ശിരോവസ്ത്രം ധരിക്കുന്നത്​ ഇസ്​ലാമിൽ അനിവാര്യമായ ആചാരമല്ലെന്ന് കർണാടക സർക്കാർ

ബംഗളൂരു: ശിരോവസ്ത്രം ധരിക്കുന്നത്​ ഇസ്​ലാമിൽ അനിവാര്യമായ ആചാരമല്ലെന്നും ശിരോവസ്ത്രം തടയുന്നത്​ മതസ്വാത​ന്ത്ര്യം ഉറപ്പുനൽകുന്ന ഭരണഘടനയുടെ ഇരുപത്തഞ്ചാം വകുപ്പിന്‍റെ ലംഘനമല്ലെന്നും ഹൈകോടതിയിൽ കർണാടക സർക്കാറിന്‍റെ വാദം. ശിരോവസ്ത്രം മൗലികാവകാശമായി പ്രഖ്യാപിക്കണമെന്നാവശ്യപ്പെട്ട്​ ഉഡുപ്പി ഗവ. പി.യു വനിത കോളജിലെ വിദ്യാർഥിനികൾ നൽകിയ ഹരജിയിൽ ആറാം ദിവസത്തെ വാദം കേൾക്കലിനിടെയാണ്​ കർണാടക സർക്കാറിനുവേണ്ടി ഹാജരായ അഡ്വക്കറ്റ്​ ജനറൽ പ്രഭുലിംഗ്​ നാവദഗിയുടെ വിചിത്ര വാദം.

ശിരോവസ്​​ത്രധാരണം മൗലികാവകാശമാവാൻ​​ ഭരണഘടനയുടെ ധാർമികതയുടെയും വ്യക്തിയുടെ അന്തസ്സിന്‍റെയും കടമ്പകൂടി കടക്കേണ്ടതുണ്ടെന്നും ശബരിമല കേസിലെയും സൈറ ബാനു കേസിലെയും സുപ്രീംകോടതി വിധികൾ പരാമർശിച്ച്​ അഡ്വക്കറ്റ്​ ജനറൽ പറഞ്ഞു. മതപരമായ അനിവാര്യ ആചാരങ്ങളുമായി ബന്ധപ്പെട്ട്​ തിങ്കളാഴ്ച വിശദവാദം നൽകുമെന്നും അദ്ദേഹം വ്യക്തമാക്കി.

വിദ്യാഭ്യാസ സ്ഥാപനങ്ങളിൽ ശിരോവസ്ത്രം വിലക്കി ഫെബ്രുവരി അഞ്ചിന്​ സർക്കാർ പുറപ്പെടുവിച്ച ഉത്തരവ്​ ആവിഷ്കാര സ്വാതന്ത്ര്യം ഉറപ്പുവരുത്തുന്ന ഭരണഘടനയുടെ 19-ഒന്ന്​ (എ) വകുപ്പിനെ ലംഘിക്കുന്നില്ല. വിദ്യാഭ്യാസ നിയമത്തിന്​ വിധേയമായാണ്​ സർക്കാർ ഉത്തരവ്​. കോളജുകൾ നിർദേശിച്ച യൂനിഫോം ധരിക്കണമെന്നാണ്​ സർക്കാർ ഉത്തരവിട്ടത്​. മതപരമായ കാര്യങ്ങളിൽ ഇടപെടാൻ സർക്കാർ ആഗ്രഹിക്കുന്നില്ലെന്നും അദ്ദേഹം പറഞ്ഞു.

ചീഫ്​ ജസ്റ്റിസ്​ റിതുരാജ്​ അവസ്തി, ജസ്റ്റിസ്​ ജൈബുന്നിസ്​ എം. ഖാസി, ജസ്റ്റിസ്​ കൃഷ്ണ എം. ദീക്ഷിത്​ എന്നിവരടങ്ങുന്ന ഭരണഘടന ബെഞ്ചാണ്​ കേസ്​ പരിഗണിക്കുന്നത്​. കേസിലെ കോടതി നടപടികൾ ലൈവായി സംപ്രേഷണം ചെയ്യുന്നത്​ ഒഴിവാക്കണമെന്നും സമൂഹത്തിൽ അത്​ പ്രശ്നങ്ങൾക്കിടയാക്കുമെന്നും ഹരജിക്കാർക്കുവേണ്ടി ഹാജരായ മുതിർന്ന അഭിഭാഷകൻ പ്രഫ. രവിവർമ കുമാർ അഭ്യർഥിച്ചു.

എന്നാൽ, ആവശ്യം തള്ളിയ ചീഫ്​ ജസ്റ്റിസ്​ റിതുരാജ്​ അവസ്തി​, എതിർകക്ഷിക്കാരുടെ നിലപാടുകൂടി ജനങ്ങളറിയട്ടെ എന്ന്​ പ്രതികരിച്ചു. ഇടക്കാല ഉത്തരവ്​ ലംഘിക്കപ്പെടുകയാണെന്ന്​ അഡ്വക്കറ്റ്​ ജനറൽ ഹൈകോടതിയെ അറിയിച്ചതോടെ ഒരുതരത്തിലും ഉത്തരവ്​ ലംഘിക്കപ്പെടുന്നില്ലെന്ന്​ ഉറപ്പുവരുത്തണമെന്ന്​ ഹൈകോടതി സർക്കാറിനോട്​ ആവശ്യപ്പെട്ടു. കേസിൽ തിങ്കളാഴ്ച വാദം തുടരും.