ശിരോവസ്ത്രം: കർണാടക സർക്കാർ സ്വകാര്യതയുടെ അതിർത്തി ലംഘിച്ചു -ഹൈകോടതി

ബംഗളൂരു: വിദ്യാർഥികളും പൊതുജനവും സമാധാനം പാലിക്കണമെന്നും ഭരണഘടനയിൽ വിശ്വാസമർപ്പിക്കണമെന്നും അഭ്യർഥിച്ച്​ കർണാടക ഹൈകോടതി. ശിരോവസ്ത്രം മൗലികാവകാശമായി പ്രഖ്യാപിക്കണമെന്ന ഉഡുപ്പി ഗവ. പി.യു വനിത കോളജ്​ വിദ്യാർഥിനികളുടെ ഹരജിയിൽ വാദം കേൾക്കുന്നതിനിടെ ചൊവ്വാഴ്ച കർണാടകയിലെ കാമ്പസുകൾ സംഘർഷഭരിതമായത്​ ചൂണ്ടിക്കാട്ടിയാണ്​ ഹൈകോടതിയുടെ അഭ്യർഥന. ഹരജിയിൽ ബുധനാഴ്ച വാദം തുടരും.

ചിലയാളുകൾ മാത്രമാണ്​ വിഷയം കത്തിക്കുന്നത്​. ഇതിന്‍റെ പേരിൽ സമരം നടത്തുന്നതും തെരുവിലിറങ്ങുന്നതും മുദ്രാവാക്യം മുഴക്കുന്നതും വിദ്യാർഥികളെയും തിരിച്ചും ആക്രമിക്കുന്നതും നല്ല പ്രവണതയല്ല. അന്താരാഷ്ട്ര സമൂഹം ഇത്​ വീക്ഷിച്ചുകൊണ്ടിരിക്കുകയാണ്​. സർക്കാറിന്​ ഉത്തരവിറക്കാം. എന്നാൽ, ജനങ്ങൾക്കത്​ ചോദ്യം ചെയ്യാം. ഊഹങ്ങളുടെ അടിസ്​ഥാനത്തിൽ സർക്കാർ തീരുമാനങ്ങളിലെത്തരുതെന്നും ഹരജി പരിഗണിച്ച ജസ്റ്റിസ്​ കൃഷ്ണ ദീക്ഷിത്​ അധ്യക്ഷനായ ബെഞ്ച്​ ഓർമിപ്പിച്ചു.

ഖുർആനെതിരെ സർക്കാറിന്​ ഉത്തരവിറക്കാനാവില്ല. വസ്ത്രം ധരിക്കുന്നതും ശിരോവസ്ത്രം ധരിക്കുന്നതും മൗലികാവകാശമാണ്​. എന്നാലും മൗലികാവകാശങ്ങളിൽ സർക്കാറിന്​ നിയന്ത്രണങ്ങളാകാം. യൂനിഫോം സംബന്ധിച്ച്​ വ്യക്തമായ ഉത്തരവില്ല. ശിരോവസ്ത്രം ധരിക്കുന്നത്​ സ്വകാര്യതയുടെ കാര്യമാണ്​. ഈ വിഷയത്തിൽ സർക്കാർ ഉത്തരവ്​ സ്വകാര്യതയുടെ അതിർത്തി ലംഘിച്ചിരിക്കുന്നു- ബെഞ്ച്​ നിരീക്ഷിച്ചു.

ഖുർ ആനിൽ ഏതു പേജിലാണ്​ ശിരോവസ്ത്രം നിർബന്ധമാക്കിയതെന്ന്​ ഹരജിക്കാരുടെ അഭിഭാഷകനോട്​ ചോദിച്ച ജസ്റ്റിസ്​ ദീക്ഷിത്​ മതഗ്രന്ഥം കൊണ്ടുവന്ന്​ പ്രസ്തുത പേജ്​ പരിശോധിച്ചു. മൗലികാവകാശത്തെ മതേതരത്വത്തിന്‍റെ വഴിയിൽ കാണാനാവില്ലെന്നും ശിരോവസ്ത്രത്തിന്‍റെ നിറം ഏതുവേണമെന്ന്​ സർക്കാറിന്​ തീരുമാനിക്കാമെന്നും ഹരജിക്കാർ വാദിച്ചു.

അതേസമയം, ഉഡുപ്പി കുന്താപുര ഭണ്ഡാർകർസ്​ ആർട്​സ്​ ആൻഡ്​ സയൻസ്​ കോളജിലെ ബി.ബി.എ വിദ്യാർഥിനികളായ സുഹ മൗലാന, ആയിശ അലീഫ എന്നിവർ കൂടി ചൊവ്വാഴ്ച ഹൈകോടതിയിൽ ഹരജി നൽകി. കോളജ്​ പ്രിൻസിപ്പൽ, മംഗളൂരു സർവകലാശാല രജിസ്​ട്രാർ, കുന്താപുര ബി.ജെ.പി എം.എൽ.എ ഹാലഡി ശ്രീനിവാസ ഷെട്ടി എന്നിവർ ശിരോവസ്ത്രം ധരിച്ച്​ കോളജിൽ പ്രവേശിക്കുന്നതിൽനിന്ന്​ തങ്ങളെ തടഞ്ഞെന്ന്​ ചൂണ്ടിക്കാട്ടിയാണ്​ ഹരജി.