അന്ത്യയാത്രയിലും ആ അമ്മ സന്തോഷിക്കുന്നുണ്ടാകും, ഈ മകനെയോർത്ത്​

ഭോപ്പാൽ: കോവിഡ്​ ഭീതിയിൽ വിറങ്ങലിച്ചു നിൽക്കു​ന്ന നാടിനെ അണുവിമുക്​തമാക്കുന്നതിന്​ നേതൃത്വം കൊടുക്കു​േമ്പാൾ അഷ്‌റഫ് അലിയുടെ മനസ്സ്​ വിങ്ങുകയായിരുന്നു. അന്ത്യചുംബനം പ്രതീക്ഷിച്ച്​ മാതാവി​​െൻറ ഭൗതികശരീരം വീട്ടിൽ കാത്തിരിക്കുന്നു. വീട്ടിലേക്ക്​ ഓടിപ്പോകാൻ ഉള്ളംവെമ്പുന്നുണ്ടെങ്കിലും, താൻ പോയാൽ ഈ പ്രവൃത്തി പാതിവഴിയിൽ നിലച്ചേക്കുമോ എന്ന്​ ആശങ്ക.

ഒടുവിൽ ഉച്ച കഴിയുന്നത്​ വരെ അഷ്​റഫ്​ അലി ത​​െൻറ ജോലിയിൽ വ്യാപൃതനായി. പിന്നീട്​ ഉമ്മയുടെ അരികിലേക്ക്​.... അന്ത്യകർമങ്ങൾ കഴിഞ്ഞ്​ വീണ്ടും നാടിനെ സേവിക്കാൻ ഈ മകൻ തിരിച്ചെത്തി. ഭോപ്പാൽ മുനിസിപ്പൽ കോർപ്പറേഷനിലാണ്​ മഹാമാരിയുടെ കാലത്ത്​ മനുഷ്യത്വത്തി​​െൻറ പ്രതീകമായി അഷ്​റഫ്​ അലി മാറിയത്​. കോർപറേഷനിലെ പതിനായിരങ്ങളെ മാരകവൈറസിൽനിന്ന്​ രക്ഷിക്കാൻ അണുനശീകരണത്തി​​െൻറ ചുമതല ഇദ്ദേഹത്തിനായിരുന്നു.

“സ്വന്തം അമ്മയേക്കാൾ വിലപ്പെട്ടതൊന്നുമില്ല. പക്ഷേ, ദുരന്തമുഖത്തുള്ള മാതൃരാജ്യത്തെ കൈവിടാനാകുമോ? രാവിലെ എട്ടുമണിയോടെയാണ് അമ്മയുടെ മരണവാർത്ത അറിഞ്ഞത്. എ​​െൻറ രാജ്യത്തോടുള്ള കടമയും എനിക്കുണ്ട്” വിവരമറിഞ്ഞ്​ തന്നെ തേടിവന്ന മാധ്യമപ്രവർത്തകരോട്​ അലി പറഞ്ഞു. ‘ഖബറടക്കത്തിനായി ഉച്ചകഴിഞ്ഞ് പോയി, പിന്നീട് ജോലിയിൽ തിരിച്ചെത്തി" അദ്ദേഹം പറഞ്ഞു.

സഹപ്രവർത്തകർക്കും മുതിർന്ന ഉദ്യോഗസ്​ഥർക്കും അഷ്‌റഫ് അലിയെക്കുറിച്ച്​ പറയാൻ നൂറുനാവാണ്​. ‘അദ്ദേഹം ഞങ്ങൾക്ക്​ പ്രചോദനമാണ്. നഗരത്തിലെ 5,000 മുതൽ 7,000 വരെ വീടുകൾ അഷ്​റഫ്​ അലി അണുവിമുക്​തമാക്കി”മുനിസിപ്പൽ കമ്മീഷണർ വിജയ് ദത്ത പറഞ്ഞു.