ചെന്നൈയിൽ മഴ തുടരുന്നു; പതിനായിരത്തോളം പേരെ ദുരിതാശ്വാസ കേന്ദ്രത്തിലേക്ക്​ മാറ്റി

ചെന്നൈ: കനത്ത മഴയെ തുടർന്ന്​ വെള്ളം പൊങ്ങിയ തമിഴ്​നാട്ടിൽ പതിനയിരത്തോളം പേരെ ദുരിതാശ്വാസ കേന്ദ്രത്തിലേക്ക്​  മാറ്റി. ചെന്നൈയിലും തീരദേശ തമിഴ്​നാട്ടിലെ വിവധയിടങ്ങളിലുമായി നൂറോളം ദുരിതാശ്വാസ  കേന്ദ്രങ്ങൾ തുറന്നിട്ടുണ്ടെന്ന്​ സർക്കാർ അറിയിച്ചു. കഴിഞ്ഞ രാത്രിയിലെ ശക്​തമായ മഴ രാവിലെയും തുടരുകയാണ്​​. ശക്​തമായ മഴയെ തുടർന്ന്​ നഗരത്തിലെയും തീരപ്രദേശങ്ങളിലെയും സ്​കൂളുകൾക്ക്​ അഞ്ചാം ദിവസവും അവധി പ്രഖ്യാപിച്ചിരിക്കുകയാണ്​. 

ഇടവിട്ട്​ ശക്​തമായ മഴയുണ്ടാകുമെന്ന്​ കാലാവസ്​ഥാ വകുപ്പ്​ അറിയിച്ചു. വടക്കു കിഴക്കൻ മൺസൂൺ ആരംഭിച്ചപ്പോൾ തന്നെ 74 ശതമാനം മഴ ലഭിച്ചിട്ടുണ്ട്​. വ്യാഴാഴ്​ച വൈകീട്ട്​ മുതൽ വെള്ളിയാഴ്​ച രാവിലെ വരെ മാത്രം 140 മില്ലീമീറ്റർ മഴയാണ്​ തമിഴ്​നാട്ടിൽ ലഭിച്ചത്​. 

അതേസമയം, ചെന്നൈയിൽ പലയിടത്തു നിന്നും വെള്ളക്കെട്ടുകൾ ഒഴിഞ്ഞു തുടങ്ങിയിട്ടുണ്ട്​. താഴ്​ന്ന പ്രദേശങ്ങൾ ഇപ്പോഴും വെള്ളത്തിനടയിൽ തന്നെയാണ്​. ഇന്ത്യയിലെ ഏറ്റവും വലിയ ബീച്ചായ മറീന ബീച്ചും വെള്ളത്തിനടിയിലാണ്​. മഴക്കെടുതിയുമായി ബന്ധപ്പെട്ട്​ ഒക്​ടോബർ 27 മുതൽ ഇതുവരെ സംസ്​ഥാനത്ത്​ 12 പേർ മരിച്ചതായി സർക്കാർ വൃത്തങ്ങൾ അറിയിച്ചു.