ആർ.എസ്.എസിന്റെ നിക്കറിടാൻ തുടങ്ങിയതോടെ കോൺ​ഗ്രസിനെ കുറ്റം പറയാതെ പറ്റില്ലെന്നായി; കുമാരസ്വാമിക്ക് നേരെ പരിഹാസവുമായി കോൺ​ഗ്രസ്

ബം​ഗളൂരു: ആർ.എസ്.എസിന്റെ നിക്കറിടാൻ തുടങ്ങിയതോടെ കുമാരസ്വാമിക്ക് കോൺ​ഗ്രസിനെ കുറ്റം പറയാതെ മുന്നോട്ടുപോകാനാകില്ലെന്ന സ്ഥിതിയായെന്ന് പരിഹസിച്ച് കോൺ​ഗ്രസ് നേതാവ് സയ്യിദ് നസീർ ഹുസൈൻ. കഴിഞ്ഞ ദിവസം കർണാടകയിൽ കോൺ​ഗ്രസ് മുന്നോട്ടുവെച്ച വാ​ഗ്ധാനങ്ങളെല്ലാം പരാജയപ്പെട്ടെന്ന പരാമർശവുമായി മുൻ മുഖ്യമന്ത്രിയും ജെ.ഡി.എസ് നേതാവുമായ എച്ച്.ഡി കുമാരസ്വാമി രം​ഗത്തെത്തിയിരുന്നു. ഇതിന് പിന്നാലെയാണ് സയ്യിദ് ഹുസൈന്റെ പരാമർശം.

ബി.ജെ.പിയുമായി സഖ്യത്തിലെത്തിയതിന് ശേഷം കുമാരസ്വാമി ആർ.എസ്.എസിൻെ നിക്കർ ധരിച്ച് തുടങ്ങിയെന്നും കോൺ​ഗ്രസിനെ കുറ്റം പറഞ്ഞേ പറ്റൂവെന്നായെന്നുമായിരുന്നു സയ്യിദ് നസീർ ഹുസൈന്റെ പരാമർശം. ജെ.ഡി.എസിനെ കർണാടകയിൽ ജയിക്കാനായില്ല. പാർട്ടിയുടെ ആശക്കുഴപ്പമുണ്ടാക്കുന്ന പ്രസ്താവനകൾ ഉള്ളിടത്തോളം തെലങ്കാനയിലെ വിജയം വിദൂരമായിരിക്കുമെന്നും സയ്യിദ് ഹുസൈൻ പറഞ്ഞു.

കോൺ​ഗ്രസ് മുന്നോട്ടുവെച്ച അഞ്ച് ഉറപ്പുകളും പാർട്ടി സംസ്ഥാനത്ത് നടപ്പിലാക്കി. പുതിയ പദ്ധതികൾ പ്രാവർത്തികമാക്കുമ്പോൾ നേരിടേണ്ടി വരുന്ന സാധാരണ വെല്ലുവിളികൾ മാത്രമാണ് നിലനിൽക്കുന്നത്. വിഷയത്തിൽ ആഴത്തിലുള്ള പഠനം നടത്തിയിട്ടുണ്ടെന്നും ആശങ്കപ്പെടേണ്ടതില്ലെന്നും അദ്ദേഹം കൂട്ടിച്ചേർത്തു. സാമ്പത്തിക സ്ഥിതിയെ കുറിച്ച് വ്യക്തമായി പഠിച്ച ശേഷമാണ് കോൺ​ഗ്രസ് കർണാടകയിൽ പുതിയ പദ്ധതികൾ ആവിഷ്കരിച്ചത്. സംസ്ഥാനത്തിൻ്റെ ഭാവിയോർത്ത് കുമാരസ്വാമി ആകുലനാകേണ്ടതില്ലെന്നും അദ്ദേഹം പറഞ്ഞു.

മനുഷ്യരെ ജാതിയുടെ പേരിൽ വേർതിരിക്കുകയാണ് ബി.ജെ.പിയുടെയും മോദിയുടെയും ലക്ഷ്യം. കോൺ​ഗ്രസ് ആരും തമ്മിൽ ഭിന്നിപ്പുണ്ടാക്കാൻ ആ​ഗ്രഹിക്കുന്നില്ല. തെലങ്കാനയിൽ കോൺ​ഗ്രസ് ജയിക്കുമെന്ന് ബി.ജെ.പിക്കും ജെ.ഡി.എസിനും തോന്നി തുടങ്ങിയിട്ടുണ്ട്. അതുകൊണ്ടാണ് ഇരു കൂട്ടരും കോൺ​ഗ്രസ് നേതാക്കൾക്കെതിരെ ശാരീരിക അക്രമണമുൾപ്പെടെ നടത്തുന്നതെന്നും സയ്യിദ് ഹുസൈൻ ആരോപിച്ചു.

നവംബർ 30നാണ് തെലങ്കാനയിൽ തെരഞ്ഞെടുപ്പ് നടക്കുക. ഡിസംബർ മൂന്നിന് വോട്ടെണ്ണും.