പശുക്കൾക്കായി എല്ലാ ജില്ലയിലും ഹെൽപ്​ഡെസ്​ക്​; കോവിഡിനിടയിലും 'കരുതലുമായി' യോഗി

ലഖ്​നൗ: രാജ്യത്തും സംസ്ഥാനത്തും കോവിഡ്​ പടർന്നുപിടിക്കുന്നതിനിടയിലും പശു സംരക്ഷണം ഉറപ്പാക്കി ഉത്തർ പ്രദേശ്​ മുഖ്യമന്ത്രി യോഗി ആദിത്യനാഥ്​. എല്ലാ ജില്ലയിലും പശുക്കൾക്കായി ഹെൽപ്​ഡെസ്​കുകൾ സ്ഥാപിച്ചുകൊണ്ടുള്ള ഉത്തരവ്​ ഉത്തർപ്രദേശ്​ പുറത്തിറക്കി.

പശുക്കൾക്കായുള്ള തെർമൽ സ്‌കാനറുകൾ, ഓക്‌സിമീറ്ററുകൾ അടക്കമുള്ള മുഴുവൻ മെഡിക്കൽ സജ്ജീകരണങ്ങളും ഗോശാലകളിൽ ഒരുക്കും. ഗ്രാമങ്ങളിലും നഗരങ്ങളിലും അലഞ്ഞുതിരിഞ്ഞു നടക്കുന്ന പശുക്കളെ സംരക്ഷിക്കാനായി ഗോശാലകളുടെ എണ്ണം കൂട്ടാനും തീരുമാനമുണ്ട്​.

ഔദ്യോഗിക കണക്കുകൾ പ്രകാരം 5,268 ഗോ സംരക്ഷണ കേന്ദ്രങ്ങളാണ്​ സംസ്ഥാനത്തുള്ളത്​. സംസ്ഥാനത്തുള്ള 5,73,417 പശുക്കളെ ഇതിൽ സുരക്ഷിതമായി പാർപ്പിച്ചിട്ടുണ്ടെന്നാണ്​ സർക്കാർ കണക്കുകൾ​. 4,64,311 പശുക്കളെ 4,529 താൽക്കാലിക അഭയ കേന്ദ്രങ്ങളിലുമാക്കിയിട്ടുണ്ട്​്​.

കോവിഡ്​ സംസ്ഥാനത്ത്​ വ്യാപക നാശം വരുത്തുന്നതിനിടയിലാണ്​ ഉത്തർപ്രദേശ്​ സർക്കാറിന്‍റെ പശു സംരക്ഷണം. ആശുപത്രികളിൽ കിടക്കകൾ കിട്ടാനില്ലാതെ രോഗികൾ അലയുന്ന സ്ഥിതിവിശേഷമാണുള്ളത്​​. ആശുപത്രിയിലെ ഒരു കിടക്കക്കായി 5​0രോഗികൾ വരെ ക്യൂ നിൽക്കുന്നതായും വാർത്തകൾ വന്നിരുന്നു.