ പ്രക്ഷോഭത്തിൽ പ​ങ്കെടുത്തതിന്​ അറസ്​റ്റിലായ വിദ്യാർഥിനിയുടെ തടങ്കൽ സംബന്ധിച്ച്​ വിശദീകരണം തേടി ഡൽഹി ഹൈകോടതി കേന്ദ്രത്തിനും ഡൽഹി സർക്കാരിനും നോട്ടീസ് നൽകി. തടവിൽ കഴിയുന്ന ഗുൽഫിഷ ഫാത്തിമ(25) എന്ന എം‌.ബി‌.എ വിദ്യാർഥിനിക്ക്​ വേണ്ടി സഹോദരൻ ആഖിൽ ഹുസൈൻ സമർപ്പിച്ച ഹേബിയസ് കോർപ്പസ് ഹരജിയിലാണ് ഹൈകോടതി ഉത്തരവ്. 

പൗരത്വ ഭേദഗതി നിയമം (സി‌എ‌എ), ദേശീയ പൗരത്വ രജിസ്​റ്റർ (എൻ‌.ആർ‌.സി) എന്നിവക്കെതിരെ സമരം ചെയ്​തതിന്​ ഏപ്രിൽ ഒമ്പതിനാണ്​ ഗുൽഫിഷ അറസ്റ്റിലായത്​. യു.എ.പി.എ നിയമപ്രകാരമാണ്​ ഇവർക്കെതിരെ കേസെടുത്തത്​. കേസ്​ പരിഗണിച്ചിരുന്ന പ്രത്യേക കോടതി ലോക്​ഡൗൺ കാരണം പ്രവർത്തിക്കുന്നില്ല. ഈ സാഹചര്യത്തിലാണ്​ സഹോദരൻ ഹൈകോടതി​െയ സമീപിച്ചത്​. കേസിൽ വിശദമായ വാദം കേൾക്കാനായി ജസ്റ്റിസുമാരായ വിപിൻ സംഘി, രജനിഷ് ഭട്നഗർ എന്നിവരടങ്ങിയ ബെഞ്ച് മേയ് 29ലേക്ക്​ മാറ്റി.

ഫെബ്രുവരി 22ന് ജാഫ്രാബാദ് മെട്രോ സ്റ്റേഷന് സമീപം റോഡ് തടയാൻ ജനക്കൂട്ടത്തെ പ്രേരിപ്പിച്ചുവെന്നാണ്​ ഗുൽഫിഷക്കും മറ്റുമെതിരെ ജാഫ്രാബാദ്​ പൊലീസ് സ്റ്റേഷനിൽ രജിസ്​റ്റർ ചെയ്​ത എഫ്‌.ഐ‌.ആറിൽ പറയുന്നത്​. ഈ കേസിലാണ്​ ഇവരെ ആദ്യം അറസ്​റ്റുചെയ്​തത്​. പിന്നീട്, ദേശവിരുദ്ധ പ്രവർത്തനങ്ങൾ ആരോപിച്ച്​ യു.‌എ‌.പി.‌എ ചുമത്തുകയായിരുന്നു. 

ജാഫ്രാബാദിലെ പ്രാഥമിക എഫ്‌.ഐ‌.ആറിൽ സഹോദരിക്ക് ജാമ്യം ലഭിച്ചെങ്കിലും യു‌.എ‌.പി.‌എ പ്രകാരം കസ്റ്റഡിയിൽ തുടരുകയാണെന്ന് ആഖിൽ ഹുസൈൻ പറഞ്ഞു. എൻ.‌ഐ‌.എ നിയമപ്രകാരം രൂപീകരിച്ച പ്രത്യേക കോടതിക്ക് മാത്രമേ യു.എ.പി.എ കേസുകൾ വിചാരണ ചെയ്യാൻ കഴിയൂ. എന്നാൽ, മാർച്ച് 23ന്​ ലോക്ക്ഡൗൺ ആരംഭിച്ചതു മുതൽ ഈ കോടതികൾ പ്രവർത്തിക്കുന്നില്ലെന്ന് ഹരജിക്കാരൻ ചൂണ്ടിക്കാട്ടി. നിയമപരമായ അധികാരമില്ലാതെയാണ്​ തുടർച്ചയായി തടങ്കലിൽ വയ്ക്കുന്നതെന്നും ഉടൻ തന്നെ മോചിപ്പിക്കണമെന്നും ഹൈകോടതിയോട്​ ആവശ്യപ്പെട്ടു.